¿Jasa oj jkʼuluk b’a oj kʼotkon jun taʼumantiʼ b’a Jyoba?

STSANJEL BʼA

Ja bʼa Mateo 28:19, 20, ti wa xyala ja Jesús ja jastik tʼilan oj kʼulaxuk bʼa kʼotel jun taʼumantiʼ bʼa Jyoba. Ja bersikuloʼik it wa xyala bʼa kʼotel jun snochuman ja Kristo, jelni tʼilan xcholjel bʼa Jyoba.

Bʼajtan: Snebʼjel ja jas wa xyala ja Biblia. Ja Jesús sjeʼayi ja snebʼumaniki bʼa oj ya ochuk «nebumanil ja cristiano jumasa» sok sjejelyile «ba oj scʼuuque spetzanil ja [s]mandari» (Mateo 28:19, 20). Ja yaljel «nebuman» wa stojolan «june maʼ wanto snebʼjel». Ja bʼa Biblia, sok mas sbʼaja jastik sjeʼa ja Jesús, jelni xkoltani bʼa oj ajyukotik meran gusto sok bʼa oj jtatik stojolil ja jsakʼaniltiki (2 Timoteo 3:16, 17). Jelni oj yakitikon gusto sjejelawi ja jas wa xyala ja Biblia bʼa jun estudio jach kʼebʼubʼal bʼa Biblia (Mateo 10:7, 8; 1 Tesalonicenses 2:13).

Xchabʼil: Skʼulajel ja jastik waxa nebʼa. Ja Jesús yala ja snebʼumaniki mi kechanta oj snebʼ-e, chomajkil ojni skʼuʼuke spetsanil ja jastik sjeka skʼulajeli (Mateo 28:20). Ja it mi wa stojolan spaklajel ja Biblia bʼa kechanta lom sbʼutʼjel ja kolomtik sok jastik junuk. Bʼobʼta ojni jtukbʼestik jujuntik jastik ja bʼa jmodotik ma jani ja jpensartiki (Hechos 10:42; Efesios 4:22-29; Hebreos 10:24, 25). Ja matik wa skʼuʼane ja smandarik ja Jesús wani xjutbʼijiye bʼa oj snoch-e sok, yuja jaw, wa xyaweyi ja sakʼanile ja Jyoba bʼa yaʼteltajel (Mateo 16:24).

Yoxil: Yijel jaʼ (Mateo 28:19). Ja Biblia wa xya slaj ja yijel ja’i soka smukjelal chamwiniki (k’ela ja Romanos 6:2-4). Ja yijel ja’i wa senyaʼan b’a chamtikta sok ja poko jmodotik kiʼojtik ajyi sok oj jtultik sok ja yajkʼachili. Ja yuj, yajni wa xkiʼajtik ja’, wantik sjejelyi ja tuk b’a wantikxa skʼulajel ja bʼajtani sok ja xchabʼil ja b’a jastik sjeʼakan ja Jesusi, sok b’a wa xkʼanatik ja Dyos ayakitik jun jkʼujoltik b’a laman (Hebreos 9:14; 1 Pedro 3:21).

¿Jastal oj bʼobʼ jnaʼ chapanxa ayon b’a yijel ja’?

Alayabʼ ja ansyanoʼik b’a wa kongregasyoni, sok ja yeʼnle ojni staʼa loʼil b’a sjobʼjelawi ta waxa wabʼ stojolil ja jas wa sjeʼa ja Biblia, b’a wana skʼulajel ja jas wana snebʼjeli sok b’a waxa kʼana oja kʼuluk ja jas wa skʼana ja Dyosi (Hechos 20:28; 1 Pedro 5:1-3).

¿Junxta maʼ oj cha snoch-e skʼulajel ja modoʼik it ja yuntikil ja Taʼumantiʼiki?

Junxtaniʼa. Wani xkatikon kʼiʼuk ja kuntikiltikon ja b’a «bʼeji bʼa oj skʼu‘uk oj skis‘e‘ lek ja kajwaltiki» (Efesios 6:4, YD). Pe yajni wa xkʼiye’i, yeʼnleni wa stsaʼawe ja sbʼej wa skʼanawe snebʼjel sok skʼuʼajel ja jas wa sjeʼa ja Biblia bʼa oj kʼot yiʼe jaʼ (Romanos 12:2). Ja smeranili, jujunexani ja keʼntik oj jtsatik ta wa xkʼanatik oj kaʼteltaytik ja Jyoba ma miyuk (Romanos 14:12; Gálatas 6:5).