1 Corintios 15:1-58
15 Natalan, uku kkamalakapastakniyan xatlan tamakatsinin tuku akit kkalitachuwinan, nema wixin na makgamakglhtinantit, chu xpalakata tuku wixin tliwakglh liwilatit.
2 Komo ni makgxtakgatit mintakanajlakan xpalakata xatlan tamakatsinin nema akit kkalitachuwinan, kalakgmaxtupakantit. Pero komo namakgxtakgatit nitu litaxtu pi kanajlatit.
3 Xlakata tuku tlakg xlakaskinka nema kkatsininit, kkamasiyaninitan: pi Cristo nilh xpalakata kintalakgalhinkan chuna la wan Tatsokgni;
4 pi maknuka,* chuna, malakastakwanika xliʼakgtutu kilhtamaku chuna la wan Tatsokgni;
5 chu tasiyanilh Cefas,* chu alistalh katasiyanilh kgalhkutiy apóstoles.
6 Alistalh, katasiyanilh liwaka akgkitsis ciento natalan tiku lakatum niku xtamakxtumikgonit, tlakg xchalhuwakan kinkatawilakgonku, maski makgapitsin nikgonita.*
7 Akxni xtitaxtunita uma, tasiyanilh Santiago chu alistalh putum apóstoles.
8 Pero xaʼawatiya na kintasiyanilh akit, wa xlakata klitaxtu chuna la chatum skgata tiku lakachinit akxni nina xlakgchan xkilhtamaku.
9 Pero xliputum apóstoles akit tlakg ni xlakaskinka klitaxtu, chu ni kiminini apóstol nakilimapakuwikan, xlakata kputsastalanilh xcongregación Dios.
10 Pero tlan ktlawa uma taskujut xlakata Dios kilimasiyanilh talakgalhaman nema ni anan xtachuna.* Chu xtalakgalhaman tlan kitaxtulh kimpalakata. Maski tlakg kskujli nixawa amakgapitsin apóstoles chu ktlawalh lhuwa tuku xatlan, ni kiʼakstu chuna ktlawalh, wata chuna ktlawalh xlakata Dios kilakgalhamalh.
11 Wa xlakata, komo akit o xlakan tiku lichuwinamakgolh xatlan tamakatsinin, kimputumkan klichuwinanaw kaj akgtum tamakatsin chu wixin kanajlanitantit ama tamakatsin.
12 Wa xlakata, komo akinin lichuwinamaw pi Cristo malakastakwanikanit kkalinin, ¿tuku xlakata wankgo makgapitsi kmilakgstipankan pi ni katikamalakastakwanika tiku nikgonita?
13 Xlikana, komo ni katikamalakastakwanika tiku nikgonita, na ni malakastakwanikanit Cristo.
14 Pero komo Cristo ni malakastakwanika, xlikana pi chuna la lichuwinamaw xatlan tamakatsinin nitu litaxtu, chu mintakanajlakan na nitu litaxtu.
15 Nachuna, komo tiku nikgonita ni amaka kamalakastakwanikan, Dios na ni malakastakwanilh Cristo, wa xlakata uma kilhchanima pi akinin akgsaninamaw xpalakata Dios akxni wanaw pi xla malakastakwanilh Cristo.
16 Xlakata komo tiku nikgonita ni katikamalakastakwanika, wamputun pi Cristo ni malakastakwanikanit.
17 Nachuna, komo Cristo ni malakastakwanikanit, mintakanajlakan nitu litaxtu; ni katapatikanitantit mintalakgalhinkan.
18 Wa xlakata, nachuna kstalaninanin Cristo tiku nikgonita, putum kilhtamaku lakgsputkgonit.
19 Komo kajwatiya kʼuma latamat lipawanitaw Cristo, tlakg kgoxotanin akinin nixawa amakgapitsin.
20 Pero uku Cristo malakastakwanikanit kkalinin, xla xapulana lakastakwanalh kkalinin chuna la xapulana tawakat.
21 Xtachuna la analh linin xpalakata chatum chixku, nachuna nalakastakwanankgo tiku nikgonita xpalakata chatum chixku.
22 Chuna la kaj xpalakata Adán putum nimakgolh, nachuna kaj xpalakata Cristo putum nakamaxkiparakan latamat.
23 Pero chatunu chatunu chuna la kalakgchan: Cristo xapulana tawakat, alistalh tiku tapakgsinikgo Cristo akxni kinkatawilan nawan.
