Miyuk, ja taʼumantiʼik bʼa Jyoba mi stupuwe ja diezmo. Ja kaʼteltikoni wa xbʼobʼ kʼulaxuk soka takʼin wa xyaʼawe sok spetsanil skʼujoleʼi sok mini wa x-alxi ja sbʼiʼil ja ma wa xyaʼa. Pe ¿bʼa eljan ja kostumbre bʼa yajel ja diezmo, sok ja yuj mi wa snochowe ja taʼumantiʼik bʼa Jyoba?

 Ja Ley ajiyi ja chonabʼ Israel bʼa najate tini chʼikan ja mandar bʼa yajel ja diezmo —ma spiljel bʼa lajune xetʼan ja jastik yiʼojeʼi sok yajelyi june— ja sacerdoteʼiki. Ja Biblia wa xyaʼakan lek jaman ja snochumanik ja Kristo mixani oj skʼuluke ja Ley it. Ja yuj, mixa ni ay maʼ oj bʼobʼ stʼen-otik bʼa yajel ja diezmo (Hebreos 7:5, 18; Colosenses 2:13, 14).

 Ja taʼumantiʼik bʼa Jyoba jachni wa xcha jkʼulantikon ja jastal skʼulane ja bʼajtan snochumanik ja Kristo, sok mi wa xkaʼatikon ja diezmo ma yajel tuk majtanalik jach tʼenubʼal. Ja bʼajtan nochumaniki wa skoltaye ja kongregasyoni bʼa chabʼ modoʼal: yajel takʼin ma ja jastik yiʼojeʼi ja jastalni wa xyala ja skʼujoleʼi, chomajkil wa sjeʼawe sok wa xcholowe jach kʼebʼubʼal ja rasonik yiʼoj ja Biblia.

 Ja jaw wani slaja sbʼaj sok ja rason it yiʼoj ja Biblia: «Pero cada jujuneotic, quentic mismo oj cʼultic pensar. Mi sbejuc fuerza oj caatic ja jlimosnatiqui porque ta jach cʼa, mala gana ni huax caatic ja jastal jahua. Ja Diosi huas scʼana oj caatic ja jlimosnatiqui, pero soc spetzanil ja jcʼujoltic ja jgustotiqui» (2 Corintios 9:7).