Pojkiyon bʼa San Juan Chancalaíto, jun chʼin lugar wa xtax ja bʼa Chiapas (México). Ja jpamilya jun kʼole bʼa ja yintil ja maya bʼa kʼumal chol. Ja jnantati ajyi 12 yuntikile, sok keʼnani ja bʼa sjoʼili. Yajni chʼinonto, ja jmoj-alijeliki soka keʼn wanxani xpaklaytikon ja Biblia soka Taʼumantiʼik. Pe tristeni yabʼjel, ja keʼn mini jkisa ja rasonik bʼa Biblia.

 Yajni ay kiʼoj 13 jabʼil, wanxani xkabʼ droga sok wala elkʼaniyon. Yajni ayto kiʼoj ja jabʼil jawi kaʼakan ja jnaji sok wajyon ekʼ bandido bʼa tuktukil lugar. Jaxa yajni ay kiʼoj 16 jabʼil, kʼe aʼtijukon bʼa jun alaj wa stsʼunuwe marihuana. Bʼa jun akwal, yajni ojxa el jun jabʼil wanon aʼtel ja tiw, jujuntik winik bʼa pilan kʼole bʼa chapane sok yarmaʼe och stujkʼayotikon ja yajni wajumotikon bʼa jun kanoga bʼa kiʼojtikon jitsan marihuana. Bʼa mi oj syam-on ja tiroʼiki, jipa jbʼaj bʼa yoj jaʼ sok jmuku jbʼaj jun rato lek man yibʼel. Tsaʼan, jpaka ajnel bʼa Estados Unidos.

 Yajni tixa ayon tiw, mini kaʼakan yajel ekʼ drogaʼik sok bʼa xchʼikjel jbʼaj bʼa wokolik. Yajni ay kiʼoj 19 jabʼil, yamjiyon sok aji ochkon preso yuja wala elkʼaniyon sok yuja jleʼa modo jmilwanukon. Ja bʼa preso ochyon bʼa jun banda sok mini kaʼakan xchʼikjel jbʼaj bʼa tiroʼanel. Yuja jaw, ja matik ay xchole sjekawone bʼa jun preso bʼa talnanubʼal lek bʼa Lewisburg (Pensilvania).

 Ja bʼa preso bʼa Lewisburg, ja jmodo kʼe ipaxuk el mas. Yuja ayxa kiʼoj tatuaje bʼa jun banda, masni pasil kabʼ ochyonsoke ja bʼa banda jaw ja bʼa preso. Mastoni kalax paxyon el sok mini kaʼakan ja xchʼikjel jbʼaj wokol. Bʼa jun ekʼele, jchʼika jbʼaj tiroʼanel sok bandaʼik ja bʼa spatyo ja preso, bʼa katikon makunuk teʼik wa xyawe makunuk bʼa beisbol soka jastik wa xyawe makunuk ja bʼa gimnasio. Jelni kistal waji. Ja matik wa stalnay ja presoʼiki yilaweni stʼilanil oj yawe makunuk ja gas lacrimógeno (jun tikʼe gas wa xya yajbʼuk ja jsatik sok wa xya wokolulanukotik bʼa yijel ikʼ) bʼa oj kʼotkotikon tekʼan. Tsaʼan, ja matik ay xchole ja bʼa preso xchʼikawone bʼa jun kwarto bʼa jani ti wa x-ajiye ja presoʼanumik bʼa jel xiwela sbʼajeʼi. Jelni wego wala kalaxbʼiyon sok wala kʼumaniyon bʼa jun modo mi la kiswaniyon. Wala tiroʼaniyon yuj chikan jasunuk. Ja jaw jelni wa xkabʼ stsamalil. Sok mini tʼusan wa xnaʼa malaya yuja jach kʼotelon.

 Ja bʼa kwarto jaw jel chapani, tini wala ajyiyon lutan tʼusan mi spetsaniluk ja kʼakʼu. Ja yuj kʼe jkʼumuk ja Biblia bʼa mi jel oj axwukon. Mas tsaʼan, jun talnanum ixuk yaki ja libro Usted puede vivir para siempre en el paraíso en la Tierra. a Yajni mas wanon skʼumajel ja juʼun it bʼa wa skoltayon spaklajel ja Biblia, och juljkʼujol ja jasa jnebʼa soka Taʼumantiʼik ja yajni chʼinonto. Jpensaraʼan ja jastik jkʼulunej yuja jel kistal ja jmodo. Cha jpensaraʼan sbʼaja jpamilya. Yuja chabʼ jmoj-alijel ixuk ochye Taʼumantiʼ jpensaraʼan: «Ja yeʼnle ojni ajyuke sakʼan bʼa tolabida». Anto ti jobʼo jbʼaj: «¿Jas yuj ja keʼn miyuk?». Ja bʼa jutsʼin jaw tini jpensaraʼan oj tukbʼes ja jmodo.

