1 Corintios 14:1-40
14 Chuntiya kamasiyatit tapaxkit, pero chuntiya tlakg kaliskujtit namakgamakglhtinanatit tamaskiwin* xla espíritu,* pero tlakg tlan wa nalichuwinanatit tuku Dios makatsininan.
2 Niti akgatekgsa* tuku lichuwinan chatum lataman tiku makglhtinanit xlitliwakga Dios xlakata tlan nachuwinan tipalhuwa tachuwin. Kajwatiya Dios akgatekgsni. Maski lichuwinan tuku tsekg wi xla Dios xpalakata espíritu, niti akgatekgsni tuku wan.
3 Pero tiku lichuwinan tuku Dios makatsininan, kamatliwakglha, kamakgtaya chu tlan kamamakgkatsini latamanin xpalakata tuku wan.
4 Tiku chuwinan kʼatanu tachuwin xʼakstu litamakgtaya, pero tiku lichuwinan tuku Dios makatsininan kalimakgtaya congregación.
5 Nachuna xaklakaskilh pi mimputumkan xchuwinantit ktipalhuwa tachuwin, pero tlakg xaklakgatilh pi xlichuwinantit tuku Dios makatsininan. Xlikana, komo tiku chuwinan kʼatanu tachuwin ni matitaxti tuku wamputun tuku wa xlakata congregación nalitamakgtaya, uma tlawa pi tiku lichuwinan tuku Dios makatsininan tlakg xlakaskinka nalitaxtu nixawa tiku chuwinan kʼatanu tachuwin.
6 Natalan, komo xakkalakganchan, chu xakkatachuwinan ktipalhuwa tachuwin, ¿xkamakgtayan uma? Komo akit kkamakgtayaputunan, xlilat nakkalitachuwinanan tachuwin nema kimaxkinit Dios o takatsin o tuku Dios makatsininan o akgtum tamasiy.
7 Xtachuna la akxni tlakgkan flauta o arpa. Komo ni lakgpalitilhakan chuna la mamakasanimaka, ¿la natakatsi tuku tlakgmaka kflauta o kʼarpa?
8 Komo tiku tlakga* trompeta ni tlakga chuna la xlilat, ¿tiku natakaxa xlakata naʼan talachipanan?
9 Nachuna wixin, komo namaklakaskinatit tachuwin nema tuwa akgatekgskan,* ¿la nakatsikan tuku lichuwinampatit? Nakitaxtu pi nitu wamputun tuku lichuwinampatit.
10 Kkakilhtamaku chuwinankan tipalhuwa tachuwin chu putum tlan kaʼakgatekgskan.
11 Komo ni kʼakgatekgsa xtachuwin tiku kintachuwinama kʼatanu tachuwin, xtachuna tiku xalak alakatanu naklitaxtuni tiku kintachuwinama, chu tiku kintachuwinama xtachuna tiku xalak alakatanu nakilitaxtuni.
12 Nachuna kitaxtu mimpalakatakan, xlakata lu kgalhiputunatit xtamaskiwin espíritu, tlakg lhuwa kakgalhiputuntit tamaskiwin xla espíritu nema namatliwakglha congregación.
13 Wa xlakata, tiku chuwinan kʼatanu tachuwin katlawalh oración xlakata tlan namatitaxti tuku kilhchanima xtachuwin.
14 Xlakata, komo ktlawa oración kʼakgtum tachuwin, ni wa akit tiku kchuwinan, wata wa tamaskiwin nema kimaxkikanit xpalakata espíritu santo. Wa xlakata, ni kʼakgatekgsa* tuku kwan.
15 ¿Tuku natatlawa? Akxni naktlawa oración nakmaklakaskin tamaskiwin tuku kimaxkikanit xpalakata espíritu santo chu na naktlawa oración xlakata naʼakgatekgskan tuku kwan. Akxni nakkilhtli nakmaklakaskin tamaskiwin tuku kimaxkikanit xpalakata espíritu santo chu na nakkilhtli xlakata naʼakgatekgskan tuku kwan.
16 Komo nichuna, akxni malankiya Dios xpalakata tamaskiwin xla espíritu, ¿la tlan nawan «Chuna kalalh» tiku ni lu masiyanikanit, akxni wix paxtikatsinipat Dios, xlakata ni katsi tuku kilhwampat?
17 Xlikana, wix lu tlan la* paxtikatsinipat Dios, pero ama chixku ni litamakgtayama.
18 Kpaxtikatsini Dios pi akit tlakg tipalhuwa tachuwin kchuwinan nixawa mimputumkan.
19 Pero kcongregación tlakg tlan kakxilha nakwan akgkitsis tachuwin nema taʼakgatekgsa,* nixawa nakkalistaktayawa amakgapitsin akgkaw mil tachuwin nema ni taʼakgatekgsa.
20 Natalan, ni kalakpuwantit chuna la laktsu kamanan, wata xtachuna la laktsu kamanan ni natlawayatit tuku nitlan, chu kalakpuwantit chuna la tiku laklankata.
