1 Corintios 4:1-21
4 Klakaskinaw pi latamanin kakinkaʼakxilhkgon chuna la kskujnin Cristo chu chuna la lakchixkuwin tiku kalakgayawakanit nakuentajtlawakgo tuku tsekg wi xla Dios.
2 Nachuna, chatum malana* lakaskin pi ama tiku kalakgayawalh nakuentajtlawanankgo, liwana kamakgantaxtikgolh xtaskujutkan.
3 Akit ni lu xlakaskinka kakxilha pi wixin nakilakputsananiyatit chu nipara wa jueces nakilakputsananikgo. Asta nipara kiʼakstu kilakputsananikan.
4 Xlakata ni kkatsi komo ktlawanit tuku nitlan. Pero xlakata uma ni kwamputun pi akit xaʼakgstitum, xlakata kajwatiya Jehová kilakputsanani chu wan komo tuku ktlawama tlan o nitlan.
5 Wa xlakata, nitu kalakputsananitit akxni nina chan xkilhtamaku, wata kakgalhkgalhitit asta akxni namin Malana, tuku tsekg wilakgolh niku kapukswa xla nakamaxtu niku wi xkgakganat chu namasiya tuku wi kxnakujkan latamanin. Alistalh, Dios nakamalanki chatunu chatunu xlakata tuku tlawakgonit.
6 Natalan, chuna la kkatsokgnaninitan, kkalitachuwinanitan kimpalakata chu xpalakata Apolos xlakata nalitamakgtayayatit chu nakatsiniyatit umakgolh tachuwin: «Ni xlilat namalakatsaliyatit tuku tatsokgnit». Akxni chuna natlawayatit, ni katitatlankitit chu ni katilalakgmakgantit.
7 Wa xlakata, ¿tiku tlawa pi tanu nalitaxtuya nixawa achatum? Xlikana, ¿wi tuku kgalhiya nema ni makglhtinanita? Komo xlikana makglhtinanti, ¿tuku xlakata litlankajwanana xtachuna la ni makglhtinanita?
8 ¿Kgalhiyatita putum tuku lakaskinatit? ¿Kgalhiyatita lhuwa tuku xtapalh? ¿Tsukunitantita mapakgsinanatit chuna la mapakgsinanin? Nichuna. Pero komo xtsukutita mapakgsinanatit chuna la mapakgsinanin, akit xaklipaxuwalh, xlakata komo chuna xwa, akinin akxtum xakkatamapakgsinan chuna la mapakgsinanin.
9 Klakpuwan pi akinin tiku apóstoles, Dios xaʼawatiya kinkamaxtunitan xlakata naklitaxtuyaw xtachuna la lakchixkuwin tiku kalaklhkawilinikanit nakamakgnikan, xlakata putum nakaʼakxilhkgokan, xlakata klitaxtunitaw xlilakgastankan latamanin chu ángeles.
10 Akinin xatontos kinkaʼakxilhkanan xlakata kstalaniyaw Cristo, pero wixin lakgskgalalan mi’akstukan kaʼakxilhkanatit xlakata stalaniyatit Cristo; akinin xaxlajwananin pero wixin lakgtliwakgan; wixin kamaxkikanatit kakni, pero akinin kinkalakgmakgankanan.
11 Asta uku, chuntiya kkilhtsinksmaw chu kkgalhputimaw* chu ni lhuwa kilhakgatkan kkgalhiyaw* chu kinkasnokgmakan* chu ni kkgalhiyaw kinchikkan
12 chu lu palha kskujaw. Akxni latamanin kinkawanikgoyan lixkajni tachuwin, akinin kkasikulunatlawayaw; akxni kinkaputsastalanikanan, akinin xatapaxuwan ktayaniyaw;
13 akxni kinkalimawakakanan tuku nitlan, xalakatitum kkgalhtinanaw;* asta uku, klitaxtunitaw xpalhma* uma kakilhtamaku, tuku putum latamanin lakgmakgankgo.
14 Ni kkatsokgnaniman putum uma xlakata nakkamamaxaniyan, wata kkastakyawaman xtachuna la kinkamanan tiku lu kkapaxkiyan.
15 Tlan xkgalhitit akgkaw mil makgalhtawakgenanin* tiku xkamasiyanin chuna la nastalaniyatit Cristo, pero ni chalhuwa minatlatnikan* kgalhiyatit. Xlakata akit klitaxtunit mintlatkan xlakata kkamakamaxkin xatlan tamakatsinin xpalakata Cristo Jesús.
16 Wa xlakata, kkatasaskiniyan pi kastalanitit kiliʼakxilhtit.
17 Wa xlakata kkamalakgachaniman Timoteo, xlakata xla litaxtu xtachuna la kinkgawasa tiku kpaxki chu skujnanima Malana xliputum xnaku. Xla nakamalakapastakayan tuku tanu tanu ktlawa* xlakata nakskujnani Cristo Jesús, chuna la akit kmasiyama kputum congregaciones nema kaniwa wilakgolh.
18 Makgapitsi lanka kamakgkatsikan, xtachuna la nitu kkalakgamachan.
19 Pero nialh makgas, komo Jehová lakaskin, nakkalakganachan chu ni kajwatiya naklakgapasa xtachuwinkan tiku lanka kamakgkatsikan, nachuna nakkatsi komo kgalhikgo xlitliwakga Dios.
20 Xlakata tuku limasiya pi kgalhakgaxmataw xTamapakgsin Dios ni wa tuku wanaw, wata tuku tlawayaw, wa uma tuku masiya pi kgalhiyaw xlitliwakga Dios.
21 ¿Tuku lakaskinatit wixin? ¿Nakkalakganachan xlakata nakkastakyawayan, xtachuna xaklilh kgantum kiwi, o nakkalimasiyaniyan tapaxkit chu tlan nakkalikatsiniyan?
Notas
^ Alakatanu wankan «puchina».
^ Alakatanu wankan «kkgalhtimanaw».
^ Xagriego: «xalhtantala».
^ O: «nitlan kinkalikatsinimakan».
^ Xagriego: «ktasaskinaw».
^ Alakatanu wankan «xbasura».
^ O: «kuentajtlawananin».
^ Alakatanu wankan «milaktatanikan o minatikunan».
^ Xagriego: «tanu tanu kintiji».
