1 Corintios 7:1-40
7 Chu wa uma xtakgalhtin mintakgalhskininkan: tlakg tlan pi chatum chixku ni naxama* puskat;
2 pero xlakata lhuwa anan talakgxtumit nema ni xlitatlawat,* chatum chixku kakgalhilh xpuskat* chu chatum puskat kakgalhilh xchixku.
3 Xachixku kamaxkilh xpuskat* tuku xlilat,* chu xapuskat na kamaxkilh xchixku tuku xlilat.
4 Xapuskat ni wa mapakgsi xmakni, wata wa xchixku; nachuna, xachixku ni wa mapakgsi xmakni, wata wa xpuskat.*
5 Ni nalamachokgoyatit komo talakgxtumiputunatit. Pero komo chatum chixku chu chatum puskat lakkaxwilikgo pi kaj ni makgas ni natalakgxtumikgo xlakata natlawakgo oración, uma lu tlan. Alistalh tlan natalakgxtumiparayatit, xlakata Satanás ni chuntiya nakamatlawiputunan tuku nitlan xlakata nila machokgoyatit tuku tlawaputunatit.
6 Tuku aku klichuwinalh tlan natlawayatit, pero ni akgtum limapakgsin.
7 Pero xaklakaskilh pi putum lakchixkuwin ni xtamakgaxtokgkgolh chuna la akit. Pero Dios masta talakaskin pi makgapitsin ni natamakgaxtokgkgo chu amakgapitsin katamakgaxtokgkgolh.
8 Pero kkawani tiku ni tamakgaxtokgkgonit chu lakpuskatin tiku ninita xchixkukan pi tlakg tlan chuntiya katamakgxtakgkgolh chuna la akit.
9 Pero komo nila machokgokgo tuku tlawaputunkgo, katamakgaxtokgkgolh, wata tlakg tlan natamakgaxtokgkgo nixawa lu natalakgxtumiputunkgo.
10 Tiku tamakgaxtokgkgonit kkamaxki tastakyaw, ni akit, wata wa Malana,* pi puskat ni xlilat namakgxtakga xchixku.
11 Pero komo puskat namakgxtakga, ni katamakgaxtokgli, o komo tlan, kalakgtaspitpa xchixku; chu xachixku ni xlilat namakgxtakga xpuskat.*
12 Pero amakgapitsin kkawani, chuna, akit kwan, ni wa Malana: komo chatum tala* kgalhi xpuskat* tiku ni kanajlani Malana chu puskat xatapaxuwan anta tatamakgxtakgputun, ni kamakgxtakgli;
13 komo chatum puskat kgalhi xchixku tiku ni kanajlani Malana chu chixku xatapaxuwan anta tatamakgxtakgputun, ni kamakgxtakgli xchixku.
14 Xlakata xachixku tiku ni kanajlani Malana xaskulunku litaxtu xpalakata xpuskat,* chu xapuskat tiku ni kanajlani Malana xaskulunku litaxtu xpalakata tala; komo nichuna xwa, xkamanan xataxkajwani xlitaxtukgolh, pero uku xaskulunku litaxtukgo kxlakatin Dios.
15 Pero komo tiku ni kanajlani Malana naʼan,* kaʼalh; komo chuna la, ni talakaskin pi chatum tala chixku o tala puskat xafuerza natatamakgxtakga. Dios kamaxkiman takaksni.
16 Wix puskat, komo natatamakgxtakga minchixku, max nalakgmaxtuya. Chu wix chixku, komo natatamakgxtakga mimpuskat, max nalakgmaxtuya.
17 Pero, tlan pi chatunu chatunu lataman nalatama chuna la Jehová maxkinit talakaskin, chuna la xlama akxni Dios laksakli. Chu wa uma limapakgsin kkamaxki putum congregaciones.
18 ¿Wi chatum chixku tiku xʼakstilichukunikanit kxuwa xlichixku* akxni Dios laksakli? Lu tlan nawan pi chuntiya nalatama. ¿Wi chatum chixku tiku ni xʼakstilichukunikanit kxuwa xlichixku akxni Dios laksakli? Lu tlan nawan pi chuntiya nalatama.
19 Tuku tlakg xlakaskinka wa nakgalhakgaxpata xlimapakgsin Dios, ni wa para akstilichukunikanita kxuwa milichixku* o ni.
20 Chuna la xlama chatunu chatunu akxni Dios laksakli, chuntiya kalatamalh.
21 ¿Skujni xwanita akxni laksakkanti? Ni kalilakgaputsa uma; pero komo maxkikana talakaskin nialh skujni nalitaxtuya, ni kalakgmakganti.
22 Xlakata putum xtamakgalhtawakgen Malana tiku laksakka akxni skujni xwanit, lakgmaxtuka chu tapakgsini Malana; nachuna, putum tiku laksakkanit akxni ni skujni xwanit, uku kskujni Cristo litaxtu.
