Ti pojkiyon bʼa chonabʼ bʼa Calgary, Alberta (Canadá). Yajni chʼinonto, ja jnantati skʼutsu ja snupaneleʼi, tixa wajtikon bʼa snaje jtatawelo soka jnani. Jelni skʼanawotikone, sok ja smeranili jelni gusto ajyiyon; ayni lamanil. Jelni xyaki gusto jawa xjuljkʼujol ja jaw.

 Yajni ay kiʼoj juke jabʼil, tukbʼi el ja jsakʼanili. Ja jnani cha nupani sok ja jtati, sok tixa wajtikon bʼa San Luis, Misuri (Estados Unidos). Wegoni kila ke ja jtati jelni malo. Bʼa jun ekʼele, yajni chʼak ja bʼajtan kʼakʼu ja bʼa yajkʼachil keskuela sok kumxiyon bʼa naʼits, ja yeʼn kʼot yil ke tuk yal untik smakʼawone sok ja keʼn mini jkoltay jbʼaj. Lajansok jun kʼakʼal chan waji, mastoni tsats smakʼawon ja ye’n ke yuja yal untik smakʼawoneʼi. Ti «jnaʼa» ke mini lekuk ja jas jkʼulani sok man tyempo jaw kʼe tiroʼanukon.

 Yuja jel tuk smodo ja jtati, wani xya tajkuk ja jnani sok jitsan ekʼele yuta sbʼaje sok wa xkʼeye tiro. Kʼe kabʼ droga sok kʼe kuʼ trago ja yajni ayto kiʼoj 11 jabʼil. Mastoni jel kʼakʼon sok tolabida wa xchʼika jbʼaj bʼa tiroʼik ja bʼa kaye. Yajni elyonkan ja bʼa secundaria, yatani paxkon pilan kristyanoʼil ja spekʼjel chikʼi.

 Yajni ayxa kiʼoj 18 jabʼil, jchapa jbʼaj bʼa oj ochkon bʼa Infantería bʼa Marina bʼa Estados Unidos. Ja keʼn jelxani jgusto ja spekʼjel chikʼi, pe ja tiw jnebʼa milwanel. Joʼe jabʼil tsaʼan, kaʼakan ja soldadoʼili bʼa oj kʼul estudiar Psicología, pes wani xkʼana oj aʼtijukon bʼa FBI. Kʼe jtulyi ja jkarrera bʼa Estados Unidos sok tsaʼan jnocho skʼulajel estudiar bʼa Canadá.

 Ja universidad yani elkan jgana. Lajansok yibʼanal ja kristyanoʼiki kechani yeʼn wa spensaraʼan sbʼaje. Kabʼ ke mini jas xmakuni sok ja wokolik bʼa luʼumkʼinali mixani xbʼobʼ tojbʼuk. Mixani xkʼuʼan ta ayto maʼ oj bʼobʼ stojbʼes ja jastik junuki.

 Yajni kila ke mey jun stojolil ja sakʼanili, jel kʼe kabʼ droga sok kʼe kuʼ trago, sok kechani wa xpensaraʼan sbʼaja takʼini sok ja stajel ixuke. Wani la wajyon bʼa tuktukil kʼin sok tuktukil ixuk wala ajyiyonsok. Yuja ayni kiʼoj chapjelal jastal soldadoʼil wa xkabʼ mini ma’ xbʼobʼ skʼulukon ganar, tolanibida wanonxta tiroʼanel. Ta kila ay ma’ wa xkʼan yixtalaʼuk ja tuki, keʼnani wa xkʼana oj kʼuluk ja bʼa stojolil sok wala tiroʼaniyonsok. Ja smeranili, kʼotni ajyukon mosoʼil sbʼaja spekʼjel chikʼi.

