1 Corintios 12:1-31
12 Nachuna, natalan, xlakata tuku kinkamatlawiyan espíritu, klakaskin pi nakatsiyatit.
2 Wixin katsiyatit pi akxni nina kstalaninanin Cristo xwanitantit, xkamakgpuwantinikanatit nakakninanikgoyatit tatlawamakgxtu* nema ni chuwinankgo, chu xkastalanikgoyatit niku xla xkapulalinkgoyan.
3 Pero klakaskin nakatsiyatit pi nipara chatum tiku pulalin xʼespíritu Dios wan «¡Jesús lixkajni likatsi!», chu nila tiku wan «¡Jesús Malana* litaxtu!», komo ni wa espíritu santo chuna matlawi.
4 Nachuna, tipalhuwa tuku masta espíritu santo, pero kaj akgtum espíritu anan;
5 anan tipalhuwa taskujut xlakata nakamakgtayakan amakgapitsin, pero kajwatiya anan chatum Malana;
6 chu espíritu santo tipalhuwa tuku kamatlawi latamanin, pero kajwatiya anan chatum Dios tiku tlawa pi putum latamanin natlawakgo uma.
7 Tuku espíritu santo kamaxki talakaskin natlawakgo liwana tasiya, chu Dios masta xlakata putum nalitamakgtayakgo.
8 Xpalakata espíritu santo chatum maxkikan talakaskin nakgalhi liskgalala akxni nachuwinan, chu xpalakata watiya uma espíritu santo achatum maxkikan talakaskin nalichuwinan tuku amakgapitsin ni katsikgo,
9 chu xlakata uma espíritu, chatum maxkikan takanajla chu xpalakata watiya uma espíritu achatum maxkikan litliwakga xlakata namapaksanan,
10 achatum maxkikan litliwakga xlakata natlawa milagros, atanu napalakachuwinan Dios, atanu naʼakgatekgsa* komo akgtum tachuwin wa Dios mastanit, atanu chuwinan tipalhuwa tachuwin, atanu matitaxti tuku wankan kʼatanu tachuwin.
11 Pero putum uma tuku tlan tlawakan watiya akgtum espíritu makgtayanan, chatunu chatunu kamaʼakgpitsini chuna la Dios lakaskin.
12 Xlakata chuna la makni kaj akgtum, pero lhuwa tuku litakgatsi, chu putum tuku litakgatsi makni maski lhuwa, kaj akgtum makni litaxtu, nachuna litaxtu Cristo.
13 Xlakata, kaj akgtum espíritu putum akinin kinkalimunukan xlakata nalitaxtuyaw akgtum makni, maski judíos o griegos litaxtuyaw, maski skujnin o ni skujnin litaxtuyaw, chu kimputumkan makglhtinanitaw ama espíritu.
14 Xlakata makni lhuwa tuku litakgatsi, ni kaj pulaktum.
15 Komo tantun xwa «Xlakata akit ni makan, akit ni xtatakgatsin makni», uma ni tlawa pi nialh xtatakgatsin makni nawan.
16 Chu komo takgen* xwa «Xlakata akit ni lakgastapu, akit ni xtatakgatsin makni», uma ni tlawa pi nialh xtatakgatsin makni nawan.
17 Komo putum makni lakgastapu xwa, ¿tuku xlikgaxmatwi? Komo putum makni takgen xwa, ¿tuku xlikgankgawanaw?
18 Pero Dios lakkaxwilinit tuku litatakgatsi makni chuna la lakgatilh.
19 Komo putum litatakgatsin akxtum xwankgolh, ¿akgtum makni xwa?
20 Pero maski anan lhuwa tuku litatakgatsi, wi kaj akgtum makni.
21 Lakgastapu nila wani makan «Ni kmaklakaskinan», chu nachuna, akgxakga nila kawani tantun «Ni kkamaklakaskinan».
22 Pero tuku litatakgatsi makni nema ni lu xlakaskinka kaʼakxilhaw na xlakaskinka litaxtukgo,
23 chu tuku litatakgatsi kimaknikan nema lakpuwanaw pi ni lu lilakgatit, liwana tlapayaw. Nachuna tuku litatakgatsi kimaknikan nema limaxananaw, tlakg tlan kakaxyawayaw,
24 pero xalakglilakgatit tuku litakgatsi kimaknikan ni talakaskin nakakaxyawayaw. Dios lakkaxwililh makni chu chuna tlakg maxki kakni tatakgatsin nema ni lakglilakgatit chuna la amakgapitsin.
25 Xlakata ni xʼanalh tapapitsit kmakni, pero xlilat pi tuku litakgatsi makni nalalilakgaputsakgo.
26 Komo akgtum tuku litakgatsi makni patinan,* putum tuku litakgatsi makni akxtum patinankgo; o komo akgtum tuku litakgatsi makni malankikan, putum tuku litakgatsi makni akxtum paxuwakgo.
27 Wixin xmakni Cristo, chu minchatunukan litaxtuyatit tuku litakgatsi uma makni.
28 Chu Dios kalakgayawanit taskujut latamanin kcongregación: xapulana, apóstoles; xlipulaktiy, palakachuwinanin; xlipulaktutu, makgalhtawakgenanin; alistalh, tiku tlawakgo milagros; nachuna, tiku mapaksanankgo; tiku kamakgtayakgo amakgapitsin; tiku pulalinankgo; tiku chuwinankgo tipalhuwa tachuwin.
29 Ni putum apóstoles litaxtukgo, ¿ni xlikana? Ni putum palakachuwinanin litaxtukgo, ¿ni xlikana? Ni putum makgalhtawakgenanin litaxtukgo, ¿ni xlikana? Ni putum tlawakgo milagros, ¿ni xlikana?
30 Ni putum kgalhikgo litliwakga xlakata namapaksanankgo, ¿ni xlikana? Ni putum chuwinankgo tipalhuwa tachuwin, ¿ni xlikana? Ni putum tlan matitaxtikgo kʼatanu tachuwin, ¿ni xlikana?
31 Pero chuntiya lu kaskujtit xlakata* namakglhtinanatit tlakg xatlan tasikulunalin. Chu na nakkamasiyaniyan akgtum tiji nema tlakg xatlan nixawa atanu tiji.
Notas
^ Alakatanu wankan «tamakanitlaw».
^ Alakatanu wankan «Puchina».
^ Alakatanu wankan «namakgachakgxi».
^ Alakatanu wankan «akgaxkgolh».
^ Alakatanu wankan «akgxtakgajnan».
^ O: «chuntiya xatapaxuwan kaliskujtit».
