Junuk 145 kilometro wa xkan bʼa norte ja bʼa chonabʼ Nueva York, mojan yiʼoj ja lugar sbʼiʼil Wallkill, ay jun lugar naʼubʼal sbʼaj ja Pinka Watchtower. Ja lugarik it wane skʼulajel ja taʼumantiʼik bʼa Jyoba jun aʼtel bʼa jel chaʼan yabʼalil bʼa sjejel bʼa Biblia. Ja bʼajtani manxi bʼa 2 bʼa enero bʼa 1963 sok ayxa yiʼoj mas ja 50 jabʼil.

Ja Davin walker, jun taʼumantiʼ bʼa Jyoba jekji bʼa oj aʼtijuk yajni manxi ja Pinka, wa xcholo: «Yuja wane jakel jitsan taʼumantiʼik bʼa Jyoba ja bʼa naʼits Betel bʼa Brooklyn, tʼilani jleʼatikon modo jastal oj elkujtikon mas koʼel ja waʼelali ja wa x-abʼxi ja tiw. Ja taʼumantiʼik bʼa Jyoba ayxa yiʼoje jun pinka bʼa Nueva York, pe wa yiʼaj junuk 6 ma 8 ora ja man bʼa Brooklyn. Jaxa bʼa Wallkill kechanta wa xkan 2 ora. Ja it juni lugar jel lek sbʼaja jasa wa xmakunikujtikoni. Ja Pinka it wa xyayi ja naʼits Betel waʼelal sok tekʼul, sbʼakʼtel wakax, chitam, gayina sok lech. Tsaʼan manxi mas luʼumik ja bʼa lugar jaw.

Ekʼelxa 10 jabʼili, ja aʼtel wa skʼulane ja taʼumantiʼik bʼa Jyoba och pukxuk mas, sok ja it ya tukbʼuk ja aʼtel wa skʼulane bʼa Wallkill. Mi kechanuk wa xyawe eluk waʼelalik, chomajkil kʼe yawe eluk juʼunik elel bʼa Biblia bʼa stsomjel ja ixuk winik matik wa skʼana oj snaʼe sbʼaja Dyosi jastal yalakan ja Jesús (Mateo 9:​37; Lucas 10:2; Juan 4:​35, 36). La kiltik jujuntik ja aʼtel kʼulaxel ja bʼa Wallkill.

Wa xkʼulxi imprimir juʼunik. Man snalan och ja siglo XX, tʼusan mi spetsaniluk ja juʼunik wa xyawe eluk ja taʼumantiʼik bʼa Jyoba ti wa x-el bʼa Brooklyn. Pe yajni och kʼanjuk mas ja juʼuniki, ja Brooklyn mixa xchʼak lajxuk yuj skʼuljel imprimir. Ja yuj ja bʼa jabʼil 1973, ja Taʼumantiʼik yawe kujlajuk jun yajkʼachil imprenta ja bʼa Wallkill. Man tyempo jaw, yiluneje ja stʼilanil yajel niwanbʼuk mas ja imprenta jitsan ekʼele. Sok ja mas ajkʼachto kʼulaxi bʼa 2004.

Wa skʼulane Programaʼik bʼa computadora. Bʼa 1979, ja taʼumantiʼik bʼa Jyoba ja bʼa Wallkill och skʼuluke jun programa bʼa computadora, wa xnaxi sbʼaj jastal Sistema Electrónico de Edición Plurilingüe (MEPS, jachuk ja yal kom sbʼiʼil bʼa inglés). Ja bʼa jtyempotiki, stsʼakatal ja MEPS wa xbʼobʼ el juʼunik elel bʼa Biblia bʼa mas ja 600 kʼumaliki.

Lugar bʼa wa x-axi xchapjelal. Bʼa 1988, ja Eskwela bʼa Biblia bʼa Galaad sbʼaja Watchtower wa xkʼulaxi bʼa Brooklyn tixa aji ekʼuk bʼa Wallkill, sok ja bʼa 17 de octubre ja bʼa jabʼil jaw tixa kʼe kʼulaxuk tiw ja eskwela bʼa Wallkill. Jaxa bʼa abril bʼa 1995 aji ekʼuk yajkʼachil ekʼele ja eskwela jaw bʼa lugar wa x-ajyi chapjelal bʼa Watchtower, wa xkan bʼa Patterson (Nueva York).

Jastalni ja bʼa tuk pinkaʼik, ja jastal wa xkʼulaxi ja aʼtelik ja bʼa Pinka yiʼoj ja Watchtower tukbʼitani ja tsaʼanxta 50 jabʼil ekʼel jani. Pe tsatsni lek wane aʼtel bʼa yajel eluk waʼelal sbʼaja matik wane aʼtel ja bʼa tuktukil naʼitsik yiʼoje ja taʼumantiʼik bʼa Jyoba ja bʼa Nueva York.

Ja bʼa jtyempotiki, ja Taʼumantiʼik wane yajel kʼeʼuk niwak naʼitsik sok opisinaʼik ja bʼa Wallkill. Chomajkil, wane stojbʼesel ja poko naʼitsik yiʼojeʼi. Spetsanil ja aʼtelik jaw jani bʼa skoltajel ja Pinka yiʼoj ja Watchtower bʼa mi oj kʼot tekʼan yajel eluk ja juʼunik sbʼaja jitsan ixuk winik wane ochel taʼumantiʼik bʼa Jyoba bʼa yibʼanal ja Luʼumi.

Ja David Walker, jtaʼatik tiʼal bʼajtani, wa xyala: «Jelni wa xya gustoʼaxukon yiljel jastal ja tsaʼanxta 50 jabʼil ekʼel jani ja naʼitsik bʼa Wallkill maxa jel niwan sok jel tojbʼel, spetsanil ja it jani bʼa skoltajel ja ixuk winik sjejelyi ja rasonik yiʼojan ja Biblia».