Jitsan kristyanoʼik wa xwajye paxyal ja bʼa kaskadaʼik jel naʼubʼal sbʼaj mojan ja bʼa chonabʼ Pagsanján (Filipinas). Ti kʼi bʼa lugar jaw ja jtati, sbʼiʼil Leonardo Lerón. Ja tiw jel ja pobreʼili. Yiljel jastal jel xchono sbʼaje bʼa mi sbʼejuk ja gobyerno, ja policía sok ja bʼa yaʼteli och snol koraja sok tolabida tajkelxta ay.

 Ja jnantati jelni x-aʼtijiye bʼa yajel kʼiʼuk ja waxake yuntikile. Tikʼanxtani wa xwajye jitsan kʼakʼu aʼtel ja bʼa alajik tey bʼa witsaltik. Jitsan ekʼele, ja keʼn soka jbʼankil Rodelio wa xtalnaytikon ja yal kijtsʼintikoni, sok tikʼanxta wa xtekʼatikon waʼin. Ama yal untikotikon, mini ajyi lek tyempo bʼa tajnel. Yajni jtaʼatikon ja juke jabʼil, wanxani la wajtikon ja bʼa alaji. Wa xkuchutikon alal kargaʼik bʼa coco bʼa chaʼanik wits. Ta mi xkʼe kujtikon, wala tʼenjitikon bʼa oj kichtikon.

 Wani xtekʼatikon ja wa smakʼawotikon ja jtatikoni, pe ja mas pyero jani yiljel jastal wa smakʼa ja jnani. Wani xleʼatikon modo skomjel, pe mini xbʼobʼkujtikon. Ja keʼn soka Rodelio jchapatikon nakʼul bʼa oj jmiltikon ja jtat yajni la kʼitikoni. ¡Jelni jkʼana oj ajyuk jun jtat bʼa oj syajtayotikon!

 Jelni ya jom kolom sok ya tajkukon ja smodo jel malo ja jtati, ja yuj elyon ja bʼa naʼits ja yajni ay kiʼoj 14 jabʼili. Tini ajyiyon ekʼ jun tyempo bʼa calle sok kʼe kabʼ marihuana. Tsaʼan, och aʼtijukon bʼa syamjel jun lancha bʼa yijel ja paxyalanumik man bʼa kaskadaʼik.

 Ekʼ jujuntik jabʼil, ochyon bʼa universidad bʼa chonabʼ Manila. Pe yuja tʼilan wa xwaj aʼtijukon ja chʼakum semana man bʼa Pagsanján, mixani xkankuj lek tyempo bʼa skʼulajel estudiar. Mini ay stojolil ja jsakʼanili jaxa marihuana mixa xya lamxuk ja jcham kʼujoli. Kʼe kabʼ mas drogaʼik wa sbʼiʼilan metanfetamina, cocaína sok heroína. Ja drogaʼiki ya kiʼ jun kuxil jsakʼanil. Ja bʼa joyanali bʼutʼel pobreʼil, jastik bʼa mi stojoluk sok wokolik. Jelni xkilkʼujolan ja gobyerno sok yeʼn wa xkaʼ smuluk. Wa xjobʼoyi ja Dyosi: «¿Jas yuj jachuk ja jsakʼaniltiki?». Pe mini jun relijyon yaki sjakʼjel. Kʼe kabʼ mas drogaʼik bʼa yajel lamxuk ja jcham kʼujoliki.

 Ja bʼa 1972, ja eskwelanteʼik bʼa Filipinas xchapawe oj waj yaweyi welga ja gobyerno. Cha wajyon ja keʼni, pe chʼakan sok tiroʼanel. Jelni jitsan lutjiye, sok jujuntik ixaw tsaʼan yawe kujlajuk jun ley bʼa oj ajyuk laman ja paisi.

 Cha kumxiyon ja bʼa calle, pe wani la xiwyon ay jas oj skʼulki ja matik ay xcholi yuja wajyon ja bʼa welga. Bʼa smanjel mas drogaʼik, kʼe elkʼanukon sok kʼe jchon jbʼaj bʼa wayelsok kristyanoʼik bʼa riko sok bʼa tuk paisik. Mini xcham jkʼujol ta ay jas oj ekʼ jbʼaj.

 Jaxa bʼa tyempo jawi, ja jnani sok june ja yal kijtsʼini kʼe spaklaye ja Biblia soka taʼumantiʼik bʼa Jyoba. Ja jtati jelni tajki sok stsika ja juʼunik bʼa Biblia yiʼojeʼi. Pe ja yeʼnleʼi kuchniyujile sok ochye Taʼumantiʼik.

 Jun kʼakʼu, ja jtati taji loʼil yuj jun Taʼumantiʼ sok aljiyabʼ ja Biblia wa skʼapa ja bʼa tyempo jakumi bʼa yibʼanal ja luʼumi oj kʼulaxuk ja bʼa jas toji (Salmo 72:12-14). Ja skʼapjelal it jelni yiʼaj gusto ja jtati sok kʼe spaklay ja jas wa sjeʼa ja Biblia. Mi kechan snebʼa oj ajyuk jun gobyerno bʼa toj, cha snebʼani jasa wa smajlay ja Dyos sbʼa jun tatamal sok jun tatal (Efesios 5:28; 6:4). Tʼusan tsaʼan, ja yeʼn soka tuk jmoj-alijeliki ochye Taʼumantiʼik. Yuja najat ayoni, mini tʼun kabʼ yabʼalil.

