Ja jastik ekʼel sbʼaja taʼumantiʼik bʼa Jyoba ja bʼa jtyempotiki kʼejan bʼajtanto ja bʼa jabʼil 1900. Ja bʼa tyempo jaw, jun yal tsome paklanum bʼa Biblia bʼa Pittsburgh (Pensilvania, Estados Unidos) spensaraʼane oj kʼe spaklaye jaʼankʼujol ja Biblia. Ja bʼa spaklajel yaʼaweʼi, yawe slaj sbʼaj ja jasa wa sjeʼawe ja iglesyaʼiki soka jasa wa sjeʼa meran lek ja Biblia. Tsaʼan kʼe xchol-e ja jasa snebʼaweʼi. Yawe eluk libroʼik, stsʼijbʼane artikuloʼik bʼa peryodiko sok yawe eluk ja rebista wa xnaʼatik sbʼaj ja bʼa jtyempotik ja Ja Juʼun Cholumani. Wan Yaljel sbʼaja sGobyerno ja Jyoba.

 June ja bʼa paklanumik jaw sbʼiʼilan Charles Taze Russell. Anima yeʼn ja olomal bʼa yajel eluk ja bʼajtan rebista Ja Juʼun Cholumani sok yeʼnani skʼela ja aʼtel bʼa sjejel bʼa Biblia ja bʼa tyempo jaw, pe ja it mi wa stojolan yeʼn ya kujlajuk jun yajkʼachil relijyon. Ja jas wa skʼanawe ajyi ja Russell soka tuk paklanumik bʼa Biblia (ja sbʼiʼil yiʼajeʼi), jani xcholjel ja jasa sjeʼakan ja Jesukristo sok snochjel ja jasa yaʼawe kujlajukan ja kongregasyonik bʼa bʼajtan siglo. Yuja Jesús yeʼn ja maʼ ya kujlajuk ja bʼajtan nebʼumaniki, wani xcha jkʼuʼantikon yeʼnani ya kujlajuk ja taʼumantiʼik bʼa Jyoba (Colosenses 1:18-20).