Ja juʼun wa sbʼiʼilan Ja jlibro wa sloʼiltay loʼilik bʼa Biblia el ja bʼa 2012 bʼa kʼumal pangasinán, bʼa Filipinas, sok jelni lek yilawe ja Opisina bʼa wa skʼelawe sjejel juʼun ja bʼa país jaw. Spensaraʼane oj yawe makunuk ja bʼa eskwela bʼa primaria bʼa sjejelyi juʼun ja yal untik bʼa skʼumale. Ja bʼa jtyempotik, jitsan yal untik jel wane yajel el slekilal ja libro jaw.

Ja bʼa Filipinas wa xkʼumaniye mas ja 100 kʼumalik, sok jitsanxa jabʼil wane xchapjel jas tikʼe kʼumal oj yawe makunuk ja bʼa eskwela. Ja bʼa jabʼil 2012, ja Opisina bʼa wa skʼelawe sjejel juʼuni yilawe yajni wa xjejiyile ja yal untik ja «kʼumal wa xkʼumaniye ja bʼa snajeʼi [...] mas jel lek sok wego wa snebʼawe». Ja matik ay xcholi xchapawe jun programa bʼa oj sjeʼeyi ja yal untik ja bʼa kʼumal wa xkʼumaniyeʼi.

Ja kʼumal pangasinán jani june ja kʼumal tsaji bʼa oj yawe makunuk ja bʼa eskwela. Pe jastalni yala ja direktor bʼa jun eskwela, ay jun wokol: mini ay lek juʼunik ja bʼa kʼumal pangasinán. Sok styempoʼilni lek kʼot Ja jlibro wa sloʼiltay loʼilik bʼa Biblia, pes elni ja bʼa tsomjelal bʼa oxe kʼakʼu skʼulane ja taʼumantiʼik bʼa Jyoba bʼa noviembre 2012.

Skʼulane imprimir junuk 10 mil ja libro it bʼa spilawe ja bʼa niwan tsomjelalik skʼulaneʼi. Nantatal sok yal untik jel gustoʼaxiye yani yilawe ja libro it bʼa skʼumaleʼi. Jun nupanum yala: «Ja kuntikiltikoni jel sgustoʼe yujni wa xyabʼye lek stojolil».

Kechanta ekʼ ja niwan tsomjeli, jujuntik Taʼumantiʼik yiʼaje ja libro Wa sloʼiltay loʼilik bʼa Biblia bʼa jun eskwela bʼa Dagupan. Ja maestroʼik matik wane slejel juʼunik ja bʼa kʼumal pangasinán, jelni gustoʼaxiye yajni yilawe ja libro jaw. Ja bʼa eskwela skʼanawe mas ja 340 libroʼiki, sok wego kʼe yawe makunuk bʼa sjejelyi ja yal untik skʼumajel ja bʼa skʼumaleʼi.

Ja taʼumantiʼik bʼa Jyoba jel sgustoʼe yuja wan axel makunuk ja libro it bʼa sjejelyi ja yal untiki. June ja sutumanik ja bʼa libro it, yala: «Jitsanxa tyempo wa xkilatikon ja stʼilanil yajel eluk juʼunik bʼa skʼumal ja ixuk winiki, sok jachuk oj kʼot man bʼa skʼujole. Ja yuj, ja taʼumantiʼik bʼa Jyoba wani xkʼulantikon ja janekʼ wa xbʼobʼ kujtikoni bʼa sutjel ja Biblia sok tuk juʼunik elel bʼa Biblia bʼa jitsan kʼumalik».