Bʼa 1987, Lyman Swingle, ja maʼ kʼot june ja bʼa Tsome Tojwanum bʼa Taʼumantiʼik bʼa Jyoba, kʼumani bʼa stiʼ sat ja 63,580 ixuk winik tsomane ja bʼa Plaza bʼa Toros Monumental bʼa Valencia (Venezuela). Jitsan ja maʼ ti ajyi tsomani bʼejyiye sok autobús snajtil ja akwali. Ja yeʼn yala yabʼ ja matik ajyiye tsomani mixa kechanukta jun yal chʼin tsome taʼumantiʼik bʼa Jyoba, pes junxa ni niwan kʼoleʼe bʼa ojxta ochuke ja «bʼa kʼole 100,000 cholumanik».

Ja bʼa jabʼil jaw, ay mas ja 38,000 cholumanik ja bʼa Venezuela, wa xkʼan kaltik taʼumantiʼik bʼa Jyoba bʼa wa xyalawe yabʼ ja tuki ja rasonik yiʼoj ja Biblia. Ja bʼa tyempo jaw, kechanta waxake país bʼa ayiʼoj mas ja 100,000 cholumaniki.

Ja taʼumantiʼik bʼa Jyoba wane pojxel bʼa yibʼanal ja luʼumi. Yajni ekʼ ja bʼajtan kʼakʼanel bʼa spetsanil ja luʼumi, kechanta ay jujuntik mil cholumanik sbʼaja sGobyerno ja Dyosi. Pe ja it tukbʼi. Ja 1943 Yearbook of Jehovah’s Witnesses (Anuario de los testigos de Jehová de 1943) xcholo: «Ja datoʼik sbʼaja inporme bʼa 1942, anima mi tsʼikanuk ja datoʼik yuja mito ayuk aparatoʼik bʼa kʼumanel, wa sjeʼa ja Jyoba wani yajel koʼ slekil [...]; wa sjeʼa ja bʼa tyempo it ay mas ja 106,000 cholumanik [wane xcholjel ja lekil rasoni] bʼa yibʼanal ja luʼumi». Chomajkil, anima wan ekʼel ja xchabʼil kʼakʼanel bʼa spetsanil ja luʼumi, jitsan ixuk winik ochye Taʼumantiʼik. Bʼa 1950, kechanta ja bʼa Estados Unidos ajyixa mas ja 100,000 cholumaniki.

Mas tsaʼan, bʼa 1974, ja bʼa Nigeria staʼa kʼot ja 100,000 cholumaniki.

Jaxa bʼa jabʼil nochani, ja bʼa Brasil soka bʼa Alemania ekʼ mas ja 100,000 cholumaniki. Bʼa chane continente pojxi ja Taʼumantiʼiki. Ja it sjeʼa payjiye jitsan ixuk winik bʼa tuktukil rasaʼe yuja lekil yaljelik yiʼoj ja Biblia.

Ja taʼumantiʼik bʼa Jyoba mini xkʼot tekʼan ja jastal wan pojxel bʼa spetsanil ja luʼumi, sok jani wan kʼotel ja jasa wa xyala ja Isaías 60:22: «Ja yal nuxi oj kʼot bʼa mil, sok ja yal chʼini oj kʼot jun chonabʼ bʼa jel ja yipi. Keʼna, ja Jyoba, oj ka kʼiʼuk wego ja bʼa styempoʼili».

Jastalni wa xyala ja inporme bʼa 2014, bʼa 24 país ekʼelxa ja 100,000 Taʼumantiʼiki. Ja bʼa paisik jaw ti wa xtax ja Venezuela, bʼa staʼa kʼot ja 100,000 ja bʼa 2007. Bʼa yibʼanal ja luʼumi ayxa 115,416 kongregasyonik bʼa taʼumantiʼik bʼa Jyoba sok 8,201,545 cholumanik.