Ja Watch Tower Bible and Tract Society of Pennsylvania jun institusyon, pe mi bʼa negosyoʼanel sok kujlaji bʼa jabʼil 1884 ja jastal wa skʼana ja leyik ja bʼa estado bʼa Pensilvania (Estados Unidos). Ja taʼumantiʼik bʼa Jyoba jani wa xyawe makunuk ja institusyon it bʼa skʼulajel ja yaʼtele bʼa yibʼanal ja luʼumi, sok ti chʼikan yajel elel Bibliaʼik sok tuk juʼunik bʼa Biblia.

 Ja xchol yiʼoj ja institusyon it jani sbʼaja «relijyon, chapjelal sok koltanel». Pe ja xchol mas tʼilani jaʼa «xcholjeli sok sjejel sbʼaja sGobyerno ja Dyos bʼa wan yajel mandar ja Jesús». Wa xkʼot ajyuke ja bʼa institusyon it ja matik wa xlokjiyeʼi sok mi jaʼuk yuj ja janekʼ takʼin yaʼunejeʼi. Ja matik teye ja bʼa institusyon it ja wane skoltajel ja Tsome Tojwanum bʼa taʼumantiʼik bʼa Jyoba.

 Pilan yuja Watch Tower Bible and Tract Society of Pennsylvania, ja taʼumantiʼik bʼa Jyoba ay kiʼojtikon tuk bʼiʼilal jastalni wa skʼana ja leyi ja bʼa tuk chonabʼiki. Jastal ja «Watch Tower», «Watchtower» ma jastalni wa sutxi ja bʼiʼilalik it.

 Man kʼe kujlajuk, akʼubʼal eluk jitsan slekilal. Jastalni wa xtax ja bʼa koʼeli.

•   Wa stsʼijbʼaxi juʼunik sok yajel eluk. Kaʼojtikonxa eluk junuk 220 miyon Bibliaʼik sok mojan mi staʼa ja 40,000 miyon tuk juʼunik bʼa Biblia bʼa mas ja 700 kʼumalik. Stsʼakatal ja sitio bʼa Internet jw.org, ja ixuk winik wa xbʼobʼ skʼumuke ja Biblia jach kʼebʼubʼal bʼa mas ja 120 kʼumalik sok stajel ja sjakʼjel ja sjobʼjelik jastal it: «¿Jasunkiluk ja Gobyerno bʼa Dyosi?».

•   Chapjelal. Wa x-axi sjejelik bʼa Biblia. Jun sjejel, man jabʼil 1943, ja chapjelal wa xyaʼa ja Eskwela bʼa Biblia bʼa Galaad sbʼa Watchtower bʼobʼelyuj xchapjel mas ja 8,000 taʼumantiʼik bʼa Jyoba bʼa oj aʼtuke jastal misioneroʼik ma yajel tsʼunan lek ja aʼtel bʼa xcholjel wan kʼulaxel bʼa yibʼanal ja luʼumi. Chomajkil, jitsan miyon ixuk winik sok bʼa mi Taʼumantiʼuke wa x-ajiyile xchapjelal ja bʼa tsomjelik bʼa kongregasyon wa xkʼulaxi ja bʼa semanaʼiki. Chomajkil wa chapxi eskwelaʼik bʼa snebʼjel juʼun sok kaʼojtikon eluk jun juʼun bʼa 110 kʼumalik bʼa jachuk ja ixuk winik oj snebʼ-e stsʼijbʼajel sok skʼumajel juʼun.

•   Aʼtel bʼa koltanel. Wala koltanitikon yajel jastik junuk wa xmakuniyujile ja matik wa x-ekʼ sbʼaje wokol yuj smul ja ixuk winik ma yuj desgrasyaʼik yuja mal tyempo. Jun sjejel, jkoltaytikon ja matik yiʼaje wokol bʼa ajyi jitsan milwanel ja bʼa Ruanda bʼa 1994, soka terremoto ekʼ ja bʼa Haití ja bʼa 2010.

 Jelni jitsan ja jastik lajxel skʼulajel soka institusyonik it, pe mini jaʼuk ja mero kaʼteltikoni. Jujunexa ni ja kʼuʼuman Dyos yiʼoj ja cholal bʼa xcholjel sok sjejelyi ja ixuk winik ja rasonik bʼa Biblia (Mateo 24:14; 28:19, 20). Jkʼuʼunejtikon lek ja Dyos yeʼn wa xkoltani bʼa skʼulajel ja aʼtel it sok «yen huax ya qʼuiuc» (1 Corintios 3:6, 7).