1 Corintios 13:1-13
-
Tapaxkit ni anan tuku xtachuna (1-13)
13 Komo kchuwinan xtachuwinkan lakchixkuwin chu xtachuwinkan ángeles, pero ni kkgalhi tapaxkit, kminit litaxtu chuna la akgtum likan xla bronce o akgtum tambor nema lu akgaxkulinan.
2 Komo kkgalhi litliwakga naklichuwinan tamakatsinin nema Dios kimaxkinit chu kʼakgatekgsa* putum tuku tsekg wi xla Dios chu putum takatsin, chu lu tliwakga kintakanajla xlakata asta tlan nakmalakxija laklanka sipi, pero ni kkgalhi tapaxkit, nitu klitaxtu.
3 Chu komo kmasta putum tuku kkgalhi xlakata amakgapitsin nawayankgo, chu komo kmakamasta kimakni xlakata xlakaskinka naki’akxilhkan, pero ni kkgalhi tapaxkit, nipara tsinu klitamakgtaya.
4 Tapaxkit lu kgalhkgalhinan* chu tlan likatsi. Tapaxkit ni lakgsitsinan. Ni xʼakstu malankikan, ni lanka makgkatsikan,
5 ni lixkajni likatsi, ni kajwatiya putsa tuku xla tlan nakitaxtuni, ni lakapala sitsi. Ni lakapastaktawila tuku nitlan tlawanika.*
6 Ni lipaxuwa tuku ni xaʼakgstitum, wata lipaxuwa tuku xaxlikana.
7 Tapaxkit putum tayani, chuntiya kanajla, putum kilhtamaku kgalhkgalhinan chu nitu makgatlaja.
8 Tapaxkit nikxni sputa. Pero komo anan litliwakga nalichuwinankan tamakatsinin nema Dios masta, uma nasputa; komo anan litliwakga nachuwinankan tipalhuwa tachuwin, uma nasputa; komo anan takatsin, uma nasputa.
9 Xlakata ni xatakgatsin takatsin kgalhiyaw chu ni xatakgatsin lichuwinanaw xtamakatsinin Dios,
10 pero akxni nachin tuku xatakgatsin, namasputukan tuku ni xatakgatsin.
11 Akxni aktsu kgawasa xakwanit, xakchuwinan la* aktsu kgawasa, xaklakapastaknan la aktsu kgawasa, xaklakpuwanan la aktsu kgawasa. Pero uku ktachixkuwinit, chu nialh ktlawa tuku tlawa chatum aktsu kgawasa.
12 Uku litaxtu pi lakatsu akxilhmaw akgtum espejo niku ni stalanka tasiya, pero namin kilhtamaku putum stalanka natasiya. Uku ni xatakgatsin klakgapasa xlakata Dios, pero namin kilhtamaku liwana* naklakgapasa xlakata Dios chuna la xla liwana kilakgapasa.
13 Pero takanajla, takgalhkgalhin, chu tapaxkit ni katilakgsputkgolh. Pero xlakata uma akgtutu, tuku tlakg xlakaskinka wa tapaxkit.
Notas
^ Alakatanu wankan «kmakgachakgxi».
^ O: «patiy».
^ O: «tuku ni xlilat tlawanika».
^ Alakatanu wankan «chi».
^ O: «xatakgatsin».
