1 Corintios 6:1-20
6 Akxni katakgalhiyatit taʼakglhuwit amakgapitsin, ¿tuku xlakata kalakgpinatit jueces tiku ni stalanikgo xlimapakgsin Dios? Chu ¿tuku xlakata ni wa kalakgpinatit xasantos natalan?
2 ¿O ni katsiyatit pi xasantos xlakskujnin Dios nalakputsananikgo kakilhtamaku? Chu komo wixin nalakputsananiyatit kakilhtamaku, ¿pi nila lakputsananiyatit tuku ni lu xlakaskinka?
3 ¿Ni katsiyatit pi nakalakputsananiyaw ángeles? Wata liwaka xlilat nalakputsananiyaw taʼakglhuwit xala uku.
4 Wa xlakata, komo anan umakgolh taʼakglhuwit nema talakaskin nakalakputsananikan, ¿tuku xlakata laksakatit la* jueces tiku ni kamaxkikan kakni kcongregación?
5 Kkawaniyan uma xlakata nalimaxananatit. ¿Ni anan kmilakgstipankan chatum xaskgalala chixku tiku tlan nakalakputsanani xnatalan?
6 Wata ¡natalan lalinkgo kxlakatinkan jueces xlakata tiku ni kanajlanikgo Dios nakalakputsananikgo xtaʼakglhuwitkan!
7 Xlikana, akxni lipinatit mintalakan kxlakatinkan jueces miʼakstukan tamamaxanipatit. ¿Tuku xlakata ni tayaniyatit akxni mintalakan katlawaniyan tuku nitlan? Tlakg tlan xwa pi xlakan xkatapakgsinilh tuku milakan xwanit.
8 Pero wixin wata wa minatalankan katlawaniyatit tuku nitlan, chu kamakglhtiyatit tuku katapakgsini.
9 ¿O ni katsiyatit pi latamanin tiku ni xaʼakgstitum ni katimakglhtinankgolh xTamapakgsin Dios? Ni kataʼakgskgawitit. Tiku tlawakgo talakgxtumit nema ni xlitatlawat,* tiku kakninanikgo tatlawamakgxtu,* tiku akgskgawikgo tiku tamakgaxtokgkgo, lakchixkuwin tiku mastakgo talakaskin pi nakatatalakgxtumikgo xtachixkukan, lakchixkuwin tiku tatalakgxtumikgo xtachixkukan,
10 kgalhananin, latamanin tiku lhuwa tuku kgalhiputunkgo, kgotnin, tiku kawani amakgapitsin lixkajni tachuwin, chu tiku akgskgawimakglhtinankgo, ni katimakglhtinankgolh xTamapakgsin Dios.
11 Pero makgapitsi wixin xapulana chuna xwanitantit. Pero wixin kachakgekanitantit; wixin kamasantujlikanitantit; wixin xaʼakgstitum kaʼakxilhkanitantit xpalakata xtukuwani Malana* Jesucristo chu xʼespíritu kiDioskan.
12 Kimaxkikan talakaskin pi putum tlan naktlawa, pero ni putum tlan kitaxtu. Kimaxkikan talakaskin pi putum tlan naktlawa, pero ni ktimastalh talakaskin pi wi tuku nakintlaja.
13 Liwat anan xpalakata pokgo, chu pokgo anan xpalakata liwat, pero uma pulaktiy Dios nakamalakgsputukgo. Makni ni xlilat namaklakaskinkan xlakata talakgxtumit nema ni xlitatlawat,* xlakata makni wi xpalakata xtaskujut Malana, chu Malana kuentajtlawa makni.
14 Pero Dios malakastakwanilh Malana kkalinin chu nachuna akinin nakinkalimalakastakwaniyan xlitliwakga.
15 ¿Ni katsiyatit pi mimaknikan tatakgatsi xmakni Cristo? ¿Pi nakmapanu tuku litatakgatsi xmakni Cristo chu lakxtum naktamakilhastuka xmakni puskat tiku sta xmakni? ¡Nikxni chuna kalalh!
16 ¿Ni katsiyatit pi putum tiku tatalakgxtumi puskat tiku sta xmakni akgtum makni talitaxtu? Xlakata Dios wan: «Xchatiykan akgtum makni nalitaxtukgo».
17 Pero putum tiku tapakgsini Malana nachuna lakapastaknan chuna la xla.
18 ¡Katsalanitit talakgxtumit nema ni xlitatlawat!* Akxni chatum chixku tlawa kaxatukawa talakgalhin, uma talakgalhin ni lakglakgalhi xmakni, pero tiku tlawa talakgxtumit nema ni xlitatlawat lakglakgalhima xmakni.
19 ¿Ni katsiyatit pi wixin xtemplo espíritu santo nema Dios kamaxkiyan chu kgalhiyatit? Chu wixin ni akstu katapakgsinikanatit,
20 xlakata lu tapalaxla xokgoka mimpalakatakan. Wa xlakata kamaxkitit kakni Dios kmimaknikan.
Notas
^ Alakatanu wankan «chi».
^ Kaʼakxilhti glosario.
^ Alakatanu wankan «tamakanitlaw».
^ Alakatanu wankan «Puchina».
^ Griego, pornéia. Kaʼakxilhti glosario.
^ Griego, pornéia. Kaʼakxilhti glosario.
