1 Corintios 2:1-16
2 Wa xlakata, natalan, akxni kkakilitachuwinan tuku tsekg wi xla Dios, ni kmaklakaskilh xtachuwinkan o xliskgalalakan lakchixkuwin tiku lu kgalhtawakgakgonit.
2 Xlakata akxni xakkatawilan klakkaxwililh ni atanu tuku naklichuwinan, kajwatiya xpalakata Jesucristo, tiku makgnika kkiwi.
3 Chu akxni kkalakganchan ni xakkgalhi litliwakga, lu xakpekuama chu na lu xaklhpipima;
4 chu kintachuwin chu akxni klichuwinalh Dios ni klimaklakaskilh tachuwin nema makanajlinan xla lakgskgalalan lakchixkuwin, wata kintachuwin limasiyalh xlitliwakga espíritu,
5 xlakata mintakanajlakan ni anta xtakilhtilh kxliskgalalakan lakchixkuwin, wata anta kxlitliwakga Dios.
6 Chu akinin kalitachuwinanaw liskgalala tiku tliwakga kgalhikgo xtakanajlakan, pero ni wa xliskgalala uma kakilhtamaku,* nipara wa xla mapakgsinanin xalak uma kakilhtamaku, tiku nakamalakgsputukan.
7 Wata lichuwinanaw tuku tsekg wi xla Dios, uma kilhchanima, xliskgalala nema tsekg wi. Dios lakkaxwililh uma liskgalala akxni nina xlakatsuku uma xalixkajni kakilhtamaku, xlakata xkinkalimaxkin kakni.
8 Wa uma liskgalala nema nipara chatum mapakgsina xalak uma kakilhtamaku* lakgapasli, komo xtilakgapaskgolh, ni xtimakgnikgolh kkiwi Malana* Jesús.
9 Pero chuna la tatsokgnit: «Niti akxilhnit, chu niti kgaxmatnit, chu niti xlakpuwanit tuku Dios lakkaxwililh xpalakata tiku paxkikgo».
10 Xlakata wa akinin tiku Dios kinkalimasiyaninitan xʼespíritu, xlakata espíritu putum lakputsanani, asta xtakatsin Dios nema tsekg wi.
11 ¿Anan tiku tlan nalakgapasa xtalakapastakni chatum chixku? Nila tiku chuna tlawa. Uma kajwatiya katsi xnaku ama chixku. Nachuna, nila tiku lakgapasa xtalakapastakni Dios, kajwatiya xʼespíritu Dios.
12 Akinin ni makgamakglhtinaw xʼespíritu kakilhtamaku, wata espíritu nema masta Dios, xlakata nalakgapasaw tuku Dios xatalakgalhaman kinkamaxkinitan.
13 Wa uma tuku na lichuwinanaw, chu ni wa limaklakaskinaw tachuwin nema masiyakgo lakgskgalalan lakchixkuwin, wata tachuwin nema masiya espíritu, uma chuna tlawayaw akxni limaklakaskinaw tachuwin nema masta espíritu santo xlakata namaʼakgatekgsninanaw tuku xla Dios.
14 Pero tiku lakapastaknan chuna la chatum lataman ni makgamakglhtinan tuku masiya xʼespíritu Dios, xlakata xla liʼakxilha pi nitu litaxtu; chu xla nila akgatekgsa,* xlakata xlikgalhit xtamakgtay espíritu santo xlakata tlan nakalakputsanani.
15 Pero chixku tiku wa pulalima xʼespíritu Dios, xlikana pi putum lakputsanani, pero nila tiku lakputsanani uma chixku.
16 XaSanto Tatsokgni wan: «¿Tiku lakgapasnit xtalakapastakni Jehová, xlakata nastakyawa?». Pero akinin kgalhiyaw xtalakapastakni Cristo.
Notas
^ Kaʼakxilhti glosario.
^ Kaʼakxilhti glosario.
^ Alakatanu wankan «Puchina».
^ Alakatanu wankan «makgachakgxi».
