Ja bʼa 2011, jun refugiado bʼa Eritrea kʼot ja bʼa Noruega. Yajni taji kʼot yuj jujuntik taʼumantiʼik bʼa Jyoba, ja refugiado yala snaʼunejni sbʼaj ja Taʼumantiʼik ja bʼa spaisi. Xcholoni yabʼye ja yajni soldado ajyi, yila ke ja Taʼumantiʼik wa xlutjiye yuja skʼuʼajele. Ama wa xyiʼaje wokol yuja wa x-ixtalajiye, ja yeʼnleʼi mi skʼanawe oj ochuke soldado.

 Yuja ayni jas ekʼ junta chʼaykʼujol ja bʼa sakʼanili, ja winik jaw lutji preso. Ja tiw snaʼa sbʼaj ja Paulos Eyasu, ja Negede Teklemariam sok ja Isaac Mogos, oxe taʼumantiʼik bʼa Jyoba lutubʼale yuja skʼuʼajel yiʼoje man bʼa 1994.

 Ja yajni tey bʼa preso, yila ke ja Taʼumantiʼiki wani skʼulane ja jasa wa sjeʼawe sok wa xyalawe ja smeranili. Jelni payji yuja wa skʼepaweyi ja tuk presoʼanumik ja swaʼele. Chomajkil, wa spaklaye ja Biblia kada kʼakʼu sok cha wa slokowe ja tuk bʼa oj cha spaklaye lajan. Ja Taʼumantiʼiki ojni bʼobʼ eluke ja bʼa preso bʼa kechanta oj skʼuluke pirmar jun juʼun bʼa jani oj yawekan ja skʼuʼajelik yiʼoje, pe mi skʼanawe oj skʼuluke.

 Ja yeʼn jelni chamyila bʼa spetsanil ja jas ekʼ sbʼaji. Ja yuj, yajni kʼot ja bʼa Noruega, skʼana oj snaʼ jas yuj ja taʼumantiʼik bʼa Jyoba ayiʼoje jun skʼuʼajel bʼa tsats lek. Yajni taji kʼot yuja Taʼumantiʼik, kʼe spaklaye lajan ja Biblia sok ochel ja bʼa sreunione.

 Kʼot Taʼumantiʼ bʼa septiembre bʼa 2018. Ja wego wani xya makunuk chikan jas ekʼele bʼa ochel loʼil soka kristyanoʼik ja bʼa Eritrea sok Sudán. Wani skʼapayile estudioʼik bʼa Biblia bʼa jachuk ja yeʼnle oj cha bʼobʼ ajyukyujile jun skʼuʼajel tsats lek bʼa Dyos.