Ti kʼiyon bʼa Rochester (Nueva York) bʼa jun pamilya katolikoʼe. Ja jnan soka jtati spila sbʼaje ja yajni ayto kiʼoj waxake jabʼil, ja yuj ja bʼa semana tini wala ajyiyonsok ja jnani sok ja kermanoʼiki bʼa jun yal naʼits bʼa matik mey yiʼoje lek takʼin, sok ja bʼa xchʼakulabʼil semana ti wala ajyiyon soka jtati, bʼa masni lek ay ja sakʼanili. Yajni wa xkila yibʼanal ja jas wa skʼulan ja jnan bʼa oj chʼak ya kʼiʼuk ja wake yuntikili, ja keʼn jkʼana oj paxkon rikoʼil bʼa oj bʼobʼ jkoltay.

 Yuja jtati wa skʼana lek oj wajkuj ja bʼa jsakʼanili, skʼulan ja jastik tʼilan bʼa jachuk oj jnaʼ sbʼaj jun universidad bʼa jel chapan. Jkʼulani gusto sok ochyon juʼun tiw. Jkʼanunejyi ja Dyosi bʼa a-skoltayon bʼa oj jkʼul ganar takʼin sok bʼa gusto oj ajyukon, sok jpensaraʼan jani jaw ja sjakʼjel yakiʼi. Jkʼulan estudiar administración hotelera, derecho mercantil sok economía empresarial ja joʼe jabʼil ekʼi, sok tini aʼtijiyon bʼa jun hotel sok casino ja bʼa Las Vegas (Nevada).

 Yajni ayxa kiʼoj 22 jabʼil, keʼnani ja skoltanum mas mojan yiʼoj ja vicepresidente bʼa jun hotel sok casino. Ja tuki wa xyilawe ke jelni rikoʼon sok jel lek wan wajelkuj. Wani xkabʼ stsamalil bʼa lekil waʼelal sok vinoʼik sok ja tragoʼik bʼa mas karo. Ja kamigoʼiki wa xyalawekabʼi: «Mok chʼayuka kʼujol ke ja jas wa xnikjiyuj ja luʼumkʼinal it jani yuja takʼini». Ja yeʼnleʼi wa skʼuʼane lek ke ja takʼini jani ja jas wa xya ajyukotik gusto.

 Ja bʼa kaʼteli, tʼilani oj kʼul atender ja winike sok ixuke bʼa kʼotele multimillonarioʼik bʼa wa xkʼotye ja bʼa Las Vegas bʼa skʼulajel apostar. Ayni yiʼoje jitsan takʼin, pe mini gusto ayuke wa x-ilxiye. Ja smeranili ja keʼn cha mini gustoʼayukon. Pes yajni wa xkʼulan ganar mas takʼin, mastoni estresado wa xkabʼ wala ajyiyon sok mi xbʼobʼ wajkon. Kʼe jobʼ jbʼaj ta sbʼejtoni ajyel sakʼan. Mixani gusto ayukon ja bʼa jsakʼanili, sok wa xjuljkʼujol ke kala yabʼ ja Dyosi sok jkʼanayi bʼa a-skoltayon bʼa oj jtaʼ ja meran gustoʼili.

 Ja bʼa tyempo jaw, chabʼe ja bʼa kermanaʼiki ochyeta testigo bʼa Jyoba sok tixa aye bʼa Las Vegas. Ja keʼn mini xkʼan jkʼumuk ja sjuʼuneʼi, pe jkʼana oj kʼumuksoke ja jBibliaʼi. Ja keʼn cha wani xkʼuman jtuchʼil. Ja bʼa jBibliaʼi, chakni ay ja jastik yala ja kajwaltik Jesukristo. Yuja yeʼnle wa snaʼawe ke jelni xkisa ja Jesús, jani waj skʼujole bʼa oj yal-e kab’ ja jasun yalaʼi.

 Jkʼuman jitsan jastik junuk bʼa chamto kila. Jun sjejel, bʼa jun ekʼele ja Jesús yala: «Yajni xa wawexyi orasyon, mok bʼulbʼunanik jastal ja matik mi skʼuʼane Dyosi, bʼa wa spensaraʼane ke yuj yajel makunuk jitsan yaljelik ojni maklajuke» (Mateo 6:7, The New American Bible [NAB]). Bʼajtanto, jun sacerdote yaki jun yal imajen bʼa Jesús sok yalakabʼ ke ta jkʼulan rezar 10 ekʼele ja padre nuestro sok 10 ekʼele ja avemarías, ja Dyosi ojni yaki yibʼanal ja takʼin oj kʼanyiʼi. Pe skʼulajel rezar junxta jitsan ekʼele ja jastik jaw sok spensarajel ja jas yala ja Jesús ke mi xbʼobʼ jkʼuluktik, ¿mi maʼ kʼotelukni bʼulbʼunel ja jaw? Cha jkʼuman ja yaljelik it bʼa Jesús: «Moka walwexyabʼ pagre mini june ja bʼa luʼumi, yujni kechan june jawa Pagreʼexi, sok tey bʼa satkʼinal» (Mateo 23:9, NAB). Ja yuj jobʼo jbʼaj: «¿Jas yuj ja katolikoʼiki wa xkalatikonyabʼ pagre ja sacerdote?».

