Miyuk. Ja keʼntikoni wa xnaʼatikon mini ti oj jtaʼ ja jsakʼaniltikon yuja wa xcholotikon bʼa naʼits naʼitsi (Efesios 2:8). ¿Jas yujil?

 Pensaraʼan sbʼa jun winik wa xcham skʼujol sbʼaja tuki sok skʼapa oj yayi jun majtanal jel chaʼan stsʼakol bʼa spetsanil ja maʼ oj wajuk ja bʼa lugar sok ja bʼa kʼakʼu yeʼn oj yali. Ta ja winiki sjeʼunejxa kitik pilan ekʼele ojni yakitik meran ja jas wa skʼapa, ¿mi maʼ meranuk ojni wajkotika? Ojniʼa. Sok mi kechanuk, ojni cha kaltik yabʼ ja jpamilyatiki soka kamigotiki bʼa oj cha wajuke ja yeʼnleʼi. Pe mini maʼ wa sbʼajin ja majtanal jaw jata yuj snochjel ja jasa wa xyala ja winiki. Pes ja jaw juni majtanal sok mi manubʼaluk.

 Junxtani soka jaw, ja taʼumantiʼik bʼa Jyoba wani xjipa jkʼujoltikon ja Dyosi ojni skʼuluk meran ja jasa skʼapuneji bʼa yajelyi jun sakʼanil bʼa tolabida ja matik kʼuʼabʼal aye soki (Romanos 6:23). Sok yuja wa xkʼanatikon ja tuk ixuk winik a-staʼ ja sakʼanile ja yeʼnleʼi, ja yuj wa xcholotikon yabʼye ja janekʼ wa xbʼobʼ kujtikoni. Pe wani xnaʼatikon ja skʼulajel ja aʼtel jaw mini ti oj jtaʼ ja jsakʼaniltikoni (Romanos 1:17; 3:28). Ja smeranili, mini jas wa xbʼobʼ jkʼuluktik bʼa jbʼajuktik niwan majtanal wa xyaʼa ja Dyosi. Pes ja Biblia wa xyala: «Mi jauc oj caltic que ay jas lec jcʼulantic. Miyuc. Quechan yuj ja syajal scʼujoli, jayuj stalna jyaujulaltic» (Tito 3:5).