Ja Zarina ti ajyi bʼa Rusia ja yajni yiʼaj jaʼi sok och testigo bʼa Jyoba. Tsaʼan kumxi ja bʼa spais ja bʼa Asia Central. Ja yeʼn puestoni ajyi bʼa oj sjeyi ja chabʼ yakʼixi ja jas snebʼata bʼa Biblia. Yuja mey yiʼoj lek takʼin, jani waj soka snantati, ja yermano sok ja scuñada bʼa jun departamento bʼa kechan jun kuarto yiʼoj. Ja snantati stimawe ja Zarina bʼa mok stayi tiʼal bʼa Biblia ja chabʼ yakʼixi, sok jaxa yeʼnleʼi aljiyabʼye mok staʼe tiʼal bʼa relijyon soka snaneʼi.

 Ja Zarina wani sjobʼo sbʼaj jastal oj skoltay ja chabʼ yakʼixi bʼa oj snaʼe sbʼaj ja Jyoba (Proverbios 1:8). Ja yuj spatayi skʼujol ja Dyos bʼa atojuk yuj sok aʼajukyi biboʼil. Anto, tixa kʼe elksok bʼejyel ja yakʼixuki sok kʼe stayi tiʼal sbʼaja tsamalik skʼulbʼenik ja Dyosi. Ja bʼejyelik jaw koltajiye bʼa oj skʼan-e snebʼjel mas sbʼaja Kʼulumani.

 Tsaʼan, ja Zarina jak bʼa spensar jun modo bʼa oj sjeyile mas jastik junuk soka libro ¿Jasa wa sjeʼa meran lek ja Biblia? a Wa skʼulan kopyar ja parrapoʼiki sok ja sjobʼjelik bʼa jun chʼin nota sok wa xya och jujuntik yaljel bʼa skoltajel yabʼjel stojol ja jas yiʼoji. Tixa wa snakʼa ja notaʼik sok jun lápiz ja bʼa yibʼel ja lavadora, bʼa stsʼeʼel ja baño. Yajni ja yakʼixuk wa x-ochye ja tiwi, wa skʼumane ja notaʼik sok wa stsʼijbʼane ja sjakʼjeliki.

 Soka jas kʼulani, ja Zarina bʼobʼ skʼul estudiar soka yeʼnle chabʼ kapitulo ja bʼa libro ¿Jasa wa sjeʼa meran lek ja Biblia? bʼajtanto oj wajuke bʼa pilan lugar jach stuchʼile. Yajni stuchʼilexa, bʼobʼni stoj ja yakʼix bʼa mixa maʼ wa xtimjiyuj. Ja bʼa octubre bʼa 2016, ja chabʼ ja yakʼix ja Zarina yiʼaje jaʼ sok jelni wa xyaʼaweyi tsʼakatal ja snane yuja staʼa modo bʼa oj jejukyile ja jas meran wa sjeʼa ja Biblia.