 Jun kʼakʼu, jun kamigo soka keʼn och kabʼtikon aʼay lek droga. Ja bʼa sótanoʼil ja naʼitsi wantikon xchapjel jun paquete bʼa marihuana bʼa oj jchontikon nakʼul, ja kamigo sjobʼoki ta wa xkʼuʼan b’a Dyosi. Sok kalayabʼ: «Ta ja luʼumkʼinal it wan yijel wokol yuj smul ja Dyos, ¡mini xkʼana jas oj naʼ bʼa yeʼna!». Ja sbʼajtanil kʼakʼu ja bʼa yajkʼachil kaʼteli, jun jmoj aʼtel ke testigo bʼa Jyoba sjobʼoki: «¿Wan maʼ xa kʼuʼan ke yeʼn smul ja Dyos ja wokolik ay ja bʼa luʼumkʼinal it?». ¡Jelni chamyabʼjel! Jun kʼakʼu tsaʼan wa xjak june sok wa sjobʼoki ja jaw. Jkʼanani oj naʼe. Jayuj ja bʼa snajtil ja wake ixawi kaʼani jloʼiltikon, sok yaki sjakʼjel soka Biblia jujuntik sjobʼjel bʼa jel chaʼanyabʼalil ke ja keʼn kaʼunej jbʼaj sbʼaja sakʼanili.

 Ja ixuk tey jmok ja tyempo jaw mini skʼana oj kalyabʼ tʼunuk ja jas wanon snebʼjeli. Jun domingo kalayabʼ ke jlokunej ja Testigoʼik ja bʼa jnaji bʼa oj yawekitikon estudio bʼa Biblia. Ja pilan kʼakʼu kumxiyon ja bʼa kaʼteli, mixani teyuk ja jastik sbʼaji sok wajta. Elyon ja bʼa kaye sok och okon. Chomajkil, kalayabʼ ja Dyos bʼa a-skoltayon. Jani ja bʼajtan ekʼele jaw ka makunuk ja sbʼiʼil ja Dyos, ja Jyoba, bʼa jun orasyon (Salmo 83:18).

 Chabʼ k’ak’u tsaʼan kʼe jkʼul estudiar ja Biblia sok jun nupanum testigo bʼa Jyoba. Yajni wajye, kan jkʼumuk ja libro wa xyawe makunuk bʼa yajel estudio bʼa Biblia, ja libro Usted puede vivir para siempre en el paraíso en la Tierra. Sok junta akwal chʼak jkʼumuk. a Ja jas jnebʼa sbʼaja Jyoba soka bʼa Yunin, ja Jesukristo, kʼot man jkʼujol. Kʼot kabʼ stojol ke ja Jyoba jel syajulal skʼujol sok jel yaj xyabʼ jawa xkiʼajtik wokol (Isaías 63:9). Jun jasunuk kʼot man jkʼujol jani snajel ke ja Dyos jelni skʼanawon sok ja Yunin chamel yuj keʼna (1 Juan 4:10). Sok kila ke ja Jyoba jelni ajyel spasensya jmok «yujni mini june wa skʼana oj chʼaysnajel, pes wani skʼana asutxuk skʼujol yibʼanal ja kristyano» (2 Pedro 3:9). Kabʼni ke ja Jyoba wani skʼana oj mojxukon soka yeʼn (Juan 6:44).

 Ja bʼa semana jaw kʼe wajkon ja bʼa reunioniki. Jelni najat ja stsoʼotsil kolomi sok ay jlikchikin, ja jastal ja jplanta wani xbʼobʼ ya xiw chikan machʼa, pe ja testigoʼiki yilawoneni jastalni june ja bʼa spamilyaʼe bʼa ayxa tyempo mi bʼa wa xyilawe. Sjeʼa ja smodoʼe jastal meran snochumanik Kristo. Jelni gusto ajyiyon, jastalni ajyiyon ja bʼa snaj ja jtatawelo, pe bʼa mastoni chaʼanyabʼal.

