Ja lugar bʼa jexi libroʼik bʼa Toronto, ajyi mesaʼik bʼa axi juʼunik jach kʼulubʼal imprimir sok jach bʼa aparatoʼik, ti kʼulaxi bʼa Centro Metropolitano de Convenciones ja bʼa chonabʼ jaw bʼa Canadá ja bʼa kʼakʼu 13 man 16 bʼa noviembre bʼa 2014 sok wajye mas ja 20,000 ixuk winik.

Ja taʼumantiʼik bʼa Jyoba tini ajyiye tiw. Sok stojbʼese jun lugar bʼa jel xpaywani, sok yaʼawe tabletaʼik bʼa oj sjeʼe jastal yajel makunuk ja sitio bʼa Internet, jw.org.

June ja olomal bʼa wa skʼeljel ja ekʼele jaw yala: «Ja sitio bʼa Internet awiʼoj jelni chapan ay. Jujuntik ja matik teye il bʼa wane sjejel ja juʼuniki lekni ja oj yile ja jastal waxa jeʼawex ja juʼunik ja weʼnlexi». Jitsan ja maʼ wajye wa xyalawe ja jw.org juni sitio jel xpaywani sok mini wokoluk yajel makunuk, bʼa wa xtax ja sjakʼjel ja bʼa sjobʼjelik mas tʼilaniki. Chomajkil, jelni lek yilawe ja sitio it bʼa wa skʼapa koltanel sbʼaja ixuk winik bʼa oj tojbʼuk ja wokol soka chamkʼujol yiʼojeʼi.

Ja Taʼumantiʼik maʼ teye ja bʼa mesa bʼa sjejel ja juʼuniki yilawe tʼusan mi spetsaniluk ja matik kʼotyeʼi mini snaʼawe sbʼaja jw.org. Tʼusan mi spetsaniluk yiʼaje jun tarjeta bʼa jw ma ja tratado ¿Bʼa oj jtaʼtik ja sjakʼjel ja sjobʼjelik mas tʼilanik ja bʼa jsakʼaniltiki? Chomajkil, jitsan yalawe oj ochuke pilan ekʼele ja bʼa sitio bʼa Internet, sok ja tuki skʼanawe bʼa oj waj ulatajuke bʼa snaje.

Yuja bʼa viernes jani skʼintaye ja skʼakʼujil ja yal untik ja bʼa lugar jexi libroʼiki, ja Taʼumantiʼiki sjeʼawe ja bideoʼik dibujoʼik bʼa wa xnijki bʼa jw.org. Jitsan kʼole eskwelanteʼik sok maestroʼik kʼotye tekʼan bʼa kan skʼel-e.

Jun winik bʼa Chicago wa x-aʼtiji bʼa jun empresa bʼa wa xkʼulxi imprimir Bibliaʼik yala jelni lek ja jastal yaʼuneje eluk taʼumantiʼik bʼa Jyoba ja Traducción del Nuevo Mundo de las Santas Escrituras yaʼuneje bʼa mesa. Sok skʼana jun tarjeta bʼa jw bʼa oj skʼumuk ja matik skʼulani.

Ja sitio bʼa Internet kiʼojtikoni wa xtax bʼa mas ja 700 kʼumaliki. Ja matik wajye ja bʼa jexi libroʼiki yilawe ja jw.org bʼa 16 kʼumalik: amárico, bengalí, chino, coreano, español, francés, griego, gujarati, hindi, inglés, portugués, sueco, tamil, tigriña, urdu sok vietnamita.

June ja bʼa Taʼumantiʼik maʼ teye ja bʼa mesa bʼa jexi ja juʼuniki yila masni lek ja sjejelyi ja sitio bʼa Internet ja ixuk winik yuja kechanta oja alxuk yabʼyeʼi. Sok yala: «Ja it juni lekil ekʼele bʼa bʼobʼ jexuk ja sitio bʼa Internet kiʼojtiki».