Miyuk. Ja testigoʼik bʼa Jyoba mini kontraʼaye soka vacunaʼik. Ja oj yiʼe vacuna ma miyuk ja yaʼtijum Dyos bʼajni kada jujune oj stsaʼ skʼulajel. Jitsan testigo bʼa Jyoba wani stsaʼawe oj yiʼe.

 Wani xleʼa jkoltajeltik bʼa loktorik chapan sok wani xkilatik chaʼanyabʼal ja janekʼ wan lajxelyuj ja ciencia soka anik wa xkoltani bʼa mi jel oj tawanuk ja tsatsal chamelik. Jelni xkaʼatik tsʼakatal yuja tsatsal yaʼtele ja loktorik matik jel chapaneʼi, pe mastoni ja ekʼeleʼik bʼa wokol.

 Ja testigoʼik bʼa Jyoba wani skoltaye ja matik ay xchole bʼa gobyerno bʼa wa xtalnaniye soka bʼa chameliki. Jun sjejel, man kʼe ja chamel COVID-19, ja testigoʼik bʼa Jyoba jelni yaʼuneje abiso bʼa jitsan kʼumal ja bʼa sitio it bʼa internet, bʼa wa tsatsankʼujolan ja kristyano bʼa mok yaʼekan skʼuʼajel ja jastik wa xkʼanxi bʼa stalnajel sbʼaje. Tsatsankʼujolanel bʼa skisjel ja jastik kujlajel sbʼaja reunionik bʼa ay jitsan kristyano sok ja ajyel lutan bʼa naʼits, cha akʼubʼalni abiso ja stʼilanil bʼa ajyel najat sok june, sakʼjel ja kʼabʼal, slapjel cubreboca sok tuk jastik kujlajel bʼa yaʼunej ja matik ay xcholi (Romanos 13:1, 2).

 Bʼa jitsanxa jabʼil, ja juʼunik jumasaʼ bʼa testigoʼik bʼa Jyoba yaʼunej chiknajuk lek sbʼaja rasonik ti nochani:

•   Ja jastik wa stsaxi skʼulajel bʼa jun chamel, bʼajni kada jujune yeʼn oj yile (Gálatas 6:5).

   «[Ja rebista it] mini xyala jun tikʼe an ma terapia bʼa mas lek yuja tuki cha mini xyaʼa rason bʼa an. Ja xcholi kechantani wa sjeʼa ja smeranil sok wa xyaʼakan ja maʼ wa skʼuman bʼa yeʼn oj stsaʼ ja jas oj skʼuluki» (¡Despertad!, 8 bʼa febrero bʼa 1987).

   «Ja sjobʼjel ta oja wiʼ ja weʼn sok jawa wuntikil ja vacuna juni jasunuk bʼa weʼn oja tsaʼ skʼulajel» (¡Despertad!, 8 bʼa diciembre bʼa 1965).

•   Wani xleʼa jkoltajeltik bʼa loktorik, yujni bʼa keʼntik ja sakʼanil jelni chaʼanyabʼalil (Hechos 17:28).

   «Ja testigoʼik bʼa Jyoba wani xyawe el slekilal ja tuktukil snajel bʼa loktorik jel xmakuni, jastal ja koltanel ja bʼa swokole bʼa jun chamel. Wani syajtaye ja sakʼanil sok wani skʼanawe skʼulajel yibʼanal ja janekʼ wa xbʼobʼ sok ja jas wa xyala ja Biblia bʼa ajyel sakʼan mas tyempo» (La Atalaya, 1 bʼa mayo bʼa 1976).

   «Mini ay smaloʼil bʼa june slejel skoltajel bʼa loktorik matik jel chapane, bʼa ajyel lek sok yajel albʼuk mas tyempo ja sakʼanili. Ja testigoʼik bʼa Jyoba mini jas xtimjiye bʼa yijel anik bʼa loktor. Chomajkil, jastalni ja loktor Lucas jun nochuman Kristo ja bʼa bʼajtan siglo, jujuntik Testigo kʼoteleni loktorik [...]. Ja testigoʼik bʼa Jyoba jelni chaʼanyabʼal xyilawe ja koltanel wa x-ajiyile yuja loktorik matik jel chapane sok wani xyaʼawe tsʼakatal yuja wa skʼujolane ja yaʼtele jel xkoltani» (La Atalaya, 1 bʼa febrero bʼa 2011).