24 Xa’awatiya, akxni nasputa, xla namakamaxki Tamapakgsin xDios chu xTlat,* akxni kamalakgsputunita nawan putum tiku mapakgsinankgo chu putum tiku lakapuxkunankgo.
25 Xla xlimapakgsinat la* mapakgsina asta akxni Dios kawilinita nawan xtalamakgasitsin kxtampin xtantun.
26 Chu xa’awatiya kintalamakgasitsinkan, wa linin, namalakgsputukan.
27 Xlakata Dios «wililh putum tuku anan kxtampin xtantun Cristo». Pero akxni wan pi «wililh putum tuku anan kxtampin xtantun», ni limasiya pi Dios na tapakgsini Cristo, nichuna, wata Dios wililh kxtampin xtantun Cristo putum tuku anan.
28 Pero akxni Dios putum wilinita nawan kxtampin xtantun xKgawasa, xaKgawasa na natapakgsini Dios. Chuna Dios xmapakgsina nalitaxtu putum tuku anan.
29 Komo tiku nikgonita ni katikamalakastakwanika, ¿la nakakitaxtuni tiku kamunumaka xlakata nanikgo? ¿Tuku tamakgtay namakglhtinankgo?
30 ¿Tuku xlakata akinin na kalipekua wilaw putum kilhtamaku?
31 Natalan, xpalakata tapaxuwan nema kkgalhi mimpalakatakan, xtamakgalhtawakgen Cristo Jesús kiMalanakan,* liwana kkawaniyan pi chali chali ktatalakastuka linin.
32 Komo akit, xtachuna amakgapitsin lakchixkuwin* kkatalachipanit xalakluku animales kʼÉfeso, ¿la kimakgtaya? Komo tiku nikgonita ni katikamalakastakwanika, «kawayaw chu kakgotnaw, xlakata chali naniyaw».
33 Ni kataʼakgskgawitit. Katalalinkan tiku nitlan likatsikgo tlawa pi namakgxtakgaw xatlan talismanin.*
34 Liwana kalakapastaknantit chu katlawatit tuku tlan chu ni kalismanitit natlawayatit talakgalhin, xlakata makgapitsin ni katsikgo xlakata Dios. Kkawaniyan uma xlakata nalimaxananatit.
35 Pero wi tiku nawan: «¿La nakamalakastakwanikan tiku nikgonita? Chuna, ¿tukuya makni nakgalhikgo akxni nalakastakwanankgo?».
36 ¡Lu xatonto wix! Akxni wix chana akgtum talhtsi ni pulha komo ni pulana niy.
37 Ni chana xakiwi, wata chana akgtum talhtsi, xla trigo o atanu talhtsi;
38 pero Dios maxki akgtum xmakni chuna la xla lakgatinit, chu akgatunu talhtsi kamaxki xmakni.
39 Ni putum liway watiya liway, anan xliway latamanin, anan xliway wakax, atanu litum xliway tsiktsi,* chu atanu xla skiti.*
40 Chu putum tuku anan kʼakgapun tanu xmakni kgalhikgo chu putum tuku anan kkatiyatni tanu xmakni kgalhikgo. Wa xlakata, tanu kakni kgalhikgo tuku anan kʼakgapun chu tanu kakni kgalhikgo tuku anan kkatiyatni.
41 Xmakaxkgakgenat chichini chu xmakaxkgakgenat papaʼ tanu, chu xmakaxkgakgenatkan staku tanu; asta akgatunu staku talakgpali chuna la makgxkgakganankgo.
