Jun ixuk sbʼiʼil Odval sok ti kulan bʼa Mongolia. Ja yeʼn mi snaʼa lek janekʼ ja sjabʼili, pes mi snaʼa jas jabʼilil pojki sok wa xyala bʼobʼta pojki bʼa 1921. Mini snaʼa skʼumajel juʼun, yujni kechanta waj jun jabʼil ja bʼa eskwela. Pes man yal xchʼinil tʼilani skoltay ja snantati bʼa stalnajel ja xchante jumasaʼ. Ajkʼachto ajiyi jun poyeto bʼa ayiʼoj jitsan sdibujoʼil sok jachuk snebʼa mas sbʼaja Dyosi soka jasa wa skʼana oj skʼuluk sbʼaja matik wa skʼuʼane ja yeʼn. Yajni snaʼa yibʼanal ja it jel aji gustoʼaxuk.

Ja poyeto it yawe eluk ja taʼumantiʼik bʼa Jyoba bʼa 2011, sok wa xtax bʼa chabʼ tikʼe. Xchabʼil ay yiʼoj jitsan dibujoʼik, pe ja stukil yiʼoj ja juni yujni mas ayiʼoj sletraʼil.

Ja jun mas ayiʼoj letraʼi wa sbʼiʼilan Kʼuʼan ja Dyosi sok oj ajyan sakʼan bʼa tolabida, ojxta sutxuk bʼa 583 kʼumal. Jaxa jun wa sbʼiʼilan Kʼuʼan ja Dyosi ojxta sutxuk bʼa 483 kʼumal. Ja poyeto it masni wa xtax bʼa jitsan kʼumal yuja juʼun yiʼoje ja Naciones Unidas (Declaración Universal de Derechos Humanos) pes ja bʼa octubre bʼa 2013, ja juʼun it sutubʼal bʼa 413 kʼumalik. Jaxa ja chabʼ poyeto ojxta staʼ ja 80 miyon juʼunik pukxel ekʼi.

Ja bʼa Brasil, jun ala awel ixuk jel gusto yila ja ajiyi ja poyeto Kʼuʼan ja Dyosi sok yala: «¡Jelni lek ja ay ixuk winik jastal ja weʼnlexi bʼa wa xchama kʼujolex ja ixuk winik jastal ja keʼni! Yuja mi xnaʼa skʼumajel juʼuni, mini wa xkiʼajkan jawa libroʼexi. Pe ja it ojni kikana».

Jun ixuk sbʼiʼil Brigitte, sbʼaj bʼa Francia, ja yeʼn mini cha snaʼa skʼumajel juʼun, yala: «Spetsanil kʼakʼu wa x-och jkʼel ja dibujoʼik yiʼoj ja poyeto it».

Jun taʼumantiʼ bʼa Jyoba bʼa Sudáfrica yala: «Ja poyeto it jani ja mas lek bʼa sjejelyi ja smeranil bʼa Biblia ja ixuk winik wa xkʼumaniye bʼa kʼumal chino. Wa xka makunuk bʼa sjejelyi ja matik jel yiʼoje xchapjeli soka matik mi snaʼawe skʼumajel juʼuni. Ja poyeto Kʼuʼan ja Dyosi sok oj ajyan sakʼan bʼa tolabida wa skoltayon bʼa sjejel ja smeranil bʼa Biblia bʼa tʼusan ita tyempo. Bʼa kechanta nalan ora wa xbʼobʼ jexuk ja jasa mas tʼilan wa sjeʼa ja Biblia».

Chabʼ taʼumantiʼ bʼa Jyoba bʼa Alemania wane sjejelyi bʼa Biblia jun nupanum bʼa jel yiʼoj xchapjelale bʼa eskwela. Ja tatamali jel cham yabʼ ja yajni yila ja poyeto sok yala: «¿Jas yuj mexa wiʼajexjanki ajyi ja poyeto it? Ja wego masni wa xkabʼ stojolil ja loʼilik soka yaljelik yiʼoj ja Biblia».

Jun ixuk mi xyabʼ kʼinal sbʼa Australia yala: «Ajyiyon jitsan jabʼil bʼa jun kʼole monja. Jelni kamigoʼe ajyi ja matik olomale ja bʼa Iglesia. Pe anima jachukuk mini maʼ sjeʼaki jasunkiluk ja Gobyerno bʼa Dyosi. Stsʼakaltal yuja dibujoʼik yiʼoj ja poyeto it, ja wego jnaʼata jasa wa stojolan ja yaljelik wa xtax ja bʼa Mateo 6:10».

Ja naʼits Betel yiʼoje ja taʼumantiʼik bʼa Jyoba ja bʼa Canadá, stsʼijbʼan: «Ja il jel ja ixuk winik swinkile bʼa Sierra Leona. Yajni yilawe ja poyeto it ja bʼa skʼumale krío, jitsan yalawe ja taʼumantiʼik bʼa Jyoba wani skʼujolane meran yijel och ja smeranil bʼa Biblia bʼa spetsanil ixuk winik. Jujuntik yaluneje ja it: ‹Ja weʼnlexi wani xchama kʼujolex bʼa keʼntikon, anima jitsan mi wa skʼulane›».