¿Jas yuj mi xwajye bʼa kʼakʼanel ja taʼumantiʼik bʼa Jyoba?

STSANJEL BʼA

Ja taʼumantiʼik bʼa Jyoba mi la wajtikon bʼa kʼakʼanel yuja rasonik it:

Juni mandar bʼa Dyos. Ja Biblia wa xyala ja yaʼtijumik Dyosi tʼilani «ja yespadaʼeʼi oj ya paxuke yaʼtubʼ bʼa alaj» sok mokxa ni snebʼ-e mas ja kʼakʼaneli (Isaías 2:4).
Juni mandar bʼa Jesús. Ja jekabʼanum Pedro ajiyi ja mandar it yuja Jesús: «A och ba snaj ja hua machiti. Ja maʼ huas syama ja machiti, jach ni oj chamuca» (Mateo 26:52). Soka yaljelik ti, ja Jesús ya chiknajukan ja snebʼumaniki mini oj syam-e ja yamkʼabʼalik bʼa kʼakʼaneli.

Chomajkil ja Jesús yala ja snebʼumaniki «mi sbajuque ja mundo». Ja yuj, tʼilani mok xchʼik sbʼaje ja bʼa politika (Juan 17:16). Chomajkil, mini lekuk ja kontra oj ajyuke soka kʼakʼanumiki sok stimjel ja tuk bʼa mi oj ochuke kʼakʼanum.
Ja snochumane Kristo tʼilani oj syajtay ja smojeʼi. Ja Jesús yalyabʼ ja snebʼumaniki: «Pero oj cho caa huilex jun mandar yajcʼachil. Yaj xa huab abajex ja huenlexi» (Juan 13:34, 35). Ja meran snochumane Kristo jun ita pamilya aye bʼa sutanal ja luʼumi sok mini syama syamkʼabʼe bʼa tiroʼanel soka smojeʼi (1 Juan 3:10-12).
Ja bʼajtan snochumanik ja Kristo mini wajye ja bʼa kʼakʼaneli. Ja Encyclopedia of Religion and War wa xyala «ja bʼajtan snochumanik ja Kristo mini skisawe ja kʼakʼaneli sok mini cha ochye jastal kʼakʼanumik», pes wa snaʼawe skʼulajel ja jaw jumasaʼ «mini wa slaja sbʼaj soka yajtanel sjeʼakan ja Jesús soka syajtajel ja skontraʼe jumasaʼ». Soka bʼa sjuʼun Historia de la decadencia y caída del Imperio romano, ja tsʼijbʼanum bʼa Gran Bretaña Edward Gibbon yala: «Mini x-ochye kʼakʼanumik ja snochumane Kristo [...] ta mi yaʼunejukekan jun cholal mas chaʼanyabʼalili».

Ja jas wa xkʼulantikoni wa xkoltani bʼa jlekilaltik

Ja taʼumantiʼik bʼa Jyoba ixuk winiki jel xkoltaniye ja bʼa jlekilaltiki sok mini ay smaloʼil sbʼaja jlugartiki ma xiwela sbʼaj bʼa ay jas oj skʼuluke. Pes wani xkisatikon ja cholal yiʼoje ja gobyerno jumasaʼ, jachuk wa xkʼuʼantikon ja mandarik it bʼa wa xtax bʼa Biblia:

«Sbej ni oj cʼuaxuc ja maʼ ay yatel.» (Romanos 13:1.)
«Aahuic yi ja César ja ba sbaji, jaxa jas sbaj ja Diosi, aahuic yi.» (Mateo 22:21.)

Yuja it, wa xkʼuʼantikon ja ley jumasaʼ, wa xtuputikon ja impuestoʼiki sok wa xkʼulantikon ja jas wa xyala ja gobyerno oj kʼulaxuki bʼa wa xkoltani ja bʼa jlekilaltik ja bʼa komoni.