 Bʼa tʼusan tyempo, ja jas wanon snebʼjel ja bʼa Biblia kʼe stukbʼes ja jsakʼanili. Jkʼutsu ja stsoʼotsil kolomi, kaʼakan yibʼanal ja jastik junuk koʼel mulal sok ixuk sok ja yujeli sok ja yabʼjel droga (1 Corintios 6:9, 10; 11:14). Wani xkʼana ke gusto oj ajyuk jmok ja Jyoba. Ja yuj, yajni wa xnebʼa ke mi lekuk jun jasunuk, mini xleʼa modo bʼa mi oj jkis. Jaʼuktoma, jel yaj xkabʼi, sok wa xpensaraʼan: «Mixa oj kʼul pilan ekʼele». Sok jachuk mixani xpensaraʼan mas, wegoni wa xtukbʼes ja jpensari sok ja jmodo. Stsʼakatal yuja jastik it, wegoni kʼe kil ja slekilal ja yajni kʼe kʼul jastik lek xyila ja Jyoba. Ja bʼa 29 bʼa julio bʼa 1989, wake ixaw tsaʼan yajni kʼe ki estudio bʼa Biblia, kiʼaj jaʼ sok ochyon testigo bʼa Jyoba.

 Ja Biblia skoltunejon bʼa oj tukbʼes ja jsakʼanili. Ja ajyi, yajni ay maʼ wa xya tajkukon, tolanibida ay jas wa xkʼulan. Pe ja wego wani xkʼulan ja janekʼ wa xbʼobʼkuj bʼa ajyel «laman sok yibʼanal ja kristyano» (Romanos 12:18). Sok mini lajxelukuj jtuchʼil. Jani lajxelkuj stsʼakatal ja Jyoba, yujni ja yabʼali soka yipi wani xkoltaniye bʼa oj tukbʼestik ja jsakʼaniltiki (Gálatas 5:22, 23; Hebreos 4:12).

 Mixa moso ayukon yuja droga, ja spekʼjel chikʼi sok ja kʼankʼunelik b’a koʼel mulal, ja wego wa xkʼujolan bʼa yajel gustoʼaxuk ja Jyoba sok yajelyi ja jas mas lek bʼa keʼna. Ja it tini chʼikan skoltajel ja tuk bʼa oj snaʼe sbʼaj. Jujuntik jabʼil tsaʼan yajni kiʼaj jaʼ, wajyon bʼa pilan país bʼa xcholjel ja lekil rasonik bʼa Biblia bʼa lugarik wa xkʼanxi mas cholumanik. Ja jabʼilik ekʼeljani ajyelkuj ja gustoʼil bʼa yajelyi estudio bʼa Biblia jitsan kristyano sok yiljel jastal tukbʼel ja sakʼanileʼi. Sok pilan jasunuk bʼa jel xya gustoʼaxukon jani yuja jnani testigoxa bʼa Jyoba, sok jani stsʼakatal yuja jtukbʼes ja jmodoʼi soka jsakʼanil ajyi.

 Ja bʼa 1999, ja bʼa El Salvador ochyon bʼa jun kurso, ja wego wa sbʼiʼilan Eskuela bʼa Cholumanik sbʼaja sGobyerno ja Dyosi. Ja tiwi xchapawone bʼa oj kʼotkon jun lekil choluman, sok bʼa sjejel ja bʼa kongregasyon sok stalnajel ja hermanoʼiki. Tsaʼan, ja bʼa junxta jabʼil jaw, nupaniyon soka kala cheʼum Eugenia. Ja wego jchawaniltikon cholumanotikon bʼa tyempo tsʼikan ja bʼa Guatemala.

 Wanxa la makuniyon xkabʼi; ayxa stojolil ja jsakʼanili sok jelxani gustoʼayon. Skʼuʼajel ja jas wa xyala ja Biblia yaʼunej elkon libre; mixa ibʼ kʼabʼal ayukon yuja spekʼjel chikʼi sok mixani bʼa koʼel mulal sok ixuke. Chomajkil, stsʼakatal yuja spaklajel ja Biblia, ja wego ayxa kiʼoj jun jsakʼanil bʼa lamanil sok meran yajtanel.