Ja Taʼumantiʼotikoni wa xnochotikon ja rasonik wa xyaʼa ja Biblia sbʼaja nupaneli sok skʼutsjel ja nupaneli. Ja Dyos skʼulan ja nupaneli sok wani skʼana ja tatamali soka cheʼumali aʼajyuke lajan bʼa tolabida. Ja Biblia wa xyala oj bʼobʼ kʼutsxuk ja nupaneli pe jaʼ ta june bʼa yeʼnle koʼ mulal sok pilan ixuk ma winik (Mateo 19:5, 6, 9).

 Waniʼa. Ja it ja jujuntik yamkʼabʼalik wa xkatikon makunuk:

•   Juʼunik. Ja bʼa juʼunik kiʼojtikoni tikʼanxta yiʼojan jastik junuk bʼa wa xya tsatsbʼuk ja nupanumiki, chomajkil ja b’a lajansok ojxta jomuki. Jujuntik sjejel, kʼela ja artikuloʼik «Cómo fortalecer el sentido del compromiso en el matrimonio», «Cómo perdonar» sok «Cómo recuperar la confianza perdida».

•   Tsomjelik. Ja tsomjelik wa xkʼulantikon ja bʼa semana, jastalni ja bʼa niwan tsomjeliki, wa xpaklaytikon ja rasonik jel xmakuni wa xyaʼa ja Biblia sbʼaja nupanumiki.

•   Ansyanoʼik. Ja ansyanoʼiki, ma ja matik kajan sbʼaj skʼeljel ja kongregasyoni, wa xyaweyi skoltajel ja nupanumiki skʼumajel lajan soka yeʼnle tekstoʼik bʼa Biblia jastal ja Efesios 5:22-25.

 Miyuk. Ja ansyanoʼiki wani xbʼobʼ skoltaye ja nupanumik bʼa stojbʼesjel ja swokoleʼi, pe mini ayiʼoje derecho bʼa yaljel yabʼye jasa oj skʼulukeʼi (Gálatas 6:5). Ta june skʼutsu ja snupaneli, pe mi jaʼuk yuja rason wa xyaʼa ja Biblia, mini oj bʼobʼ syam chaʼan cholalik ja bʼa kongregasyoni sok mini xcha bʼobʼ nupanuk yajkʼachil ekʼele jastalni wa xyala ja Biblia (1 Timoteo 3:1, 5, 12).

 Ja Biblia wa xyayi rasonik ja nupanumik bʼa aʼajyuke lajan anima x-ekʼ sbʼaje wokolik (1 Corintios 7:10-16). Jitsan wokolik ojni bʼobʼ tojbʼuk skʼanjelyi ja skoltanel ja Dyos bʼa orasyon, yajel makunuk ja rasonik bʼa Biblia sok sjejel wa syajtay sbʼaje (1 Corintios 13:4-8; Gálatas 5:22).

 Pe jujuntik yaʼtijumik Dyos spensaraʼunej spiljel sbʼaje yuj jujuntik jasunuk bʼa jelxelxa jastal ja it:

•   Mi xkʼanxi smakʼlajel ja pamilya (1 Timoteo 5:8, TNM).

•   Jelxelxa skʼuljel maltratar (Salmo 11:5).

•   Jastik junuk jel xiwela sbʼaj bʼa ajomuk ja jastal wa xyila sbʼaj soka Dyosi. Jun sjejel, june bʼa yeʼnle stʼena ja snupi bʼa a-skʼok ja smandar ja Dyosi. Ja yaʼtijum Dyos maʼ wa xtʼenji ojni bʼobʼ spil sbʼaj pe ja ita bʼa oj skʼuʼuk «bajtan ja Diosi, tzaan [...] ja cristiano» (Hechos 5:29).