Bʼa yibʼanal ja luʼumi ja ixuk winiki wa skʼumane ja juʼunik elel bʼa Biblia yaʼuneje eluk ja taʼumantiʼik bʼa Jyoba. Miyonik wa skʼumane ja juʼunik jach bʼa Internet, jastalni weʼn wana skʼulajel ja wego. Chomajkil, jelni chamyabʼjel snajel ja janekʼ wan kʼulaxel imprimiri. Ja bʼa jabʼil 2013 katikon eluk juʼunik bʼa junuk 700 kʼumalik, bʼa pukxi bʼa 239 paisik sok lugarik.

Bʼajtanto ja bʼa 1920 wa xtupitikon ja empresaʼik bʼa oj kʼulxuk imprimir ja juʼuntikoni. Pe ja bʼa jabʼil it kʼe katikon eluk jujuntik rebistaʼik sok poyetoʼik bʼa jun yal chʼin opisina bʼa wa xkʼulaxi rentar wa xkan bʼa Brooklyn, (Nueva York, Estados Unidos). Anima kʼe jkʼultikon imprimir tʼusan, ja wego ay kiʼojtikon 15 imprentaʼik bʼa tuktukil lugarik jastal bʼa África, América, Asia, Europa, sok Oceanía.

Ja jibrotikon mas tʼilan wa xkʼulaxi imprimir, jani ja Biblia. Bʼa jabʼil 1942, kʼulaxi imprimir ja bʼajtan Biblia ja bʼa imprenta kiʼojtikon jani jaʼ, King James Version. (Versión del Rey Jacobo). Sok bʼa 1961, ja taʼumantiʼik bʼa Jyoba wantikon yajel eluk june ita ja juʼun tsʼikan lek ja Traducción del Nuevo Mundo de las Santas Escrituras bʼa inglés. Sok jaxa bʼa 2013 jkʼulunejtikonxa imprimir mas ja 184 miyonik Bibliaʼik bʼa 121 kʼumalik.

Ja juʼunik eleli mini xchʼak yalkabʼtik spetsanil. Ja Bibliaʼik kʼulubʼal sok jastik junuk bʼa oj albʼuk lek. Ja juʼun wa xmakuni mini xkʼanbʼi, anima x-ekʼ jabʼil. Chomajkil, ja slamiki nokʼubʼal lek. Ja slekilal, jani ja Biblia mi x-jom wegoʼa anima jel xkatik makunuk.

Chomajkil wa xkʼulantikon imprimir juʼunik bʼa wa xkoltay ja ixuk winik bʼa oj yabʼye stojolil ja Biblia. La kiltik jujuntik datoʼik ja bʼa 2013.

• Ja La Atalaya jani ja juʼun ixaw ixaw wa x-eli. Wa xkʼulxi imprimir mas ja 210 kʼumalik sok jani ja mas pukxel ekʼ ja bʼa luʼumkʼinali. Bʼa jujune ja juʼunik it yiʼoj 16 slamik sok wa xkʼulxi imprimir junuk 45 miyonik.

• Ja ¡Despertad!, jas moj ja La Atalaya, jani xchabʼil juʼun mas pukxel ekʼ ja bʼa luʼumkʼinali. Sok wa xkʼulxi imprimir bʼa 99 kʼumalik. Bʼa jujune ja numeroʼik wa xkʼulxi imprimir junuk 44 miyonik.

• ¿Que enseña realmente la Biblia? jun juʼun bʼa tsats ja spatiki ay yiʼoj 224 slamik bʼa wa skolta ja matik wa spaklaye bʼa oj yabʼ stojolil ja jas wa sjeʼa ja Biblia. Man bʼa 2005 kʼulubʼal imprimir mas ja 42 miyonik ja juʼunik it bʼa mas ja 400 kʼumalik.

• Ja poyeto Kʼuʼan ja Dyosi ayiʼoj 32 slamik bʼa ja wa skolta ja matik mi snaʼawe skʼumajel juʼun. Wa xcholo ja jasa mas tʼilan wa sjeʼa ja Biblia sok ayiʼoj tsamal dibujoʼik sok yaljelik bʼa kut. Kʼulubʼal imprimir mas ja 42 miyonik bʼa mas ja 400 kʼumalik.

Pe mi kechanukta ja juʼunik it, ja taʼumantiʼik bʼa Jyoba wa xcha jkʼulantikon imprimir tuk juʼunik jastal; libroʼik, poyetoʼik sok tratadoʼik bʼa skoltajel ja ixuk winik bʼa oj staʼe ja sjakʼjel ja sjobʼjelik mas tʼilanik bʼa Biblia, yajni wa stʼaspune jun wokol sok jastal ajyel gustoʼil ja bʼa pamilya. Ja bʼa imprentaʼik kiʼojtikoni kʼulxi imprimir ja bʼa 2012 mas ja 1.300 miyonik rebistaʼik sok 80 miyonik libroʼik sok Bibliaʼik.

Ja naʼitsik bʼa wa xtax ja imprentaʼiki wa xkatikon sbʼiʼiluk Betel, wa stojolan «Snaj Dyos». Ja matik wa x-yulataye ja naʼitsik betel jelni cham xyilawe ja aʼtel wa xkʼulaxi bʼa yajel eluk ja juʼuniki: ixuk sok winik wa xyawe kʼebʼubʼal ja styempoʼe soka yipeʼi. Yajni wa xkʼotye ja bʼa Betel, tʼusan mi spetsaniluk mini wa snaʼawe jastal aʼtel bʼa jun imprenta. Stsʼakatal yuja tsamal xchapjele wa xyiʼaje wa xkoltajiye bʼa oj snebʼe bʼa jastal oj skʼuluke ja yaʼtele sok jelni wa xya slekilal. Jun sjejel, mini chamyiljel keremik bʼa yiʼoje junuk 20 jas sjabʼile bʼa wa x-aʼtijiye sok niwak makinaʼik bʼa jel wego wa x-aʼtiji bʼa wa xyawe eluk ja bʼa jun ora junuk 200,000 rebistaʼik bʼa yiʼoj 16 slamik.

Bʼa spetsanil ja aʼtel wa skʼulane ja Taʼumantiʼik bʼa yibʼanal ja luʼumkʼinali jani soka takʼin wa xyaʼawe sok spetsanil skʼujole. Ja rebista La Atalaya bʼa agosto 1989, naʼubʼal sbʼa ajyi jastal Zion’s Watch Tower (La Torre del Vigía de Sión), yala wani skʼuʼane lek ja Jyoba yeʼnani wa xkoltajiyeyuj. Tsaʼan yala: «[Ja jastal tsoman sok chapan ayotikon] mini oj kʼantikonyi takʼin ja ixuk winik bʼa oj skoltayotikon». Cha jachni wa xpensaraʼantikon ja wego.

¿Jas yuj jel xpilatik tyempo, takʼin sok kiptik ja bʼa aʼtel it? Yujni wa xkʼanatikon ja bʼa jujuntik miyonik ja Bibliaʼik soka juʼunik wa xkʼulantikon imprimir sok wa xkatikon kʼeʼuk ja bʼa Internet jani bʼa oj skoltaya ja weʼn, jastal jun lekil kʼumuman juʼun, bʼa oj mojxan soka Dyosi.