 Ja bʼa 1978 wajyon kulan bʼa Australia. Mini jtaʼa lamanil ja bʼa país it bʼa jel riko sok jel laman. Mini kaʼakan ja yujeli sok ja yabʼjel drogaʼik. Tsaʼan, ja bʼa jabʼil jaw, ja taʼumantiʼik bʼa Jyoba yulatayone. Jelni kiʼaj gusto yajni sjeʼaweki ja jas wa xyala ja Biblia bʼa oj ajyuk jun luʼumkʼinal laman, pe wokolni kabʼ sjipjel jkʼujol bʼa yeʼnle.

 Tʼusan tyempo tsaʼan, wajyon jujuntik semana bʼa Filipinas. Ja jmoj-alijeliki yalawe kabʼ ja jtatikoni wan skʼujolajel bʼa kʼotel jun lekil winik, pe ja keʼn jelni jnolunejyi koraja sok mi jkʼana oj kile.

 Ja kijtsʼin ixuk mas chʼinto xcholo kabʼ soka Biblia jas yuj bʼutʼel wokol sok jastik mi tojuk ja bʼa luʼumi. Jelni cham kila yuj jun yal akʼix wanxa snaʼa ja sjakʼjel ja sjobʼjelik wa xkaʼa jbʼaji. Bʼajtanto oj kumxukon, ja jtati yaki ja libro Usted puede vivir para siempre en el paraíso en la Tierra. a Yalakabʼi: «Mokxa aleʼ mas sok aʼaxakan ja vicioʼiki. Ja libro it oj skoltaya bʼa oja taʼ ja jas wana slejeli». Yalakabʼ oj jleʼ ja taʼumantiʼik bʼa Jyoba yajni la kʼotyon ja bʼa Australia.

 Jkʼuʼan ja jas yala ja jtati sok jtaʼa jun Naʼits bʼa Tsomjelal yiʼoj ja Taʼumantiʼiki mojan bʼa jnaj, bʼa Brisbane. Jkʼana jun estudio bʼa Biblia. Ja bʼa jas yalunejkan ja Biblia, jastal ja bʼa kapitulo 7 bʼa Daniel sok ja bʼa kapitulo 9 bʼa Isaías, jnebʼa ja sGobyerno ja Dyosi, bʼa wani skʼulan ja bʼa jas leki, ojni yaʼotik mandar ja bʼa tyempo jakumi. Cha jnebʼa ojxta pax jun kʼachinubʼ ja Luʼumi. Wani xkʼana lek oj yilon ja Dyosi, pe wani xnaʼa tʼilan oj jnaʼ skomjel ja jastal ayon xkabʼi sok yajelkan yabʼjel droga, ja yujel sok ja xchonjel jbʼaj wayel soka kristyanoʼiki. Kaʼakan ja ixuk maʼ lajan ayonsok ajyi sok kaʼakan ja vicioʼiki. Yajni mas wanon sjipjel jkʼujol bʼa Jyoba, wani xkʼanayi a-skoltayon bʼa oj tojbʼuk mas ja jsakʼanili.

 Takal takal kabʼ stojol ja jas wanon snebʼjeli ojni bʼobʼ ya tojbʼuk ja jsakʼanili. Ja Biblia wa xyala ta wa xkʼujolantik ojni bʼobʼ katikan ja «viejo jmodotiqui» (Colosenses 3:9, 10). Yajni wanon skʼujolajel bʼa oj lajxukuj, kʼotni jnaʼ merani lek ja jas yaluneje kabʼ ja jmoj-alijelik sbʼaja jastal wan stukbʼesel ja smodo ja jtati. Wanxani xkʼana oj kaʼ kulan soka jtati sok mixa oj jnolyi koraja sok mixa yiljel jastal jun jkontra. Mani kaʼa perdon sok kaʼ eluk yibʼanal ja ilkʼujolanel jnolunej man jchʼinili.

 Yajni keremonto, jani wa xnochoyi ja smodoʼe jel pyero ja tuki. Ja jas ekʼ jbʼaji kila merani lek ja jas wa xyala ja Biblia, pes yujni smojtajele yiʼajon bʼa jchʼayelal (1 Corintios 15:33). Pe jtaʼa lekil kamigoʼik ja bʼa taʼumantiʼik bʼa Jyoba bʼa skoltayone kʼotel jun lekil winik. Tini jnaʼa sbʼaj ja kala cheʼumi, sbʼiʼil Loretta. Lajan wa xjeʼatikonyi ja kristyanoʼik bʼa wani xbʼobʼ koltajuke yuja Biblia.

 Stsʼakatal ja Biblia, ja jtati kʼotni jun lekil tatamal sok jun yaʼtijum Dyos bʼa chʼin wa xyaʼa sbʼaj sok jel laman. Mini tʼun jpensaraʼan jach oj kʼotuk ja jtati. Yajni kila jbʼajtikon ja yajni chʼak kiʼ jaʼ jastal taʼumantiʼ bʼa Jyoba ja bʼa 1987, ja jtati stelawon sbʼajtanil ekʼele ja bʼa jsakʼanili.

 Mas ja 35 jabʼil, ja jnan soka jtati xcholowe ja smajlajel wa xyaʼa ja Biblia. Ja yeʼn kʼotni jun winik jel x-aʼtiji sok jel lek smodo, sok jel naji sbʼaj yuja skoltay ja tuki. Yajni ekʼ ja tyempo kʼot jyajtay sok kʼot jkise. Jelni gusto ayon yuja yuninoni. Ja jtati cham bʼa jabʼil 2016, pe jeltoni xnaʼa sok wa xjul jkʼujol jchawaniltikon jtukbʼestikon ja jmodotikon ja yajni katikon makunuk ja rasonik bʼa Biblia. Mixani xkabʼ jnolunej tajkelal. Jelni xkaʼa tsʼakatal yuja jnaʼa sbʼaj ja jtatik Jyoba, bʼa wa skʼapa oj xchʼaysnajel ja wokolik wa xyiʼaje ja pamilyaʼiki.