21 Anta kLimapakgsin tatsokgnit: «Jehová wan: “Nakmaklakaskin xtachuwinkan tiku xalak alakatanu xlakata naktachuwinan uma kachikin, chu maski chuna ni kintikgaxmatniputunkgolh”».
22 Wa xlakata, tipalhuwa tachuwin wa tuku nakalimakanajlikan tiku ni kanajlanikgo Jesús, ni wa xlakata nakalimasiyanikan tiku kanajlanikgoya, chu lichuwinankan tuku Dios makatsininan ni wa xpalakata tiku ni kanajlanikgo Jesús, wata xpalakata tiku kanajlanikgoya.
23 Wa xlakata, komo putum congregación tamakxtumi chu putum chuwinankgo tipalhuwa tachuwin, pero tanukgoyacha tiku ni lu kamasiyanikanit, o tiku ni kanajlanikgo Jesús, ¿ni nawankgo pi wixin akgwitipatit?
24 Pero komo mimputumkan lichuwinampatit tuku Dios makatsininan chu natanuyacha tiku ni kanajlani Jesús o tiku ni lu masiyanikanit, namakgkatsi pi mimputumkan stakyawapatit chu lakputsananipatit.
25 Chu xla nakatsi tuku tsekg wi kxnaku, wa xlakata natalakgatsokgosta chu namaxki kakni Dios, nawan: «Dios xlikana katawilan».
26 Wa xlakata, natalanin, ¿tuku xlitatlawat? Akxni wixin tamakxtupiyatit, chatum likilhtli salmo, achatum kgalhi akgtum tamasiy, achatum lichuwinan tachuwin nema maxkinit Dios, achatum atanu tachuwin, chu atanu matitaxti tuku wankan. Putum katatlawalh xlakata nalalimatliwakglhatit chatunu chatunu.
27 Komo wi tiku chuwinan kʼatanu tachuwin, kaj chatiy o kgalhtutu kachuwinankgolh, chu kalakgalhkgalhilh akxni nakalakgchan, chu kaʼanalh tiku namatitaxti kʼatanu tachuwin tuku wanka.
28 Pero komo ni anan tiku namatitaxti tuku wanka, kaks katawi kcongregación chu akstu katachuwinanka chu katachuwinalh Dios.
29 Kachuwinankgolh chatiy o kgalhtutu palakachuwinanin, chu amakgapitsin kalakputsananikgolh tuku kilhchanima.
30 Pero komo achatum makglhtinan xtachuwin Dios akxni anta wi, tiku pulana xchuwinama nialh kachuwinalh.
31 Chuna, tiku lichuwinamakgo tuku Dios makatsininan kmilakgstipankan chuna natlawakgo akxni kalakgchan, xlakata putum nakatsiniyatit chu natatliwakglhatit.
32 Tamaskiwin xla espíritu nema kgalhikgo palakachuwinanin, ni akglakgwa namaklakaskinkgo palakachuwinanin.
33 Xlakata Dios ni lakaskin pi wi tuku akglakgwa katawi, wata lakaskin pi kaʼanalh takaksni.
Chuna la putum kxcongregaciones tiku xasantos,
34 lakpuskatin kgalhtsekg katawilakgolh kcongregaciones, xlakata ni kamaxkikan talakaskin nachuwinankgo. Wata kakgalhakgaxmatnikgolh lakchixkuwin, chuna la wan Limapakgsin.
35 Komo wi tuku katsiniputunkgo, kakgalhskinkgolh xchixkukan kxchikkan, xlakata limaxana pi chatum puskat nachuwinan kcongregación.
36 ¿Wixin malakatsukitit xtachuwin Dios? ¿O kajwatiya wixin kamakamaxkikanitantit?
37 Komo wi tiku lakpuwan pi palakachuwina o maxkikanit akgtum tamaskiwin xla espíritu, xlimakgamakglhtinat pi tuku kkatsokgnaniman xlimapakgsin Malana.*
38 Pero komo wi tiku lakgmakgan uma, xla na nalakgmakgankan.*
39 Wa xlakata, kinatalanin, chuntiya kaliskujtit xlakata nalichuwinanatit tuku Dios makatsininan, pero niti kawanitit pi ni kachuwinalh ktipalhuwa tachuwin.
40 Pero putum katatlawalh chuna la xlilat chu katalakkaxwililh.*
Notas
^ Alakatanu wankan «tatain o talakgalhaman».
^ O: «tuku matlawinan espíritu».
^ Alakatanu wankan «makgachakgxi».
^ Alakatanu wankan «matasi».
^ Alakatanu wankan «makgachakgxikan».
^ Alakatanu wankan «ni kmakgachakgxi».
^ Alakatanu wankan «chi».
^ Alakatanu wankan «tamakgachakgxi».
^ Alakatanu wankan «Puchina».
^ Max: «komo wi tiku nitu katsi, chuntiya nitu katikatsilh».
^ O: «ni akglakgwa katatlawalh».
