Lom yaljelik: Ja taʼumantiʼik bʼa Jyoba mi skʼintaye ja Navidad yujni mi skʼuʼane bʼa Jesús.

 Smeranil: Snochumanotikon ja Kristo sok wani xkʼuʼantikon kechanta yuja yeʼn oj taxuk ja jsakʼaniltiki (Hechos 4:12).

Lom yaljelik: Wa spilawe ja pamilyaʼik yuja wa sjeʼaweyi ja smoje mok skʼintaye ja Navidad.

 Smeranil: Ja jastal aji kujlajuk ja pamilya jelni ay stʼilanil sbʼaja keʼntikoni. Sok wa xjeʼatikon jastik junuk bʼa Biblia bʼa wa stsatsankʼujolan ja pamilyaʼiki.

Lom yaljelik: Mi xyabʼye stsamalil ja «kʼin bʼa Navidad», ja yajel majtanal, ja ajyel slamanil sok yabʼjel stsamalil ja bʼa kʼakʼuʼik jawi.

 Smeranil: Wa xleʼatikon modo bʼa ajyel laman sok bʼa yajel majtanalik chikan jas kʼakʼujil ja bʼa jabʼili (Proverbios 11:25; Romanos 12:18). Jun sjejel, mi xkʼanatikon takʼin ja bʼa jtsomjeltikoni cha mini xyama jtsʼakoltikon yuja wa xcholotikoni, pes wani xkʼuʼantikon ja mandar yaʼa ja Jesús: «Mi amanunejuquex. Jayuj mi sbejuc oja cʼuluquex cobrar ja huenlex chomajquili» (Mateo 10:8). Chomajkil, wa xcholotikon ja sGobyerno ja Dyosi kechantani yeʼn oj yijankitik slamanil (Mateo 10:7).

•   Ja Jesús yaʼa mandar oj ka juljkʼujoltik ja xchamelali, mi jaʼuk ja spojkelali (Lucas 22:19, 20, Ja yajkʼachil sju‘unil ja dyosi).

•   Mini ja sjekabʼanumik ja Jesús cha mini ja bʼajtan snochumaniki, mini skʼintaye ja Navidad. Ja Diccionario del cristianismo wa xyala ja kʼin it «kujlaji bʼa Roma bʼa 330» ja bʼa jtyempotiki, mas ja chabʼ siglo tsaʼan yajni cham ja tsaʼanxta ja bʼa sjekabʼanumi.

•   Mini ay jun jasunuk bʼa wa sjeʼa ja Jesús pojki bʼa 25 bʼa diciembre, ja Biblia mini wa xyala jas kʼakʼujil pojki.

•   Wa xkabʼtik stojolil ja Dyos mi lek xyila ja kʼin bʼa Navidad, pes tini eleljan bʼa kostumbreʼik sok bʼa jastik jun skʼulajel bʼa mi ti jakeluk bʼa Dyos (2 Corintios 6:17).

 Anima ja ixuk winiki wa snaʼawe ja skʼintajel ja Navidad mi wa slaja sbʼajsok ja jas wa xyala ja Biblia sok mini sbʼajuk Dyos, jitsan wani skʼulane spensarajel mi jel chaʼanyabʼaliluk sok mini ay smaloʼil snochjel ja tuki.

 Ja Biblia wa xyalakabʼtik oj katik makunuk ja jpensartiki bʼa keʼn oj jpensaraʼuktik jasa oj jkʼuluktiki (Romanos 12:1, 2). Cha wa sjeʼakitik tʼilani oj kiltik chaʼanyabʼalil ja smeranili (Juan 4:23, 24). Mi yuj mi xkisatikon ja jas wa spensaraʼan ja tuk sbʼaja keʼntikoni, pe mini cha xkʼanatikon skʼokjel ja rasonik bʼa Biblia yuj snochjel ja tuki.

 Ja keʼntikon mini wa xkʼintaytikon ja Navidad, sok bʼa jujuneʼotik keʼni oj jpensaraʼuktik jasa oj jkʼuluktik sbʼaja it. Snajel ja it, mini maʼ wa xmakatikon bʼa mok skʼuluk.