Kʼiyon bʼa jun lugar yaʼaxta sok jel laman ja bʼa stsʼeʼel ja Tampere, bʼa Finlandia. Ja jpamilya mini jel xyila stʼilanil ja relijyon, pe ja mas wa xyaweyi stʼilanili jani ja chapjelali soka lekil modoʼaliki. Ja jnani ti sbʼaj bʼa Alemania, ja yuj yajni chʼinonto ayni ekʼele ti wala wajyon sok ja jmexep soka jtatawelo bʼa Alemania.

 Jelni xkʼulan gusto ja tajneli, sok man yal jchʼinil wanonxani snebʼjel tuktukil tajnel. Yajni ay kiʼoj 14 jabʼil ochyon ja bʼa tajnel bʼa tenis. Sok yajni axa kiʼoj 16 jabʼil wa xchapa jbʼaj chabʼe ma oxe ekʼele ja bʼa kʼakʼu. Chabʼ ekʼele ay maʼ wa sjeʼaki ja bʼa kʼakʼuji sok ja bʼa och kʼakʼuji tujchʼilxa wa xnebʼa ja tajneli. Jelni xkʼulan gusto ajyi ja tajnel bʼa tenis yujni wa xmakunikuj bʼa oj kil janekʼ wa xlajxiyuj ja jkwerpo sok ja jpensari. Ama wa xkʼulan gusto ajyel soka kamigoʼik sok yujel cerveza jujuntik ekʼele, pe mini ajyikuj wokol soka yujel trago ma yabʼjel drogaʼik. Ja bʼa jsakʼanili jani mas wa xkila stʼilanil ajyi ja tajnel bʼa tenis.

 Yajni ay kiʼoj 17 jabʼil, kʼe wajkon ja bʼa tajnelik ja bʼa ATP. a Jitsan ekʼeleʼik jkʼulan ganar ja bʼa tajnelik jaw sok jelni naji jbʼaj ja bʼa jpaisi. Kechanto 22 jabʼil kiʼoj sok tixani ayon ja bʼa 50 matik jel lek xtajniye bʼa tenis ja bʼa luʼumkʼinali.

 Jitsan jabʼil, wajyon ekʼ ja bʼa luʼumkʼinal jastal jun tajnum bʼa wala tupjiyon. Wajyon bʼa lugarik jel tsamalik, pe cha kila jastik mi lekuk, jastal yabʼjel droga, yajel kuxbʼuk ja luʼumkʼinali sok ja milwaneli. Jun sjejel, ja bʼa jujuntik chonabʼik bʼa Estados Unidos aljikabʼtikon mok wajkotikon bʼa jujuntik lugarik yujni jel xiwela sbʼaj. Spetsanil ja jaw jelni ya och jtristeʼil. Ama jel xyaki gusto ja jas wanon skʼulajeli, pe yajni wa x-och ja kʼakʼu jelni jtuchʼil xkabʼ ayon.

 Ja makbʼen Sanna kʼe spaklay ja Biblia soka taʼumantiʼik bʼa Jyoba. Wa xyaki tʼun tseʼej yajni kila wa xyiʼaj gusto snebʼjel bʼa Dyos, pe lekni kila ja wan ajelyi estudio. Ja bʼa 1990 nupanitikon, kechan jun jabʼil ekʼi ja yeʼn och taʼumantiʼ bʼa Jyoba. Ja keʼn wani xkala mey jrelijyon, ama wa xkʼuʼan sbʼaja Dyos. Wa xjul jkʼujol ja mexep bʼa Alemania jelni skʼuman ja Biblia sok sjeʼaki jastal skʼuljel orasyon.

 Jun kʼakʼu, jun nupanum Taʼumantiʼ slokowotikon bʼa snaje ja keʼn soka Sanna. Ja Kari, ja tatamali, yalakabʼ ja jastik kanel tsʼijbʼunubʼal bʼa Biblia sbʼaja «tsaʼanikxta kʼakʼu» (2 Timoteo 3:1-5, TNM). Kʼotni man jkʼujol, pes jnaʼa jas yuj wan ekʼel ja jastik mi lekuk ja bʼa luʼumkʼinali. Ja bʼa kʼakʼu jaw mixani jtaʼatikon tiʼal mas sbʼaj relijyon. Pe man ekʼele jaw, kʼe loʼilanitikon sbʼaja Biblia soka Kari. Spetsanil ja jas wa xnebʼa ayni sbʼej. Yuja ay kiʼoj jun jsakʼanil jel latsʼan ajyi sok tolabida jel la elyon ekʼe, mini xkila jbʼajtikon tikʼan. Pe ama jachuk, ja Kari mini el sgana. Yajni wa xkʼulantikon estudiar sok mi xchʼak yakanki ja sjakjeliki, wa stsʼijbʼanki kartaʼik bʼa yajelki ja sjakʼjeliki. Kila spetsanil jas sjobʼjelik mas tʼilan ja bʼa sakʼanili jani wa xyaʼa ja sjakʼjelik ja Biblia. Takal takal kabʼ stojol ja yolomajel ja Biblia, jani jastal ja sGobyerno ja Dyos ojni ya kʼotuk ja jas skʼapunej ja Jyoba. Snebʼjel ja Dyos, sbʼiʼil Jyoba, sok yiljel spetsanil ja jas skʼulunej bʼa keʼntik, kʼotni man jkʼujol (Salmo 83:18). Ja mas jel cham kabʼi, jani ja koltanel yaʼa ja Dyosi, mini maʼ tʼenji yuj, yaʼani sok syajal skʼujol (Juan 3:16). Cha jnebʼa ojni bʼobʼ kamigoʼuktik ja Dyos sok ajyel sakʼan laman bʼa tolabida bʼa jun kʼachinubʼ (Santiago 4:8). Anto kʼe jobʼ jbʼaj: «¿Jastal oj bʼobʼ jeʼ yajel tsʼakatal?».

