Waniʼa. Ja taʼumantiʼik bʼa Jyoba tikʼanxta wa xkʼulantikon aʼtelik bʼa skoltajel ja matik wa x-ekʼ sbʼaj desgrasya, jastal bʼutʼ jaʼ ma terremoto. Wa xkoltaytikon ja Taʼumantiʼiki soka tuk ixuk winiki, jastalni wa xyala ja bʼa Gálatas 6:10: «Jayuj, cuando ay modo, la xa jcʼultic yi lec spetzanil ja cristiano, pero ja mas to jel tʼilani, ja janecʼ quermano xa ni jbajtic soqui». Chomajkil, wa xkatikon kulan skʼujole sok wa xkoltaytikone sbʼaja jastal ay wa xyabʼyeʼi, pes ja it jelni tʼilan ja yajni wa xtaxye bʼa wokoli (2 Corintios 1:3, 4).

 Yajni wa x-ekʼ jun desgrasya, ja ansyanoʼik ja bʼa lugari wa sleʼawe modo bʼa oj staʼe kʼumajel spetsanil ja bʼa skongregasyoneʼi bʼa oj snaʼe jastal wa xtaxye soka jas wa xmakuni yujileʼi. Anto, wa xyalawe yabʼ ja bʼa Naʼits Betel ja jastal wa xtaxyeʼi soka koltajel akʼubʼal yileʼi.

 Ta ja kongregasyonik ja bʼa lugar jaw mi xlajxiyujile bʼa skoltajel ja matik ekʼel sbʼaj desgrasya, ja Tsome Tojwanum sbʼaja taʼumantiʼik bʼa Jyoba wa xchapa jastal oj kʼulaxuk ja aʼtel bʼa koltaneli. Ja Naʼits Betel wa stʼojo olomalik bʼa oj skʼel-e ja aʼtel bʼa koltaneli, sok Taʼumantiʼik bʼa tuk lugarik wa xyaʼawe kʼebʼubʼal ja styempoʼe soka jastik yiʼojeʼi bʼa oj koltanuke (Proverbios 17:17). Ja bʼa bʼajtan siglo jachni junxtatik cha skʼulane yajni jitsan nochumanik bʼa Kristo taxye bʼa wokoliki (1 Corintios 16:1-4).

 Ja modo bʼa yajel makunuk ja takʼin wa xyaʼawe sok spetsanil skʼujole ja taʼumantiʼik bʼa Jyoba sok wa xjekxi ja bʼa Naʼits Betel yiʼojeʼi jani bʼa skoltajel ja matik wa x-ekʼ sbʼaje desgrasyaʼiki (Hechos 11:27-30; 2 Corintios 8:13-15). Yuja matik wa xkoltaniyeʼi wa xyaʼawe kʼebʼubʼal ja styempoʼeʼi, ja takʼin it jumasaʼ jani toj wa xjekxi sbʼaja skoltajele ja matik ekʼ sbʼaj desgrasya. Sok ja takʼin jumasaʼ wani xkʼelxi lek bʼatik oj axuk makunuk (2 Corintios 8:20).