Ja bʼa México soka bʼa joʼe paisik bʼa Centroamérica, bʼa junuk 290 Taʼumantiʼik wa x-aʼtijiye bʼa sutjel ja juʼunik bʼa Biblia bʼa mas ja 60 kʼumaliki. ¿Jas yuj tʼilan skʼulajel ja aʼtel it? Yajni ja ixuk winik wa skʼumane ja juʼunik bʼa skʼumale, wego wa xyabʼye stojolil sok wa xkʼot man skʼujole (1 Corintios 14:9).

Bʼa oj kʼulaxuk lek ja sutjel, jujuntik sutumanik wa x-aʼtijiye bʼa opisinaʼik bʼa taʼumantiʼik bʼa Jyoba bʼa México wajyeta ja bʼa slugare bʼa wa xkʼumaxi ja skʼumaleʼi. Ja yuj, ja sutumaniki maxa ni mojan aye soka junxta skʼumaleʼi, sok jachuk yajel eluk mas juʼunik bʼa mi wokoluk xyabʼye stojolil.

¿Jas wa spensaraʼane ja sutumanik sbʼaja it? Federico, jun winik sutuman bʼa náhuatl bʼa Guerrero, yala: «Tʼusan skʼana oj tsʼikwuk ja lajune jabʼil ajyiyon ja bʼa chonabʼ México, kechanta jtaʼa jun pamilya wa xkʼumaniye ja jkʼumali. Pe ja wego, ja bʼa yal komonik bʼa wa xtax ja yajkʼachil opisina, tʼusan mi spetsaniluk wa xkʼumaniye».

Ja Karin, jun ixuk sutuman ja bʼa kʼumal bajo alemán waj bʼa Chihuahua (México), yala: «Ajyel lajan soka menonitas skoltunejon bʼa oj jnaʼ mas ja kʼumali. Teytikon sok ti wantikon aʼtel bʼa jun yal chʼin komoni soka yajni wala kʼelwanitikon bʼa bentana, wa xkilatikon ja ixuk winik matik oj yawe eluk slekilal ja kaʼteltikoni».

Ja Neyfi, jun ixuk sutuman bʼa maya tey bʼa Mérida (México), wa xyala: «Yajni wa xkʼulantikon estudioʼik bʼa Biblia jach bʼa maya, wa xkilatikon jaman lek ay yaljelik mi xyabʼye stojolil. Anto, ja bʼa sutjel wani xleʼatikon modoʼik bʼa yajel chiknajuk mas ja yaljeliki».

¿Jastal wa xyaʼawe el slekilal ja matik wa skʼumane ja juʼunik ja bʼa kʼumalik it? Jun sjeljel. Bʼa junuk 40 jabʼil, ja Elena, ja mero skʼumali jani ja tlapaneco, wajni jitsan semana ja bʼa tsomjelal ja bʼa taʼumantiʼik bʼa Jyoba bʼa kastiya. Pe ja smeranili mini xyabʼ stojolil ja jas wa xjexi. Ja yeʼn wa xyala: «Wani la wajyon ja tsomjelaliki yujni wa xnaʼa tʼilani oj wajkon». Pe yajni ja yeʼn kʼe spaklay ja Biblia soka poyetoʼik bʼa tlapaneco, takal takal och syajtay ja Jyoba man yayi ja sakʼanil sok yiʼaj jaʼ bʼa 2013. Ja Elena wa xyala: «Janekʼto tsʼakatal wa xkayi ja Jyoba yuja wa xya xkabʼ stojolil ja smeranili bʼa Biblia».