Ja taʼumantiʼik bʼa Jyoba wa xyiʼaje gusto ochel loʼil bʼa Biblia soka ixuk winik bʼa tuktukil relijyon, pe mini xyaweyi stoyjelal ja Dyos lajan soka yeʼnle. Ja Biblia wa xyala ja meran kʼuʼumaniki aye bʼa ‹jun ita pensar›, ja yuj jelni tʼilan junxta skʼuʼajel oj ajyukyujile (1 Corintios 1:10; Efesios 4:16; Filipenses 2:2). Ja it mi kechanta wa stojolan ajyelyujile yajtanel, snajel syajal, yajel perdon sok tuk lekil modoʼalik. Spakluneje lek sok ti elel bʼa Biblia ja jas wa skʼuʼane ja taʼumantiʼik bʼa Jyoba. Lek mi jachukuk, lomni ja skʼuʼajel yiʼoje (Romanos 10:2, 3).

 Ja Biblia wa xyala ta jun kʼuʼuman wa xyayi stoyjel ja Dyos sok june bʼa tuk relijyon, «lajan huas staa sbaje soc» ja bʼa junxta skʼuʼajeli (2 Corintios 6:14-17). Anto, ja Jesús mini skʼana ja snebʼumaniki a-stoye ja Dyos lajan soka tuk relijyon, pes ojni jomjuke (Mateo 12:30; Juan 14:6). Chomajkil, ja ley ajiyi ja Moisés yuja Dyos timwani bʼa mok stoye ja Dyos lajan soka chonabʼik mojan yiʼojeʼi (Éxodo 34:11-14). Soka tyempo, bʼa skʼuʼajel ja mandar it, ja israʼelenyoʼik mini skʼanawe ja skoltajel ja tuk chonabʼik yuja wani stojolan xchʼikjel sbʼaje ja bʼa junxta skʼuʼajel yiʼoje (Esdras 4:1-3).

 Wan. Junxta jastal jekabʼanum Pablo, wani skʼanawe yabʼjel stojol ja janekʼ wa xbʼobʼi bʼa snajel ja jastal wa spensarane sok ja skʼuʼajel yiʼoje ja ixuk winiki (1 Corintios 9:19-22). Sok yajni wa x-ochyesok loʼil, wani sleʼawe «modo jastal ba tzamal [oj yal-e yabʼ]» ja ixuk winik ja jas wa xyala ja Biblia (1 Pedro 3:15).