Bʼa diciembre bʼa 2012, ja taʼumantiʼik bʼa Jyoba bʼa Tailandia stuluweyi jun aʼtel jel chaʼanyabʼalil bʼa skoltajel ja eskwelanteʼik bʼa oj yawe el slekilal. Aye 20 Taʼumantiʼik bʼa yulataye ja eskwelaʼik bʼa Bangkok, stsomo sbʼaje soka direktoriki sok skʼapaweyi ja maestroʼiki soka eskwelanteʼiki ja rebista ¡Despertad! bʼa octubre bʼa 2012, wa sbʼiʼilan: «Cómo aprovechar al máximo la escuela».

Ja aʼtel it jel ilxi slekilal sok kʼulaxi bʼa spetsanil ja país jaw. Bʼa jun jabʼil sok snalan, ja Taʼumantiʼiki yulataye 830 eskwela. Ja rebista jel skʼulane gusto ja maestro soka eskwelanteʼiki sok ja yuj tʼilani kʼulxi imprimir oxe ekʼele bʼa oj axukyile ja janekʼ skʼanaweʼi. Kechanta kʼajyel wa xkʼulxi imprimir 30,000, pe yuja jel kʼulaji gusto pilxi bʼa mas ja 650,000 rebista.

Ja direktor soka maestro jumasaʼ wego yilawe ja stʼilanil yiʼoj ja jasa yiʼojan ja ¡Despertad! Pes jun maestra yala: «Ja rebista it oj koltajuke ja eskwelanteʼiki bʼa oj tsatsbʼuk ja jastal wa xyila sbʼaje soka snantateʼi sok bʼa oj skʼujoluke stajel ja skʼelsateʼi». Jujuntik eskwela xchʼikawe ja rebista it ja bʼa programa yiʼoje bʼa spaklajeli, soka tuki yawe makunuk bʼa snebʼjel skʼumajel juʼun. June ja bʼa eskwelaʼiki, ja eskwelante jumasaʼ skʼulane yaʼtele bʼa ti yawe eluk bʼa rebista it, soka matik jel lek skʼulaneʼi aji spremioʼe.

Jun eskwelante yaʼa tsʼakatal yuja artikulo yiʼojan ja bʼa rebista it «Cómo ganarle la batalla a la obesidad infantil y juvenil». Ja yeʼn xcholo sbʼaja chamelal bʼa jelxelxa kojlelal juni wokol bʼa tikʼanxta wa xtaxi tiʼal soka yamigoʼiki jelni wokol bʼa yeʼnle stajel tiʼal ja it. Anto, cha yala: «Tsʼakatalex yuja waxa waʼawex kitikon rasonik bʼa mi wokoluk sok pasil snochjel».

Ja nantatal jumasaʼ jelni cha yaʼawe tsʼakatal yuja rebista. Chabʼ ixuke Taʼumantiʼ waj yulataye jun nanal bʼa snaj sok alji yabʼye ja yakʼix ja nanali koltaji yuja rasonik yiʼoj ja rebista bʼa oj skʼujoluk mas ja bʼa eskwela.

Ja Pichai Petratyotin, yala bʼa sparte ja Taʼumantiʼik bʼa Tailandia: «Ja rebista ¡Despertad! wa sjeʼa ja Biblia ayiʼoj jun biboʼil bʼa wani xmakuni, anima x-ekʼ jitsan tyempo. Ja taʼumantiʼik bʼa Jyoba wa xkʼuʼantikon ja chapjelali jelni tʼilan, ja yuj jelni yakitikon gusto spiljel ja rebista it jach kʼebʼubʼal».