Ja taʼumantiʼik bʼa Jyoba wa xkʼulantikon ja janekʼ wa xbʼobʼi bʼa xcholjelyabʼ ja ixuk winik ja bʼa kʼumalik wa xkʼumaniye ja bʼa Irlanda sok Gran Bretaña. a Ja bʼa lugarik it, ja skʼumale jani ja inglés, cha tey ja gaélico escocés, galés ma irlandés.

Bʼa septiembre bʼa 2012, jexi jun yajkʼachil modo bʼa yajel makunuk ja sitio bʼa Internet jw.org bʼa jitsan kʼumalik, sok tey ja kʼumal irlandés sok ja galés. Bʼa agosto bʼa 2014 kʼe chʼikxuk ja kʼumal gaélico escocés. Chomajkil, wa xkʼulxi imprimir jitsan tuktukil juʼunik elel bʼa Biblia bʼa jitsan kʼumalik. ¿Jasa lajxel skʼulajel soka niwan aʼtel it?

Jun sacerdote bʼa jun iglesia yiʼajkan jun tratado ti elel bʼa Biblia bʼa kʼumal gaélico escocés soka yajni kʼe skʼumuki och el yalel sat. ¿Jasunkiluk ja nikjiyuji? Jelni cham yila ja jastal jel tsamal sutubʼal ja juʼuni sok ti yalaʼa: «¿Maʼ sutu ja juʼun it? ¡Jel tsamal sutubʼal!».

Junuk 750 ixuk winik ochye ja bʼa sitio jw.org bʼa gaélico escocés kechanta ja bʼa bʼajtan ixawi.

Jun maestro bʼa Universidad Nacional bʼa Irlanda, bʼa Galway, yala yabʼ jun Taʼumantiʼ mi skʼana sbʼaja relijyoni. Pe yajni yabʼ oj bʼobʼ ijukjanyi ja poyeto Ja Bibliʼa: ¿jas rason yiʼojani? bʼa kʼumal irlandés, skʼana june. Yala ja juʼunik bʼa Biblia ja ay bʼa skʼumal ja ixuk winik sbʼejni pasil oj staʼe sok yayile tsʼakatal ja taʼumantiʼik bʼa Jyoba yuja wa xyawe el juʼunik sbʼaja matik wa xkʼumaniye irlandés.

Jun ixuk ayxa yala jabʼil jel tsamal yila ja ajikanyi yuja Taʼumantiʼiki jun poyeto bʼa galés. Ja yeʼn yala: «Ja smeranili, lekukxta ja wawexki ja juʼun bʼa inglés, bʼobʼta mi oj kikan ajyi. Pe jel xkiʼaj gusto ja tsʼijbʼunubʼal bʼa jkʼumali».

Ja bʼa agosto bʼa 2014, aji kʼeʼuk ja bʼa jw.org mas juʼunik ja bʼa galés. Ja bʼa ixaw jaw, ja janekʼ ochye ja bʼa sitio bʼa skʼumajel ja juʼunik ja bʼa kʼumal jaw waj chabʼ ekʼele mas.

Bʼa jun ekʼele, yajni ja Jesús chʼak loʼilanuk jach jaman lek sok albʼel sok chabʼe ja bʼa snebʼumaniki sbʼaja Yabʼal Dyos, ja yeʼnle gustoxta yalawe: «¿Mi ma jel alegre huaj ja hua hualtzili cuando huan loil jan jmoctic ja ba beji, como jaʼ ni huan seejel quitic ja jas tzʼijbanubal ja ba slibro ja Diosi?» (Lucas 24:32). Yajni wa xjexiyi ja ixuk winik sbʼaja Biblia bʼa mero skʼumale, jitsan ekʼele jel alegre wa xwaj ja yaltsile yuja wa xyabʼye stojolil ja Yabʼal ja Dyos sok wa xkʼot stukbʼese ja sakʼanile.

Ja Emyr, jun winik bʼa Galés bʼa nupanel sok jun taʼumantiʼ bʼa Jyoba, mini skʼulan gusto ja srelijyon ja xcheʼumi. Pe yajni och yamigoʼuk jun Taʼumantiʼ sbʼiʼil Russell, tukbʼi ja spensari. ¿Jas yuj? Ja yeʼn wa xyala: «Yajni ja Russell yaki ja libro ¿Jasa wa sjeʼa meran lek ja Biblia? kala jbʼaj ojxa kʼe jpaklay ja Biblia, soka Russell yalakabʼ: ‹Ja libro it tsʼijbʼunubʼal bʼa galés, sok oj kʼe jpaklaytik lajan›». b ¿Jas yuj payjiyuj ja Emyr yajni aljyiyabʼ lajan oj spaklaye? Yeʼn wa xcholo: «Jchawaniltikon junxta ja jkʼumaltikon, junxta ja jkostumbretikoni sok wa xkabʼ jbʼajtikon stojolil». Yajni wa spaklaye bʼa galés, ja skʼujol ja Emyr «jel alegre» xwaj yujni wa xyabʼ stojolil.

Ja taʼumantiʼik bʼa Jyoba wani skoltaye ja ixuk winik bʼa oj snebʼ-e jas smeranil sbʼaja Biblia bʼa skʼumal yeʼnle, ja kʼumal wa xkʼot man kʼujolali.