Ja bʼa julio bʼa 2013, ja Tsomo Tojwanum bʼa taʼumantiʼik bʼa Jyoba sjekayi jun karta ja misioneroʼiki soka tuk matik wane aʼtel bʼa tyempo tsʼikan bʼa tuk paisiki. Ja karta wa xyala oj koltajuke bʼa oj wajuke ja bʼa niwan tsomjel wa xkʼulaxi bʼa wa xkʼotye bʼa tuktukil país ma junuk ja bʼa niwan tsomjel bʼa oxe kʼakʼu kʼulaxi ja bʼa 2014 sok skʼeʼulabʼil ja 2015.

Ja it mi kechanukta bʼa oj wajuke ja bʼa niwan tsomjeli, pes jani bʼa oj cha yawe ekʼ tyempo soka spamilyaʼe soka yamigoʼeʼi. Ja karta wa xyala ja boleto yeʼn oj stup ja kongregasyonik bʼa taʼumantiʼik bʼa Jyoba.

Anima ja jabʼilik ekʼeljani kʼulaxel junxtatik jastal ja it, pe ja bʼa jabʼil it tukniʼa. Ja Tsome Tojwanumi yawe kujlajuk jun yajkʼachil opisina bʼa oj spil-e ja boletoʼik sbʼiʼilan Opisina bʼa Viajeʼik ja bʼa naʼits Betel bʼa yechalil wa xkʼelxi ja yaʼtel ja Taʼumantiʼiki.

Tʼusan tsaʼan ja yajni jekxi ja karta, wego kʼe skʼan-e ja bʼa opisina ja boletoʼik bʼa abyoni. Ja bʼa enero bʼa 2014, ja Opisina bʼa Viajeʼiki jel ajyi ja yaʼteleʼi. Ja matik wane aʼtel ja bʼa opisina jaw yeʼnani xcholane slejel sok spiljel ja boletoʼik ja bʼa lugarik oj wajuke ja matik wane aʼtel bʼa tyempo tsʼikan bʼa yibʼanal ja luʼumi.

Skʼulajel ja it, bʼa jujuntik jelni wokola. Jujuntik tʼilani oj eluke bʼa Reykjavík (Islandia) sok oj wajuke man Cochabamba (Bolivia); tuk bʼa Nouméa (Nueva Caledonia) man Antananarivo (Madagascar). Cha ayni jujuntik elye bʼa Port Moresby (Papúa Nueva Guinea) bʼa oj wajuke man Seattle (Washington, Estados Unidos), tuk bʼa Ouagadougou (Burkina Faso) man Winnipeg (Canadá).

Ja joʼe matik wane aʼtel ja bʼa Opisina bʼa Viajeʼiki spilawe junuk 19,000 boletoʼik bʼa abyon bʼa junuk 4,300 pasajeroʼik bʼa 176 paisik. Spetsanil ja it chʼak kʼulaxuk stsʼakatal yuja sat takʼin yaʼawe ja kongregasyonik bʼa jaʼitani sbʼaj ja it.

Spetsanil ja aʼtel kʼulaxi sbʼaja it jelni xyaʼawe tsʼakatal. Jun nupanum misioneroʼik stsʼijbʼane: «Ja wego oj kumxukotikon man sureste asiático, bʼa ti wanotikon aʼtel. Jel wa xkaʼatikon tsʼakatal yuja koltanel awaʼawexkitikoni bʼa wajtikon man Inglaterra, ja bʼa lugar pojkitikoni, sok bʼa ajyel yajkʼachil ekʼele soka jpamilyatikoni, pes ayxani joʼe jabʼil me la wajtikon. Mokukxta jaʼuk ja koltanel it, ja keʼntikoni mini oj bʼobʼkujtikon. Wa xkaʼatikonyi tsʼakatal sok spetsanil jkʼujoltikon ja matik koltaniyeʼi».

Jun misionero bʼa ti wan aʼtel bʼa Paraguay stsʼijbʼan: «Ja keʼn soka jcheʼumi wa xkaʼatikon jitsan tsʼakatal yuja bʼobʼ wajkotikon ja bʼa niwan tsomjel bʼa wa xwajye ixuk winik bʼa tuktukil país kʼulaxi bʼa Nueva Jersey (Estados Unidos). Bʼa skʼeʼulabʼil ja jabʼil 2011, kʼe jtsomtikon tʼun jtakʼintikon bʼa oj wajkotikon bʼa Estados Unidos sok snajel sbʼaj ja naʼits Betel bʼa yechalil wa xkʼelxi ja kaʼteltiki. Pe ja bʼa junio bʼa jabʼil jaw, lokjitikon bʼa oj waj kulataytikon ja kongregasyonik bʼa lenguaje de señas ja bʼa Paraguay. Ja it jelni oj bʼejyukotikon ekʼ. Och jpensaraʼuktikon lek, sok tsaʼan kalatikon mi oj wajkotikon ja bʼa Estados Unidos sok oj jmantikon jun jkarrotikon bʼa oj jkʼuluktikon ja yajkʼachil cholal ajikitikoni. Anto lokjitikon bʼa oj wajkotikon ja bʼa niwan tsomjel bʼa wa xwajye ixuk winik bʼa tuktukil paisi. ¡Ja jasa wa xkʼanatikon ajyi kʼotni smeranila! Wa xkatikonyi tsʼakatal ja Jyoba yuja yajtanel soka slekil akʼujolex ajeʼunejex kitikoni».

«Kechan wa xkʼanatikon oj jektikon awilex ja yal correo it bʼa oj kaltikon awabʼyex: ‹¡Wa xkatikon awilex jitsan tsʼakatal!›, jach stsʼijbʼane ja nupanum sbʼaje bʼa Malaui. Janekʼto maʼ aʼtel, tyempo sok takʼin yiʼaj bʼa oj chʼak chapxuk ja it. Wa xkatikon tsʼakatal yuja tsatsal aʼteli, pe mastoni yuja slekil skʼujol sjeʼa ja xchonabʼ ja Dyosi bʼa oj bʼobʼ wajkotikon ja bʼa jnajtikoni. Wajel ja bʼa niwan tsomjel bʼa wa xwajye ixuk winik bʼa tuktukil país sok ajyel soka jpamilyatikon soka kamigotikoni.»

Ja matik wane aʼtel ja bʼa Opisina bʼa Viajeʼik jelni gusto ajyiye soka yaʼteleʼi. «Skoltajel ja misioneroʼik bʼa oj kumxuke ja bʼa snaje bʼa oj yil ja spamilyaʼe soka yamigoʼe jelni chaʼanyabʼalil», jach yala ja Mileivi. Jaxa Dorise cha yala: «Ja keʼn kila ja janekto yajtanel yiʼoj ja xchonabʼ ja Dyos sbʼaja matik wane aʼtel bʼa tuk paisiki». Soka Rodney, olomal ja bʼa Opisina bʼa Viajeʼiki, yala: «Koltanel ja bʼa aʼtel it jel yaʼaki gustoʼil».

Ja taʼumantiʼik bʼa Jyoba bʼa yibʼanal ja luʼumkʼinali jel gusto wa xyabʼye yuja koltanele bʼa jachuk ja smoj-aljele matik wane chʼakjel sbʼaje sok tsats wane aʼteli ayiʼe ja majtanal it bʼa yaʼuneje sok spetsanil skʼujole.