 Kʼe jpensaraʼuk ja jas wanon skʼulajel ja bʼa jsakʼanili. Ja bʼa Biblia jnebʼa ja meran gustoʼil jani yajelyi ja tuki sok snikawon bʼa stajelyile tiʼal ja tuk ja skʼuʼajel kiʼoji (Hechos 20:35). Jastal jun tajnum bʼa wala tupjiyon, mini ti wala ajyiyon junuk 200 kʼakʼu ja bʼa jnaji yuja tajneli. Ja jpamilya jel xchamskʼujole ja bʼa jas wanon skʼulajeli: ja chapjelal wa xjejiki, ja jas kʼajyelxa wa xkʼulani soka jkʼel sati. Jnaʼa tʼilan oj tukbʼes bʼaj.

 Wani xnaʼa mini oj yabʼye stojol ja kristyano ta kaʼakan ja tajnel bʼa tenis sok kechan yuja relijyon. Pe ja snajel sbʼaj ja Jyoba sok ajyel sakʼan bʼa tolabida jani mas tʼilan bʼa keʼna yuj skʼuljel ganar premyoʼik ja tajnel bʼa tenis; ja it ayni stojolil. Pwesto ayon bʼa mi oj kʼuʼuk ja jas wa spensaraʼane ja tuk. Keʼnani stsaʼata. Jun teksto bʼa Biblia bʼa skoltayon kuchelkuj ja tʼenjeli jani ja Salmo 118:6, bʼa wa xyala: «Ja Jyoba tey bʼa jtsʼeʼel; sok mini oj xiwkon. ¿Jas oj bʼobʼ skʼuluki ja winiki?».

 Ja bʼa tyempo jaw, jujuntik matik wa xtupwani skʼapaweki jitsan takʼin bʼa mok kakan ja tajnel bʼa tenis sok jachuk mixa oj cham jkʼujol ja bʼa sakʼanil jitsan jabʼil. Pe jtsaʼata ja jas oj kʼuluki. Ja yuj mixani jkʼana ja jas kʼapjiki sok kaʼakan ja tajnel bʼa ATP. Mini kaʼakan ja kestudio bʼa Biblia sok kiʼaj jaʼ jastal Taʼumantiʼ bʼa 2 bʼa julio bʼa 1994.

 Ama mi ekʼ jbʼaj jun desgrasya bʼa oj kʼe jpensaraʼuk sbʼaja Dyos. Cha mini wanukon spensarajel ajyi slejel ja smeranili. Wani xkʼuʼan ay kiʼoj jun lekil jsakʼanil sok mini jas wa skʼulankuj palta. Pe lajansok ja smeranil bʼa Biblia wani smajlayon bʼa oj jtakʼote, jnaʼani ja jsakʼanil ayni stojolil. Ja wego ja jsakʼanil masxani lek yuja jastal wa xpensaran ajyi. Ja jpamilya masxani tsoman ay. Sok jelni gustoʼayon yujni ja oxwane kuntikil snochuneje ja jmodo, sok mini jaʼuk ja bʼa tajneli, jani jastal Taʼumantiʼ.

 Wanto la tajniyon ja tajnel bʼa tenis. Ja bʼa jabʼilik ekʼeljani wani xmakʼlay ja jsakʼanil sok aʼtelik ti chʼikan soka tajnel bʼa tenis. Wala aʼtijiyon jastal chapwanum sok skʼeljel ja bʼa wa x-ajyi ja tajnel bʼa tenis. Ja bʼa jsakʼanili mixani ja wajel jkʼujol ja bʼa tajneli. Ja ajyi jelni wa xchapa jbʼaj jitsan oraʼik ja bʼa semana bʼa tolabida oj kʼotkon jun lekil tajnum. Ja wego kʼotelon jun choluman bʼa tyempo tsʼikan sok wa xpila ja jtyempo bʼa skoltajel ja tuk bʼa oj snaʼe sok oj yawe makunuk ja rasonik bʼa Biblia bʼa stukbʼeski ja jsakʼanili. Yajelyi stʼilanil ja jastal wala xtayon soka Jyoba sok xcholjel yabʼ ja tuk ja jasa oj ajyuk ja tyempo jakumi jelni wa xya gustoʼaxukon (1 Timoteo 6:19).