23 Xlakata lu tapalaxla xokgoka mimpalakatakan; nialh kskujnikan lakchixkuwin kalitaxtutit.
24 Natalan, chuna la xlapatit minchatunukan akxni kalaksakkantit, chuntiya kalatapatit kxlakatin Dios.
25 Pero xpalakatakan laktsumajan tiku nikxni tamakgaxtokgkgonit, Malana nitu kimaxkinit limapakgsin, pero kkawani tuku akit klakpuwan xlakata Malana kilimasiyaninit talakgalhaman chu tlan nalipawanatit tuku kwan.
26 Xlakata wilaw kxakatuwa kakilhtamaku, akit klakpuwan pi tlakg tlan chatum chixku chuntiya natamakgxtakga chuna la wi.
27 ¿Kgalhiya mimpuskat? Ni kaputsa la* namakgxtakga. ¿Ni kgalhiya mimpuskat? Ni kaputsa puskat.
28 Pero maski xtamakgaxtokgti, ni akgtum talakgalhin xlitaxtulh. Chu komo chatum tsumat xtamakgaxtokgli, xla ni tlawama akgtum talakgalhin. Pero tiku chuna natlawakgo, nakgalhikgo taʼakglhuwit kxlatamatkan.* Pero akit ni klakaskin katitaxtutit uma taʼakglhuwit.
29 Nachuna, natalan, nialh lhuwa kilhtamaku wi. Lata uku kilhtamaku, tiku kgalhikgo xpuskatkan* kalitaxtulh chuna la tiku nitu kgalhikgo,
30 chu tiku tasakgo kalitaxtukgolh chuna la tiku ni tasakgo, chu tiku paxuwakgo chuna la tiku ni paxuwakgo, chu tiku tamawanankgo chuna la tiku nitu kgalhikgo,
31 chu tiku maklakaskinkgo uma kakilhtamaku, xtachuna la tiku ni putum maklakaskinkgo; xlakata tuku lama kkakilhtamaku talakgpalima.
32 Klakaskin pi nitu kalilakgaputsatit. Chixku tiku ni tamakgaxtokgnit kajwatiya lilakgaputsa natlawa xtaskujut Malana xlakata makgapaxuwaputun Malana.
33 Pero chixku tiku tamakgaxtokgnit lilakgaputsa tuku xalak uma kakilhtamaku xlakata makgapaxuwaputun xpuskat,*
34 pulaktiy tuku lilakgaputsa. Nachuna, puskat tiku ni tamakgaxtokgnit, nachuna tsumat,* lilakgaputsa natlawa xtaskujut Malana, xlakata xmakni chu xtalakapastakni tlan xaskulunku nalitaxtu. Pero puskat tiku tamakgaxtokgnit lilakgaputsa tuku xalak uma kakilhtamaku xlakata makgapaxuwaputun xchixku.
35 Pero kkawaniyan uma xlakata minchatunukan tlan nakakitaxtuniyan, ni wa para kkamachokgoputunan, wata kkamakgpuwantiniyan natlawayatit tuku xlilat chu xlakata naskujnaniyatit Malana xliputum minakujkan chu nitu atanu tuku nalilakgaputsayatit.
36 Pero komo chatum lataman tiku nina tamakgaxtokgnit* makgkatsi pi nila makgatlaja chuna la talakgxtumiputun, chu akchanita xkata, wata katamakgaxtokgli. Ni talakgalhin.
37 Pero komo wi tiku chuna lakkaxwilinit kxnaku chu ni maklakaskin chuna natlawa, wata tlan malakgachokgo tuku makgkatsi chu chuna liwana lakpuwanit kxnaku pi ni ama tamakgaxtokga, tlan tuku tlawa.
38 Nachuna, putum tiku natamakgaxtokga* tlan tuku tlawama, pero putum tiku ni natamakgaxtokga tlakg tlan tuku natlawa.
39 Chatum puskat ni xlilat natatamakgaxtokga atanu chixku akxni xchixku lamajku. Pero komo xchixku naniy, puskat tlan natatamakgaxtokga tiku xla nalakaskin, pero kajwatiya tiku kstalanina Malana.
40 Pero akit klakpuwan, puskat tlakg napaxuwa komo natamakgxtakga chuna la wi; chu akit liwana kkatsi pi na kkgalhi xʼespíritu Dios.
Notas
^ Uma wamputun, natatalakgxtumi.
^ Griego, pornéia. Kaʼakxilhti glosario.
^ Alakatanu wankan «xchat».
^ Alakatanu wankan «xchat».
^ Uma kilhchanima, talakgxtumit ktamakgaxtokgat.
^ Alakatanu wankan «xchat».
^ Alakatanu wankan «Puchina».
^ Alakatanu wankan «xchat».
^ Alakatanu wankan «takam».
^ Alakatanu wankan «xchat».
^ Alakatanu wankan «xchat».
^ O: «namakgxtakga».
^ Kaʼakxilhti glosario.
^ Kaʼakxilhti glosario.
^ Alakatanu wankan «chi».
^ Xagriego: «taʼakglhuwit kliwa».
^ Alakatanu wankan «xchatkan».
^ Alakatanu wankan «xchat».
^ Xagriego kilhchanima tsumat tiku nina tatalakgxtumi chixku.
^ O: «nina talakgxtumi».
^ O: «talakgxtumi kxtamakgaxtokgat».