 Ja tixani kan jpensaraʼuk lek ja jas wanon skʼulajel soka jsakʼanili, ja yajni jkʼuman ja karta bʼa Santiago. Ja bʼa kapitulo 4, bersículo 4, ja Santiago stsʼijbʼan: «¿Mi maʼ xa naʼawex ke syajtajel ja luʼumkʼinali jani skontraʼajel ja Dyosi? Ja yujil, ja maʼ wa syajtay ja luʼumkʼinali jani wan skontraʼajel ja Dyosi» (Santiago 4:4, NAB). Sok masni chamto kila ja jas wa xyala ja bersikulo 17: «Yujni ja maʼ wa snaʼa ja jas tʼilan oj skʼuluki sok mi skʼulan wani koʼel bʼa jun mulal». Ja yuj jpaya ja chabʼ kermanaʼiki bʼa oj kalyabʼye ke ojni kakan ja kaʼteli, pes mixani xkʼana oj ajyukon ja bʼa luʼumkʼinali jaw bʼutʼel ilkʼujoli sok bʼa skʼulajel apostar.

 Wani xkʼana oj ajyukon mas mojan soka Dyosi sok oj kil jbʼajsok mas lek ja jnantati soka kermanoʼiki, pe wani skʼana tyempo, ja yuj kala oj jtukbʼes jujuntik jasunuk. Ama mini pasiluk waji, tʼilani kaʼakan skʼulajel jujuntik jasunuk. Jun sjejel, mixani jkʼana ja jastal yalawe oj yawe kʼeʼuk ja jtsʼakol ja hotelik soka kasinoʼik. ¡Asta yalawekabʼ ojbʼi stupone oxe ekʼele mas ja jastal wa stupuwone ajyi! Pe yajni kayi orasyon ja Jyoba, kala ke jastik jaw mixani jbʼajuk keʼna. Kaʼakan ja aʼteli, jtojbʼes ja snaj ja skarro ja jnani sok tixa wajyon tiw. Cha kʼe jtulyi jun yal jnegosyo, bʼa spotsjel ja listaʼik bʼa waʼel wa xyaʼawe ja restauranteʼik.

 Ja Biblia skoltayon b’a oj tsaʼ lek ja jas oj kʼuluki, pe ja keʼn mini xkʼan wajkon ajyi ja bʼa reunionik bʼa testigoʼik bʼa Jyoba. Bʼa jun ekʼele, ja kermanaʼiki sjobʼoweki ta ay jas mi lek xkila sbʼaja Testigoʼiki, jaxa keʼn jakʼayi: «Pes jawa Dyosexi, ja Jyoba, wani spila ja pamilyaʼiki. Ja keʼn kechani wa xkʼana oj ekuj tyempo soka jpamilya ja bʼa Navidad sok ja bʼa cumpleañoʼik... ¡sok ja weʼnlexi mini xa kʼintayex ja jaw!». June ja kermanaʼiki kʼe okʼuk sok yala kabʼi: «¿Bʼa wala ajyi ekʼ snajtil ja jabʼili? Ja keʼntikoni tolabida gustoxta wa xmajlayatikon, pe ja weʼn kechan waxa kʼana oja wilotikon ja bʼa kʼiniki, sok obligadoni». Ja yaljelik jaw kʼot man jkʼujol, sok och okonsok.

 Kʼotni kil ke ja Testigoʼiki wani syajtaye ja spamilyaʼe sok wa xcham skʼujole, ja yuj kalani oj wajkon ja bʼa reunionik ja bʼa Naʼitsik bʼa Tsomjelal. Ti jnaʼa sbʼaj ja Kevin, jun maestro bʼa Biblia bʼa ayxani yiʼoj lek snajelil, sok kʼe yaki estudio.

 Ja Kevin soka xcheʼumi stsaʼawe yijel jun sakʼanile mi jel chaʼanyabʼaluk, pes yalawe ojni spil-e lek tyempo bʼa skoltajel ja tuk bʼa oj snebʼe bʼa Biblia. Cha skʼujolane ja janekʼ wa xbʼobʼ yujileʼi bʼa oj stsome takʼin bʼa oj wajuke bʼa África sok bʼa Centroamérica, sok koltaniye bʼa yajel kʼeʼuk betelik. Wegoni wa x-ilxi ke wa syajta sbʼaje sok jel gustoʼaye. ¡Sok ja keʼn jachni wa xkʼana oj ajyuk ja jsakʼanili!

 Jun kʼakʼu, ja Kevin sjeʼaki jun bideo bʼa wa x-ilxi jastal jel gustoʼaye ja misioneroʼiki, sok ja keʼn kala jani jaw ja jasa wa xkʼana oj kʼuluk soka jsakʼanili. Ja yuj, ja bʼa 1995, tsaʼan yajni wakexa ixaw wanon skʼulajel estudiar ja Biblia, kiʼaj jaʼ. Sok jachuk, kʼotyon testigoʼil bʼa Jyoba. Mixani xkʼanayi ja Dyos bʼa aya kʼotkon rikoʼil. Ja wego wa xkʼanayi: «Moka waki pobreʼil mini rikoʼil». (Proverbios 30:8).

 Ja wego rikoʼonxa... mi sok takʼinuk, jani ja jastal wa xkila jbʼaj soka Jyoba. Soka jcheʼumi, ja Nuria, bʼa ti jnaʼa sbʼaj bʼa Honduras, aʼtelotikon misioneroʼil ja bʼa Panamá sok bʼa México. Kilunej jastal kʼotel smeranil ja yaljelik it bʼa Biblia: «Ja slekilal wa xyaʼa ja Jyoba jani ja jaw wa xyaʼa rikesaʼili, sok mi xyiʼajan wokol soka jaw» (Proverbios 10:22).