Ti pojkiyon bʼa La Ceiba (Honduras). Ja jnantati ajyi joʼe yuntikil: chane yal akʼixuk sok ja keʼn, ja mas chʼini. Kechan keʼna ja mi xkabʼ kʼinal pojkiyoni. Ja jnajtikoni ti ajyi bʼa jun barrio jel xiwela sbʼaj sok jel pobre’otikon. Ja yajni kechanto chane jabʼil kiʼoj. Mastoni jel ipaxiʼel ja yajni cham ja jtat bʼa jun desgrasya bʼa jun aʼtel.

 Ja jnani stalnayotikon ja janekʼ bʼobʼyuji, pe mini tolabidaʼuk ajyiyuj stakʼin bʼa oj sman jkuʼtikon. Sok yuja mey kiʼojtikon jkuʼtikon bʼa pim ay ekʼele jel xkiʼajtikon ja cheʼe, mastoni ja wa xyaʼa jaʼi.

 Kʼe jnebʼ takal ja lenguaje de señas hondureño (LESHO), sok jachuk kʼe jmojtay tuk kristyano bʼa mi xyabʼye kʼinal. Ja jnan sok ja jmoj-alijeliki mi snaʼawe ja lenguaje de señas. Kechanta wa skʼumanone soka sniʼ sateʼi sok jujuntik señaʼik bʼa yeʼntani sleʼuneje ja bʼa naʼitsi. Chomajkil, ja jnani yajxta stalnayon. Soka tʼusan seña wa snaʼa, yala kabʼ sbʼaja jas jel xiwela sbʼaj ja snebʼjel yujel trago ma yabʼjel may. ¡Janekʼto tsʼakatal wa xkayi yuja skoltayon bʼa mi oj jkʼuluk spetsanil ja jastik it!.

 Man jchʼinil ja jnani wa xyiʼajon bʼa misa. Pe mini xkabʼ stojol yujni mi ma wa xbʼobʼ xcholkabʼ ja jas wane yaljeli. Jel xya axwukon, bʼa kaʼakan wajel ja bʼa iglesya ja yajni ayto kiʼoj lajune jabʼil. Pe ama jachuk, ja keʼn wani xkʼana oj jnaʼ mas sbʼaja Dyosi.

 Ja bʼa 1999, yajni ay kiʼoj 23 Jabʼil, jnaʼa sbʼaj jun ixuk bʼa Estados Unidos bʼa tey bʼa Iglesya evangélica. Ja yeʼn sjeʼaki bʼa Biblia sok sjeʼaki ja lenguaje de señas americano. Jel jkʼulan gusto ja jasa jnebʼa, jkʼana oj ochkon pastor. Ja yuj wajyon b’a Puerto Rico b’a oj jkʼul estudiar b’a jun centro religioso b’a wa xchapawe ja matik mi xyabʼye kʼinali. Yajni kumxiyon ja b’a La Ceiba b’a 2002, soka skoltanel jujuntik kamigʼik ka kujlajuk jun Iglesya, bʼa kristyanoʼik mi xyabʼye kʼinal; june ja bʼa yeʼnleʼi tey ja Patricia, ja ma nupaniyon soki.

 Yuja keʼnon ja pastor bʼa iglesya, wa xkayi ja jloʼil bʼa LESHO sok wa xjeʼa dibujoʼik bʼa jujuntik loʼil elel bʼa Biblia, ma wa xjeʼa sjejelik bʼa oj bʼobʼ yabʼye stojol ja kristyano matik mi xyabʼ kʼinali. Cha wa xkoltay sok ja swokole sok stsatsankʼujolajele ja kristyano matik mi xyabʼye kʼinal bʼa ti sbʼaje bʼa chonabʼik mojan. Sok jkʼulan biajar jastal misionero bʼa Estados Unidos sok Zambia. Pe ja smeranili, jel tʼusan xnaʼa ja bʼa Biblia; ja ita wa xkala ja jas alubʼal kabʼi ma ja jas kabʼunej stojoli ja bʼa dibujoʼiki. Ja smeranili jel kiʼoj jitsan sjobʼjelik sok tʼusan sjakʼjelik.

 Bʼa jun ekʼele, jujuntik ixuke ja bʼa kiglesya ke yale abʼalik bʼa keʼna. Yalawe jun bʼi yakbʼumon sok wanon bʼi slejelyi slokʼol ja xcheʼumi. ¡Ja jaw jelni yaj kabʼi! Mas tsaʼan, ja keʼn soka ja Patricia kaʼatikon kan ja Iglesya.

 Ja ke’n sok ja Patricia jitsan ekʼele wa yulatanunejotik ja Ta’umantiʼik b’a Jyoba pe mi xkisatikon. Tsaʼan yajni kakan wajel ja b’a Iglesya, ja Patricia skʼana oj ajukyi estudio b’a Biblia yuja Thomas soka Liccy, jun nupanum Taʼumantiʼ. Jelni chamkabʼ yuja anima wa xyabʼye kʼinal pe wa snaʼawe lenguaje de señas. Ja yuj tʼusan tsaʼan ochyon sok ja Patricia sok k’e kʼulsoke estudiar

 B’a jujuntik ixaw jkʼulantikon estudiar ja Biblia yajel makunuk bideoʼik b’a lenguaje de señas americano. Pe jujuntik kamigatikon b’a sleʼawe smul ja Taʼumantiʼik b’a Jyoba b’a yalawe jawa snochowe ja pensarik yiʼoje ja ma’ olomal yujileʼi sok yuja jaw katikonkan skʼulajel estudiar. Anima ja Thomas yala kʼabʼ ja Taʼumantiʼik mini ayiʼoje jun olomal pe mini jkʼuʼan.

