¿Ay maʼ yiʼoje ja taʼumantiʼik bʼa Jyoba jun lista bʼa pelikulaʼik, kʼinik ma libroʼik bʼa mi xbʼobʼ yawe makunuk?
Miyuk. Ja jrelijyontikoni mi wa spaklaye ja pelikulaʼik, kʼinik sok mini libroʼik bʼa oj yil-e jasa mi oj yawe makunuki. ¿Jas yuj?
Ja Biblia wa xyala kibʼanaltik tʼilani oj jnatik stsajel ja bʼa leki sok ja bʼa mi lekuki (Hebreos 5:14).
Ja Biblia ayiʼoj rasonik bʼa wa xkoltani oj jnatik stsajel ja bʼa lek ja jas wa xmaklaytik ma wa xkʼelatiki. a Jastalni bʼa tuk jas junuk wa xkʼulantik ja bʼa jsakʼaniltiki, wani xkʼana oj jkʼuluktik ja jas wa xyala ja Efesios 5:10 bʼa wa xyala: «Cʼulanic fuerza ba oja nebex ja jas huas scʼana ja Cajualtiqui».
Ja Dyosi yaʼoj yi ja olomalik bʼa pamilya jun tikʼe cholal, ja yuj yeʼnani ayiʼoje ja derecho bʼa yaljel yabʼ ja spamilya ja jasa mi lekuki (1 Corintios 11:3; Efesios 6:1-4). Pe ja bʼa kongregasyoni, mini maʼ ay yiʼoj ja cholal bʼa yaljel mi lekuk skʼeljel ma smaklajel jun tikʼe pelikula, kʼin ma tuk jastik junuk jastal jaw (Gálatas 6:5).
a Jujuntik sjejel, ja Biblia wa xyala mini lekuk skʼulajel ja jastik ti chʼikan soka aʼtel bʼa pukuji, koʼel mulal sok june mi jaʼuk jawa cheʼumi ma wa tatami sok ja spekʼjel chikʼi (Deuteronomio 18:10-13; Efesios 5:3; Colosenses 3:8).
