Ja Jesús skoltay ja kristyanoʼik yajni yaʼa ja sakʼanil jastal majtanal (Mateo 20:28). Ja yuj, ja Biblia wa xyala ke ja Jesús yeʼnani ja «koltanum ja bʼa luʼumkʼinali» (1 Juan 4:14). Cha wa xyala ke «mini ay pilan koltanum, kechani yeʼna, yujni mey pilan bʼiʼilal ja bʼa luʼumi bʼa akʼubʼalyi ja winike bʼa oj jtaʼ jkoltajeltik» (Hechos 4:12).

 Ja Jesús cham yuj spetsanil ja matik wa x-ajyiyuj skʼuʼajel bʼa yeʼna (Hebreos 2:9; Juan 3:16). Tsaʼan, «ja Dyosi ya kʼeʼuk ja bʼa chamwiniki» sok jaxa Jesús kumxi bʼa satkʼinal jastal ikʼ ason (Hechos 3:15). Masan bʼa satkʼinal, ja Jesús wani xbʼobʼ skoltay tsʼikan lek «ja matik wa xmojxiye soka Dyos yuj yeʼna, yujni tolabida sakʼan ay bʼa skʼanjel pabor yuj yeʼnle» (Hebreos 7:25).

¿Jas yuj tʼilan wa xmakunikujtik ja skoltanel ja Jesús?

 Yujni mulanumotik (Romanos 3:23). Ja mulali wani xyiʼajotik bʼa chamelal sok wani stimawotik bʼa lek oj kil bʼajtik soka Dyosi (Romanos 6:23). Pe ja Jesús jachni jastal «jun jkoltanumtik» bʼa spetsanil ja maʼ wa x-ajyiyuj skʼuʼajel ja bʼa xchamelali (1 Juan 2:1). Yuja Jesús yaʼa ja sakʼanil yuj keʼntik, ja yuj wani xbʼobʼ skoltayotik ma wa xbʼobʼ skʼumuk ja Dyos yuj keʼntik bʼa oj smaklay ja korasyontik sok oj ya perdon ja jmultiki (Mateo 1:21; Romanos 8:34). Ja Dyos wa sjakʼa ja jas wa skʼana ja Jesús yujni akuerdo ay soka jas wa skʼana. Ja yeʼn sjekakon ja Jesús bʼa luʼum «bʼa jachuk oj staʼ skoltajel ja luʼumkʼinal yuj yeʼna» (Juan 3:17).

¿Malanta maʼ skʼuʼajel bʼa Jesús bʼa oj taʼ jsakʼaniltik?

 Miyuk. Ama tʼilani oj jkʼuʼuktik bʼa Jesús, pe mini malanukta bʼa oj taʼ jsakʼaniltik (Hechos 16:30, 31). Ja Biblia wa xyala: «Jastalni chamelxa ay ja kuerpoʼal ta mi xyiʼaj ikʼi, cha jachni chamel ay ja skʼuʼajel ta mi jas xkʼulaxisoki» (Santiago 2:26). Bʼa oj taʼ jsakʼaniltik, tʼilani:

•   Oj jnebʼtik bʼa Jesús soka bʼa sTat, ja Jyoba (Juan 17:3).

•   Ajyelkujtik skʼuʼajel bʼa yeʼnle (Juan 12:44; 14:1).

•   Tʼilani oj jetik ke ay kiʼojtik skʼuʼajel ajyel kʼuʼabʼal soka smandariki (Lucas 6:46; 1 Juan 2:17). Ja Jesús yala ke mi spetsaniluk ja maʼ wa x-aljiyabʼyuj «Kajwal» oj staʼ sakʼanil, kechani ja matik wa skʼulan ja jas wa skʼana ja sTati (Mateo 7:21).

•   Tʼilani mi oj katikan sjejel ke ay kiʼojtik skʼuʼajel anima xtʼaspuntik wokolik. Ja Jesús yala: «Ja maʼ wa xkuchyuj man xjak ja chʼakelali ojni staʼ skoltajel» (Mateo 24:13).