 Wani xnaʼa wa xkʼana ay maʼ oj skoltayon bʼa oj tukbʼukon. Ja yuj ja jasa bʼajtan jkʼulani ja yajel orasyon sok spatjelyi skʼujol ja Jyoba bʼa oj skoltayon. Tsaʼan, jtsʼijbʼan yi jun karta ja naʼits Betel ja bʼa Taʼumantiʼik bʼa Estados Unidos bʼa skʼanjel ayaweki jun estudio bʼa Biblia. Ja Naʼits Betel skʼanayi jun kongregasyon mojan bʼa ojak yil-one. Ja bʼa tyempo jaw, kechani wa xkʼanji ajak yil-one ja jpamilya. Ja yuj, ja bʼa kongregasyon jaw jun Taʼumantiʼ och sjeki kartaʼik bʼa jel stsatsankʼujolani sok juʼunik bʼa yajel tsatsbʼuk ja kʼankʼunel bʼa oj tukbʼukon.

 Cha jkʼulan jun jasunuk jel tʼilan ja yajni kala oj kakan ja banda bʼa ajyelon jitsan jabʼil. Ja olomal ja bʼa banda tini cha ajyi ja bʼa junxta preso jel chapan bʼa tini ajyiyon, ja yuj waj ta loʼil ja yajni libre aytikoni sok kalayabʼ wa xkʼana oj ochkon taʼumantiʼ bʼa Jyoba. Jelni cham kabʼi ja yajni yalakabʼi: «Ta yuj meran ja jasa waxa wala, kʼulan. Mi xkʼana oj jchʼik jbʼaj ja bʼa jastik sbʼa Dyosi. Pe ta jaʼita waxa kʼana oja wakan ja banda, wanxa xa naʼa jas oj ekabʼaj».

 Ja yajni ekʼ chabʼ jabʼili, ja talnanumik bʼa preso yilawe wan tukbʼel ja jmodo. Ja yuj, wanxani snaʼawe jyajulal. Jun sjejel, mixani wa smochowe ja jkʼabʼ ja yajni wa xwaj atnukon. June ja bʼa talnanumi mojxi jmok sok yalakabʼ mok kakan stukbʼesel ja jmodo. Mi kechanuk, ja matik ay xcholi sjekawone bʼa jun preso mi jel talnubʼaluk, sok tini tiw tsʼikwi ja tsaʼanxta jabʼil ajyiyon bʼa preso. Ja bʼa 2004, tsaʼan ja yajni el lajune jabʼil ajyiyon bʼa preso, aji elkon sok waj ajukonkan man México sok jun autobús ja bʼa preso.

 Yajni ekʼ tʼusan tyempo teyon bʼa México, jtaʼa jun Naʼits bʼa Tsomjelal ja bʼa taʼumantiʼik bʼa Jyoba. Ja bʼajtan tsomjelal wajyoni jani kiʼaj ja jkʼu bʼa preso yujni jatani jaw kiʼoj bʼa mas lek skʼeljel. Anima jel tuk jkʼeljel, ja Taʼumantiʼik jelni lek yilawone. Yajni kila jel lek ja smodoʼe, kabʼ teyon soke ja meran kʼuʼumanik Dyos (Juan 13:35). Ja bʼa kʼakʼu jaw, ja ansyanoʼik bʼa kongregasyon sleʼawe june maʼ oj yaki estudio bʼa Biblia. Jun jabʼil tsaʼan, ja 3 bʼa septiembre bʼa 2005, kiʼaj jaʼ jastal taʼumantiʼ bʼa Jyoba.

 Ja enero bʼa 2007, kʼe aʼtijukon bʼa tyempo tsʼikan, wa xkʼan kaltik, 70 ora xcholjel ja bʼa ixaw bʼa sjejelyi ja kristyano ja jastik meran wa sjeʼa ja Biblia. Ja bʼa 2011 jkʼulan jbʼaj graduar ja bʼa Eskwela bʼa Biblia sbʼaja Keremtiki (ja wego sbʼiʼil Eskwela bʼa Cholumanik sbʼaja sGobyerno ja Dyosi). Ja eskwela jaw jel skoltayon bʼa skʼulajel ja cholalik kiʼoj ja bʼa kongregasyon.

 Ja bʼa 2013 nupaniyon soka kala cheʼum, sbʼiʼil Pilar. Yajni wa xcholo yabʼ ja jsakʼanil bʼa tyempo ekʼta, sok jun stsetsunel wa xyalakabʼ bʼa mini tʼun skʼuʼan ta meran jachukon ajyi. Mixani tʼun bʼa jeʼunej ja jmodo jastal ajyi. Ja keʼn soka jcheʼum wa xkʼuʼantikon lek ja jastal kʼotelonxa ja wego juni sjejel ja janekʼto ja yip yiʼoj ja Biblia bʼa oj stukbʼes ja sakʼanil ja kristyano (Romanos 12:2).

 Wa xkabʼ ja yaljelik yala ja Jesús wa xtax bʼa Lucas 19:10 keʼnani wa xkʼot jbʼaj. Ja tiw wa xyala bʼa jani jak sleʼ ‹ja maʼ chʼayeli bʼa oj skoltay›. Mixani xkabʼ chʼayelukon. Mixani wa xkʼulan yi ja tuk bʼa mi lekuk. Stsʼakatal ja Biblia, wanxani xkaʼ makunuk ja jsakʼanil bʼa skʼulajel bʼa lek ja janekʼ wa xbʼobʼkuj. Jelxani lek xkila jbʼaj sok spetsanil ja kristyano sok ja mas tʼilani jani lek wa xkila jbʼaj soka jKʼuluman, ja Jyoba.