Miyuk, ja taʼumantiʼ bʼa Jyoba mi jun sectaʼuk. Snochumanotikon ja Jesús sok wa xkʼulantikon ja janekʼ wa xbʼobʼ kujtikoni bʼa snochjel ja jasa skʼulani sok skʼulajel ja bʼa jsakʼaniltikon ja jasa sjeʼakani.

 Ay tuktukil spensarajel sbʼaja jasunkiluk jun secta. La kiltik chabʼe ja bʼa it sok jas yujil ja mini jun sectaʼuk ja taʼumantiʼik bʼa Jyoba.

•   Bʼa jujuntik wa xyalawe jun secta jun yajkʼachil relijyon sok mi wa snochowe ja jasa wa skʼulane ja bʼa relijyon el jani. Ja taʼumantiʼik bʼa Jyoba mi jkʼulunejuktikon jun yajkʼachil relijyon. Jani wa xnochotikon ja jasa skʼulane ja bʼajtan snochumanik ja Jesús, pes ja jasa sjeʼaweʼi sok skʼulaneʼi tini elel bʼa Biblia (2 Timoteo 3:16, 17). Jkʼuʼunejtikon lek jani ja Biblia wa sjeʼa ja jastal oj katikyi stoyjel ja Dyosi.

•   Bʼa jujuntik wa xyalawe jun secta jani jun relijyon bʼa jel xiwela sbʼaj sok wa snochowe jun olomal. Bʼa sbʼajtanil, ja taʼumantiʼik bʼa Jyoba mi wa xnochotikon jun winik ma ixuk, pes jani wa xkiʼajtikon ja yaljelik yala yabʼ ja Jesús ja snebʼumaniki: «Quechan june ja hua jepeexi, jaʼ ni ja Cristo» (Mateo 23:10).

 Jaʼukto maʼ cha xiwelaʼuk sbʼaj, ja relijyon kiʼojtikoni wa xya katikon el slekil ja keʼntikoni soka tuk ixuk winiki. Jun sjejel, ja lekil rason wa xcholotikoni skoltunej jitsan ixuk winik bʼa oj yaʼekan ja yujel trago soka yabʼjel droga. Chomajkil, jastalni aʼtel bʼa xcholjel wa xcha jeʼatikon skʼumajel sok stsʼijbʼajel juʼun bʼa yibʼanal ja luʼumi, sok stsʼakatal ja it jitsan mil ixuk winik snebʼuneje skʼumajel sok stsʼijbʼajel juʼun. Chomajkil wa xcha jkʼulantikon aʼtel bʼa koltanel bʼa yibʼanal ja luʼumi ja bʼa wa x-ekʼ desgrasya. Wani xkʼulantikon ja janekʼ wa xbʼobʼ kujtikoni bʼa skʼulajelyi ja bʼa lek ja jmojtikoni, jastalni sjeʼakan ja Jesús (Mateo 5:13-16).