Ja taʼumantiʼotikon bʼa Jyoba wa xkʼuʼantikon ja rason bʼa Biblia bʼa mini tolabida wa xjakʼatikon ja yajni wa xleji jmultikon ma ja wala kʼenajitikoni. Jun sjejel, jun proverbio bʼa Biblia wa xyala: «Ja maʼ wa stojo ja kʼenanumi kechanta wa xkokan kʼixwel» (Proverbios 9:​7, 8; 26:4). Mi jawa xwaj jkʼujoltikon kʼeʼel kʼumal sok yaljel mi meranuk ja yajni wa xleji lom jmultikoni, jani wa xwaj jkʼujoltikon yajel gustoʼaxuk ja Dyosi (Salmo 119:69).

 Meraniʼa, ay «tyempo bʼa ajyel chʼabʼan sok tyempo bʼa kʼumanel» (Eclesiastés 3:7). Ja yuj, wa xjakʼatikonyile ja matik wa skʼana oj snaʼe ja smeranili, pe mini xkʼanatikon ja kʼeʼel kʼumal bʼa mini xmakuni. Jachuk wa xnochotikon ja jasa sjeʼa soka jasa skʼulan ja Jesús soka bʼajtan nochumaniki.

•   Ja Jesús kan chʼabʼan ja yajni lom leji smul bʼa stiʼ sat ja Pilato (Mateo 27:11-​14; 1 Pedro 2:​21-​23). Cha mini sjakʼa ja yajni lom leji smul junbʼi yakbʼum sok jel xwaʼi. Jaʼukto maʼ jaw, ja yeʼn yaʼakan ja jastik wa skʼulani akʼumanuk sbʼaja yeʼn, jastalni wa xyala ja rason it: «Ja biboʼili wa sjeʼa tojni lek yuja jastik wa skʼulani» (Mateo 11:19). Pe ja yajni tʼilan oj skʼuluki mini tʼun xiw bʼa sjakʼjelyi ja matik lom sleʼaweyi smuli (Mateo 15:​1-3; Marcos 3:​22-​30).

   Ja Jesús sjeʼayi ja snebʼumaniki bʼa mok el sganaʼe ja yajni wa xleji lom smuleʼi. Yala yabʼye: «Jel lec huax ecʼ ahuujilex cuando jel malo huala utjiyex yuj ja jbiili. Soc ta huax aaji ahuilex huocol, ma lom ni mi alben ja jas huax alji abajexi» (Mateo 5:​11, 12). Ja Jesús chomajkil yala yabʼye ja ekʼeleʼik wa xleji smuleʼi wani xbʼobʼ sjam ja bʼej bʼa oj bʼobʼ xchole. Ja ekʼeleʼik jaw ja Jesús oj yaʼ kʼotuk smeranil ja skʼapjelal it: «Porque ja quen oj cala huabyex jastal oj cʼumananic. Oj ca vivoaxanic, jaxa hua condraexi juntiro oj smac ja sti ja jas oja hualexi. Mi ni oj bob jas oj scʼuluc ahuilexa» (Lucas 21:12-​15).

•   Ja jekabʼanum Pablo yayi rason ja nebʼumanik bʼa mok kʼeʼuke kʼumal bʼa mey yiʼoj stʼilanil, yujni ja tiroʼanelik jaw «mi nix maconia. Mi ni ay sbeja» (Tito 3:9; Romanos 16:17, 18).

•   Ja jekabʼanum Pedro stsatsankʼujolan ja nebʼumanik bʼa skoltajel ja skʼuʼajel yiʼoje ja yajni oj bʼobʼuki(1 Pedro 3:​15). Jachuk, sjeʼa bʼa jitsan ekʼele masni ay yipalil ja jas wa xkʼulaxi yuja jastik wa x-alxi. Stsʼijbʼan: «Oj makjuk ja sti‘ ja bʼa sonso ixuk winik ja ma‘tik mi sna‘awe‘ mini jasa yuj ja ma‘ wa skʼulan ja bʼa leki» (1 Pedro 2:​12-​15, Ja yajkʼachil sju‘unil ja dyosi).