Ja taʼumantiʼik bʼa Jyoba yaʼuneje makunuk tuktukil tikʼe Bibliaʼik bʼa spaklajel. Pe jelni chaʼanyabʼalil wa xyilawe ja Traducción del Nuevo Mundo de las Santas Escrituras —elel bʼa jitsan kʼumalik— pes jani yuj ja jastal wa xya makunuk ja sbʼiʼil ja Dyosi, tsʼikan lek ja jasa wa xyala sok wa x-abʼxi stojolil.

•   Yajel makunuk ja sbʼiʼil ja Dyosi. Mi spetsaniluk ja matik wa xyawe eluk ja Biblia wa xyawe chaʼanbʼuk ja sbʼiʼil ja mani mero yajwalil ja Biblia. Jun sjejel, june ja bʼa Biblia sutubʼali wa xya chiknajuk ja sbʼiʼil mas ja 70 ja matik koltaniye bʼa oj bʼobʼ eluki, pe mini jun ekʼele yawe chiknajuk ja sbʼiʼil ja mani mero Yajwalil ja Biblia: ja Jyoba.

   Ja yajni tsʼijbʼaxi ja Biblia wa xchiknaji jitsan ekʼele ja sbʼiʼil ja Dyosi, soka ja Traducción del Nuevo Mundo jachni cha yaʼunej chiknajuk ja sbʼiʼil ja Dyosi. Pe mi wa xya chiknajuk ja matik sutuweʼi.

•   Tsʼikan lek ja jasa wa xyala. Jujuntik ja bʼa Biblia sutubʼali mi tsʼikanuk lek ja jas wa xyala jastalni ja bʼa tsʼijbʼaxiʼi. Jun sjejel, jujuntik sutuneje jachuk ja Mateo 7:13: «Ochanik ja bʼa chʼin pwerta. Ja niwan pwerta sok ja niwan bʼeji jani wa xyiʼajotik och ja bʼa inpierno». Pe ja yajni tsʼijbʼaxi ja Biblia mi wa xyala «inpierno», wa xyala «jchʼayelaltik». Bʼobʼta ja matik sutuweʼi spensaraʼane ja matik malo wa x-aji yiʼe wokol tolabida bʼa yoj inpierno. Pe ja Biblia mi jachuk wa xyala. Ja yuj, ja Traducción del Nuevo Mundo wa xyala «chʼakelal», jastalni wa xyala ja bʼa mero tsʼijbʼaxi ja Yabʼal ja Dyosi.

•   Wa x-abʼxi stojolil. Meran, jun lekil sutjel tʼilani tsʼikan lek oj sutxuk ja jas wa xyala, pe tʼilani oj cha abʼxuk stojolil. La kiltik jun sjejel. Ja bʼa 1 Pedro 1:13, ja jekuman Pedro ya makunuk ja yaljel wa stojolan «mochowik ja snalan jawa pensarexi». Ja yaljelik it mi x-abʼxi stojolil ja bʼa jtyempotiki, ja yuj ja Traducción del Nuevo Mundo sutu ja bersikulo it jastal «chapa jawa pensarexi sbʼaja aʼteli».

 Yawe chiknajuk ja sbʼiʼil ja Dyosi, sutubʼal tsʼikan lek sok wa x-abʼxi stojolil ja jas wa xyala, pe aytoni jun jasunuk bʼa wa sjeʼa tukni ja Traducción del Nuevo Mundo: pes wa xpukxi ekʼ jach kʼebʼubʼal. Jachuk, jitsan ixuk winik wa xbʼobʼ skʼumuke ja Biblia jach bʼa skʼumale anima mey yiʼoje takʼin bʼa oj bʼobʼ sman-e jun Biblia.