Ja jastal wa xkilatikon ma ja jasa wa xkʼulantikon ja yajni ay maʼ wa xchami, jani wa xnochotikon ja jasa wa sjeʼa ja Biblia, jastal ja jastik ti nochani:

•   Mini maloʼuk ajyel triste yajni wa xcham june ma wa xkʼanatik. Ja snochumanik ja Jesús okʼye ja yajni cham ja matik jel skʼanaweʼi (Juan 11:33-35, 38; Hechos 8:2; 9:39). Ja yuj, yajni ay jas wa xkʼulaxi ja yajni ay maʼ wa xchami mini jun ekʼeleʼuk bʼa kʼin (Eclesiastés 3:1, 4; 7:1-4). Pes juni ekʼele bʼa smojtajel ja tristeʼil yiʼoje ja spamilya ja chamwiniki (Romanos 12:15).

•   Ja chamwiniki mixato jas wa xyabʼye sok mixa jas wa snaʼawe. Chikan bʼa jakelotik ma jas kultura kiʼojtik, mini wa xnochotikon kostumbreʼik sok mi xkʼulantikon jastik junuk bʼa ti chʼikan soka skʼuʼajel bʼa ayto yiʼoje snajel ma ojto bʼobʼ skʼuluke kitik chikan jasunuk ja matik chamelxa, pes yujni ja jaw mi jaʼuk ja jas wa sjeʼa ja Biblia (Eclesiastés 9:5, 6, 10). Jun sjejel, mi xkatikonyi majtanal ja chamwiniki, mi wa xkʼumantikon sok mi xkʼanatikonyile pabor sok mi xkʼulantikon skʼijnal bʼa jel chaʼan stsʼakol ma yajel jul jkʼujoltikon jabʼil jabʼil ja xchamelali. Ja keʼntikoni mi xkʼulantikon ja kostumbreʼik ma skʼulajelik jaw, pes yujni wa xkʼuʼantikon ja jas wa xyala ja Biblia: «Elanik [...] mok ayam‘ex ja jastik jel kistali» (2 Corintios 6:17, Ja yajkʼachil sju‘unil ja dyosi).

•   Ja chamwiniki oj cha bʼobʼ sakʼwuke. Ja Biblia wa xyala ja matik chameleʼi oj cha bʼobʼ sakʼwuke ja bʼa tyempo jakumi sok oj kʼotuk ja kʼakʼu bʼa mixa oj ajyuk ja chamelchʼakeli (Hechos 24:15; Apocalipsis 21:4). Stsʼakatal ja smajlajel it, mini jel wala jelxitik el yabʼjel syajal ja yajni ay maʼ wa xchami, jastalni cha koltajiye ja bʼajtan nebʼumaniki (1 Tesalonicenses 4:13).

•   Ja Biblia wa xyala mok jelxukotik (Proverbios 11:2). Ja jasa wa xkʼulaxi yajni ay maʼ wa xchami mi wa xkatikon makunuk bʼa akanuke kʼelan ja tuki sok stoyjel jbʼajtikon sbʼaja jas tikʼe cholal ma ta ay jtakʼintikon ma miyuk (1 Juan 2:16). Ja yuj, ja jasa wa xkʼulantikon ja yajni ay maʼ wa xchami mi wa xkʼulantikon bʼa jel chaʼan stsʼakol ma bʼa aʼekʼ yujile gusto ja matik oj wajuki, mi wa xcha katikon makunuk skajaʼil ja chamwinik bʼa jel chapan ma jel chaʼan stsʼakol. Cha mi wa xkʼutes jbʼajtikon ja ekʼele jaw bʼa jel chapan ma bʼa jel xpaywani.

•   Mi wa xkalatikon yabʼ ja tuki a-skʼuluke ja skʼuʼajel kiʼojtikon sbʼaja jasa wa xkʼulaxi yajni ay maʼ wa xchami. Mini wa xkʼulantikon ja jaw, pes ja wa xnochotikon ja mandar it: «Cada jujuneotic oj caatic yi cuenta ja Diosi» (Romanos 14:12). Pe yajni wa xbʼobʼi, wa xleʼatikon modo xcholjel ja jasa wa xkʼuʼantikon bʼa jun modo tsamal sok bʼa wala kiswanitikon (1 Pedro 3:15).

 Lugar: Ta ja pamilya wa skʼanawe oj ekʼ jun loʼil sbʼaja chamwiniki, yeʼnle oj bʼobʼ stsaʼe chikan bʼa lugar, jastal bʼa jun Naʼits bʼa Tsomjelal, bʼa jun naʼits ma ja bʼa kʼeʼen oj mukxuk ja chamwiniki.

 Jas wa xkʼulaxi: Bʼa yajel kulan skʼujol ja spamilya ja chamwiniki, wa x–ekʼ jun loʼil bʼa wa xcholxi jasa wa xyala ja Biblia sbʼaja chamelchʼakeli sok sbʼaja kʼapjelal bʼa oj cha sakʼwuk ja matik chameli (Juan 11:25; Romanos 5:12; 2 Pedro 3:13). Yajni wan ekʼel ja loʼili oj bʼobʼ axuk jul jkʼujoltik ja lekil modoʼalik sjeʼa ja maʼ chameli, sok oj bʼobʼ alxuk sbʼaja jasa wa xnebʼatik ja lekil sjejel yaʼakan bʼa toj ajyi (2 Samuel 1:17-27).

 Oj bʼobʼ tsʼebʼantaxuk jun tsʼebʼoj elel bʼa Biblia (Colosenses 3:16). Sok ja loʼili wa xchʼak sok jun orasyon bʼa wa xyaʼa kulan kʼujolal (Filipenses 4:6, 7).

 Stsʼakol: Mi xkʼanatikon stsʼakol ma takʼin yuja loʼil wa x-ekʼi, cha mini bʼa tuk aʼtelik wa xkʼulantikon ja bʼa jrelijyontikoni. Mini xkʼanxi takʼin ja bʼa jtsomjeltikoni (Mateo 10:8).

 Matik oj wajuk: Ja loʼil wa xkʼulaxi yajni ay maʼ wa xchami sok ti wa xkʼulaxi ja bʼa Naʼits bʼa Tsomjelal yiʼoje ja Taʼumantiʼiki, wa xbʼobʼ ochuk chikan machʼa, jastalni ja bʼa tsomjelik wa xkʼulantikoni. Ja yuj, ja matik mi taʼumantiʼuk bʼa Jyoba wa xbʼobʼ wajuke.

 Jujune yeʼn oj spensaraʼuk ta oj wajuk ma miyuk, pe jani oj skis ja jastal wa xyala ja sconciencia chapubʼal yuja Biblia (1 Timoteo 1:19). Pe mini wala wajtikon ja bʼa jastik junuk ti chʼikan wa skʼulane ja tuk relijyonik yajni mi jach wa sjeʼa ja Biblia (2 Corintios 6:14-17).