Ja taʼumantiʼik bʼa Jyoba kʼajyel wa x-iljiye ja bʼa xcholjel naʼits naʼits. Pe cha kʼajyelxa wa x-iljiye ja bʼa lugarik jel x-ekʼ ixuk winik sok ayiʼoje ja yal karro bʼa ayiʼoj juʼunik.

Ajkʼachto kʼe cholxuk mas soka yal karro. Ja bʼa noviembre bʼa 2011 bʼa xchonabʼil Nueva York, jun kʼole Taʼumantiʼik yawe makunuk jun tikʼe yal karro bʼa ayiʼoj ja juʼunik bʼa jachuk sjejelyi ja ixuk winiki ja rasonik bʼa Biblia. Jelni cha lek waj juntiro ja it, ja yuj chapji bʼa oj kʼulaxuk bʼa tuk chonabʼik.

Ja bʼa yixawil marzo bʼa 2015 ajitayile ja kongregasyonik bʼa taʼumantiʼik bʼa Jyoba bʼa yibʼanal ja luʼumi 165,390 yal karroʼik bʼa sjejel ja juʼuniki. Chomajkil smanuneje mesaʼik sok tuktukil tikʼe bʼa sjejel ja juʼuniki.

Ja xcholjel naʼits naʼits jani ja aʼtel mero wa skʼulane ja taʼumantiʼik bʼa Jyoba bʼa sjejelyi ja ixuk winik sbʼaja Biblia. Pe ja yal karro bʼa sjejel ja juʼunik jelni lek wan wajel. La kiltik kechanta jujuntik sjejel.

Ja bʼa Perú, jun winik sbʼiʼil Raúl mojxi och soka Taʼumantiʼik bʼa teye bʼa stsʼeʼel ja yal karro sok yala: «¿Bʼaxa ajyiyexa? Ayxa oxe jabʼil wa xleʼawex ekʼ. Sok kayi tsʼakatal ja Dyos yajni kila ja yala karroʼex bʼa juʼunik».

Ja Taʼumantiʼiki wanxani xcholowe ja bʼa chonabʼ bʼay ja Raúl, pe ja yeʼn mini xtejkʼaji bʼa snaj ja bʼa sat kʼakʼu soka bʼa xchʼakulabʼil ja semana. Ja Raúl xcholo ja yeʼn wan ajelyi ajyi estudio bʼa Biblia soka taʼumantiʼik bʼa Jyoba, soka wego wa skʼana oj cha kʼe stulyi ja estudio bʼa Biblia. Ja yuj xchapawe jas ora oj ulatajuk.

Ja bʼa Bulgaria, jun nupanum mito ay skʼujole kʼotye tekʼan ja bʼay ja yal karro sok yiʼaje ja libro El secreto de la felicidad familiar. Tsaʼan yajni ekʼ jun semana kumxiye bʼa yijel Ja jlibro wa sloʼiltay loʼilik bʼa Biblia soka Aprendamos del Gran Maestro. Ja Taʼumantiʼ tey bʼa stsʼeʼel ja yal karro sjobʼoyi ja nupanum janekʼxa ja yuntikile. Ja nupanum yala: «Mito ay kiʼojtikon, pe ta ajyi, wa xkʼanatikon a-snebʼ bʼa Dyos. Soka libroʼik it, jani ja jas wa xmakunikujtikoni».

Ja bʼa Ucrania, jun winik lapanyuj skʼu bʼa kʼakʼanel skʼuman jujuntik Taʼumantiʼik teye sok ja yal karro bʼa sjejel juʼuniki sok yala yabʼ: «Akʼixuk, alawikabʼ jas ora oj jakuk ja Armagedoni». Ja winiki ajkʼachto wajel bʼa jun kʼakʼanel man bʼa Ucrania. Ja jastik wan ekʼel ja bʼa luʼumkʼinali yaʼunej kʼokxuk bʼa skʼuʼajel ja Armagedón jelxa mojan, sok wa sjobʼo sbʼaj jas yuj ja Dyos mi jas wan skʼulajel. Ja Taʼumantiʼik xcholowe yabʼ soka Biblia ja Dyos ayni yiʼoj rasonik yuja mito jas skʼulunejuki, pe bʼa tʼusanxta ojxa xchʼaysnajel ja wokolik. Ja winiki yiʼajkan ja rebistaʼik Ja Juʼun Cholumani, ja ¡Despertad!, soka libro ¿Existe un Creador que se interese por nosotros?

Ja bʼa Macedonia, yajni ja Taʼumantiʼik wane xcholjel soka yal karro, jun kerem yala yabʼ ja Taʼumantiʼiki skʼumantabʼi ja rebistaʼik sok ja wego jaʼ wa skʼana ja libro ¿Jasa wa sjeʼa meran lek ja Biblia? Yajni ajiyi, ja winiki yala oj wajuk bʼa biblioteca bʼa oj kʼe skʼumuk ja libro.

Chabʼ ora tsaʼan, yajni chʼakta skʼumuk ja bʼajtanik 79 slamik yiʼojan ja libro, ja keremi kumxi sok yala: «Ja libro it wani stukbʼes ja jsakʼaniltiki. Wa xkila chʼayelon lek soka jastal wa xpensaraʼan sbʼa jitsan jastik junuk. Spetsanil ja jas wa xyala ja libro sbʼejni leka. Ja wego, tukxani wa xkila ja jsakʼanil».