42 Nachuna nakitaxtu xpalakatakan tiku nakamalakastakwanikan kkalinin. Makni nema niy, masa, pero makni nema malakastakwanikan nila masa.
43 Akxni chankan litaxtu akgtum makni nema ni maxkikan kakni, akxni malakastakwanikan litaxtu akgtum makni nema maxkikan kakni. Tuku chankan xaxlajwani; tuku malakastakwanikan kgalhi litliwakga.
44 Chankan akgtum makni xla kgalhni chu liwa; lakastakwanan akgtum makni nema kaj espíritu. Komo anan makni xla kgalhni chu liwa, na anan makni nema kaj espíritu.
45 Chuna tatsokgnit: «Xapulana chixku, Adán, litaxtulh chatum lataman tiku staknan». Xaʼawatiya Adán litaxtulh espíritu nema masta latamat.
46 Pero xapulana makni ni wa tuku kaj xaʼespíritu, wata wa kgalhni chu liwa, chu alistalh milh makni nema kaj xaʼespíritu.
47 Xapulana chixku limalakatsukikanit tiyat chu litlawaka pokgxni; xlichatiy chixku kʼakgapun minacha.
48 Latamanin xalak uma kakilhtamaku xtachuna la tiku Dios litlawalh pokgxni. Chu umakgolh tiku xalak akgapun xtachuna tiku mincha kʼakgapun.
49 Chu akinin xtachuna uma chixku tiku Dios litlawalh pokgxni, wa xlakata nawanaw xtachuna la uma chixku tiku alh kʼakgapun.
50 Natalan, tuku kkawaniputunan, wa pi liwa chu kgalhni nila tanukgo kxTamapakgsin Dios, nachuna tuku masa nila litaxtu xtachuna tuku ni masa.
51 ¡Kaʼakxilhtit! Kkawaniyan tuku tsekg wi xla Dios: ni putum katilhtataw kkalinin, pero Dios kimputumkan nakinkalakgpaliyan,
52 kaj xalakapala, xtachuna la akxni tsim lakpiwankan.* Uma chuna nala akxni namatasikan xaʼawatiya trompeta. Akxni namatasikan trompeta chu tiku nikgonita nakamalakastakwanikan, xlakan nakgalhikgo akgtum makni nema ni masa chu Dios kimputumkan nakinkalakgpaliyan.
53 Xlakata uma tuku masa nialhla namasa, chu uma tuku niy nialhla naniy.
54 Pero akxni uma tuku masa nialhla namasa chu akxni uma tuku niy nialhla naniy, nakgantaxtu tachuwin tuku tatsokgnit: «Linin xliputum kilhtamaku namalakgsputukan».
55 «Linin, ¿niku wi militliwakga? Linin, ¿niku wi miveneno?».
56 Veneno nema makgninan wa talakgalhin, chu Limapakgsin maxki talakgalhin xlitliwakga.
57 ¡Pero paxtikatsiniyaw Dios xlakata xla kinkamakgtayayan namakgatlajayaw linin xpalakata kiMalanakan Jesucristo!
58 Wa xlakata, kinatalanin tiku kkapaxkiyan, tliwakglh katayatit chu ni kalimakgxtakgtit mintakanajlakan, putum kilhtamaku kamalhuwitit tuku militlawatkan kxtaskujut Malana, chu kakatsitit pi mintaskujutkan xpalakata Malana ni paxkat lama.
Notas
^ Alakatanu wankan «akgtapuka o mujuka».
^ Na limapakuwikan Pedro.
^ Xagriego: «lhtatamakgolh kkalinin».
^ O: «talakgalhaman nema ni kinkalakgchanan». Kaʼakxilhti glosario.
^ Alakatanu wankan «xTata o xTiku».
^ Alakatanu wankan «chi».
^ Alakatanu wankan «kimPuchinakan».
^ Max: «chuna la lakpuwankgo latamanin».
^ O: «laktlawa xatlan tayat».
^ Alakatanu wankan «spitu».
^ Alakatanu wankan «tamakgnin».
^ O: «lakawanankan chu talakgatsikan».