 Jujuntik ixawik mas tsaʼan ja Patricia ekʼyuj jun chamel sbʼiʼil (depresión) bʼa jel tsats x-ajiyi sok skʼanayi ja Dyos cha akumxuke ulatanel ja Taʼumantiʼiki. Tʼusan tsaʼan, jun jbesinatikon Taʼumantiʼ jak bʼa jnajtikon sok kanye bʼa oj yalyabʼ ja Liccy akumxuk yulatajel ja Patricia. Ja Liccy juni lekil amiga, jakyil kada semana bʼa oj stsatsankʼujoluk sok snochjel sjejelyi bʼa Biblia. Pe ja keʼn mitoni xjipa jkʼujol ja Taʼumantiʼiki.

 Ja bʼa 2012, ja Taʼumantiʼik bʼa Jyoba skʼulane jun campaña jel chaʼanyabʼal bʼa sjejel ja bideo ¿Wan maʼ xa kʼana oj anaʼ ja smeranili? b’a lenguaje de señas hondureño. Ja Liccy sjeʼakitikon ja bideo pe yajni kila mini xbʼobʼ jkʼuʼuk: yujni jitsan ja bʼa skʼuʼajelik wa xjeʼayile ja kristyano jastal ja inpierno ma jaʼ ay jas wa xkan sakʼan ja yajni wala chamtiki mini tiʼuk wa xtax bʼa Biblia.

 Bʼa pilan semana wajyon ja bʼa Naʼits bʼa Tsomjelal bʼa loʼilanel sok ja Thomas. Kalayabʼ wa xkʼana oj jeyile ja smeranil bʼa Biblia ja kristyanoʼik mi xyabʼye kʼinali, pe mi oj ochkon Taʼumantiʼ bʼa Jyoba. Ja jas wa xkʼana jani oj jkʼul jun yajkʼachil Iglesya b’a matik mi xyabʼye kʼinal. Ja Thomas bʼajtan yalakabʼ jel lek ja jas wa xkana oj jkʼuluki sok ja gustoʼil kiʼoji sok ti sjeʼakil ja Efesios 4:5, b’a wa xyala ja kʼuʼumanik Dyos tʼilan tsoman oj ajyuke.

 Chomajkil ja Thomas yaki ja bideo bʼa lenguaje de señas americano. Los testigos de Jehová: una historia de fe viva. Parte 1: Salen de la oscuridad. Ja bideo wa xcholo jastal jun tsome winike bʼa spaklaye jan kʼujolek ja skʼuʼajelik elel bʼa Biblia. Yajni wanon skʼeljel ja bideo, kabʼ jachukon jastale ja winike jaw, pes yujni cha wanon slejel ja smeranili. Ja bideo ya jkʼuʼuk lek ja Taʼumantiʼik bʼa Jyoba wa sjeʼawe ja smeranili, yujni ja jas wa skʼuʼaneʼi tini wa xyawe el bʼa Biblia. Anto kʼe ki estudio bʼa Biblia sok jaxa bʼa 2014 kiʼajtikon jaʼ soka Patricia jachuk ochtikon Taʼumantiʼ.

 Jel xkiʼaj gusto ja kongregasyon Taʼumantiʼ bʼa Jyoba yujni wa snochowe ja rasonik wa syaʼa ja Biblia. Jelni lek skʼeljel ja jastal jel lek xyiʼa sbʼajeʼi sok ja jastal tsamalxta wa skʼumane ja tuki. Ja Taʼumantiʼik bʼa Jyoba kristyanoʼik bʼa ay lamanil yujile sok wani skoltay sbʼaje. Yibʼanale tsoman aye, junxta ja jas wa xcholoweʼi, junxta sjejelik bʼa Biblia chikani bʼa kulanej ma jas kʼumal yiʼoje.

 Jelni xkiʼaj gusto oj jnebʼ ja jas wa sjeʼa ja Biblia. Jun sjejel, jnebʼunej ja Jyoba ja Dyos ja maʼ jel Juntiro ja yipi sok yeʼnani Rey bʼa yibʼanal ja Luʼumi. Ja Yeʼn wa syajtay ja kristyanoʼik bʼa mi xyabʼye kʼinali, cha jachuk ja matik wa xyabʼye kʼinali. Snajel ja Jyoba jel syajtayon ja yuj jelni tʼilan bʼa keʼna. Cha jnebʼunejni ja Luʼumi ojxtani kʼot ajyuk jun tsamal kʼachinubʼ sok oj kabʼtik stsamalil bʼa jun sakʼanil mixa ay chamel sok bʼa tolabida. ¡Jelxani xkʼana oj kʼotuk ja kʼakʼu jaw!

 Ja Patricia sok ja ke’n jel xkabʼtikon stsamalil loʼilanel jastik b’a Dyos sok ja kristyanoʼik bʼa mi xyabʼye kʼinali. Ja wego wanxani xkatikon yi estudio jujuntik kristyano b’a teye ja b’a iglesya ajyitikoni. Sok wanxani xkʼuʼan lek ja jasa oj jeʼi, mixani jachuk ja jastal wa xpensaran yajni pastor ayiyoni. Ja wego jtaʼata sjakʼulabʼil ja sjobʼjelik kiʼoji, jtaʼa yajni ke jkʼul estudiar sok ja Taʼumantiʼ bʼa Jyoba.