Ja taʼumantiʼotikon bʼa Jyoba jel jgustotikon yaljel yabʼ bʼa Biblia spetsanil ixuk winik, chomajkil ja matik yalaweta kabʼtikon mi skʼanaweʼi. ¿Jas yuj? Yujni wa xyajtaytikon ja Dyosi sok ja ixuk winiki (Mateo 22:37-39). Ja yajtanel kiʼojtikon bʼa Dyosi wa snikawotikon bʼa oj jkʼuʼuktikon ja mandar yaʼa ja yunini bʼa «oj huaj loiltaticon ja yabali» bʼa «spetzanil ja cristiano» (Hechos 10:42; 1 Juan 5:3). Ja yuj, mini xkaʼatikonkan yijel och ja rason bʼa Biblia bʼa spetsanil ja ixuk winiki, jastalni skʼulane ja alumanik bʼa tyempo najate (Jeremías 25:4). Sok ja yajtanel kiʼojtikon sbʼaja ixuk winiki wa snikawotikon bʼa xcholjel yabʼ spetsanile ja lekil rason sbʼaja sGobyerno ja Dyosi, chomajkil ja matik mi skʼanaweʼi, pes ojni bʼobʼ ajuk staʼ sakʼanile (Mateo 24:14).

 Sok yajni wala kumxitikon bʼa snaje ja matik mi skʼanaweʼi, jitsan ekʼele ayni wa xtaʼatikon pilan bʼa wa skʼana oj smaklay. Jani it jujuntik ja rasonik yuja wala kumxitikoni:

•   Ja ixuk winiki wa stukbʼes slugare.

•   Ja tuk matik tey ja bʼa naʼitsi wa skʼana oj smaklaye.

•   Ja ixuk winiki wa xtukbʼiye. Ja jastik wan ekʼel ja bʼa luʼumkʼinali ma ja jastal wa tax ja ixuk winiki oj bʼobʼ ijuke och bʼa oj snaʼe «jel ajul ja sbaje ja ba sti sat ja Diosi» sok oj skʼan-e snajel mas sbʼaja Biblia (Mateo 5:3). Chomajkil, ja matik kontra wa xyilawe ja jas wa xcholotikoni oj bʼobʼ tukbʼuk ja jastal spensaraneʼi, jastalni skʼulan ja jekabʼanum Pablo (1 Timoteo 1:13).

 Pe mini bʼa jun ekʼele wa xtʼenatikon ja ixuk winik bʼa a-smaklayotikone (1 Pedro 3:15). Wani xkʼuʼantikon bʼa jujune yeʼnani oj spensaraʼuk jas relijyon oj ajyukyuj (Deuteronomio 30:19, 20).