1 Corintios 9:1-27
9 Akit tlan ktlawa tuku klakaskin. ¿Ni apóstol akit? ¿Ni kakxilhnit kiMalanakan* Jesús? ¿Ni wixin kintaskujut lata kskujninit Malana?
2 Max amakgapitsin ni apóstol kiʼakxilhkgo, ¡pero liwana kkatsi pi wixin chuna kiʼakxilhatit! Xlakata wixin wa tuku litasiya pi akit chatum xʼapóstol Malana.
3 Wa uma tuku klitakgalhmakgtaya xlakata tiku kilakputsananimakgolh.
4 Kinkalakgchanan* nakwayanaw chu nakkgotnanaw, ¿ni xlikana?
5 Kinkalakgchanan naktaʼanaw kimpuskatkan tiku na kstalanina Cristo, chuna la amakgapitsin apóstoles, xnatalan* Malana chu Cefas,* ¿ni xlikana?
6 ¿O kajwatiya Bernabé chu akit kiliskujatkan xlakata nakkgalhiyaw tuku naklilatamayaw?
7 ¿Pi anan chatum soldado tiku xʼakstu xokgo tuku maklakaskin akxni skujma la* soldado? ¿Pi anan chatum tiku chan uvas chu ni way xatawakat? ¿O anan chatum mapuchwayanina tiku nipara tsinu way xleche xborregos?
8 Tuku klichuwinama ni kajwatiya chuna lakpuwankgo latamanin. Limapakgsin nachuna lichuwinan uma.
9 Xlakata tatsokgnit kxLimapakgsin Moisés: «Nitu namakgalhnuya toro akxni laktayamima* talhtsi». ¿Wa toros tuku lilakgaputsa Dios?
10 ¿O kaj kimpalakatakan chuna wan? Chuna tsokgwilika kimpalakatakan, xlakata chixku tiku lakgwaxnan chuna xlitlawat xlakata kanajla pi namakgala xtachanan chu tiku lakpajmima talhtsi chuna xlitlawat xlakata kanajla pi naway xatawakat.
11 Komo akinin kchanitaw tuku xla Dios kmilakgstipankan, ¿ni xlilat nakilalimakgtayayaw tuku kmaklakaskinaw?
12 Komo amakgapitsin lakchixkuwin kalakgchan nakamakgtayayatit, ¿ni tlakg xlilat kinkalakgchanan akinin? Pero maski kinkalakgchanan* nitu kkaskininitan, wata putum ktayaniyaw xlakata ni nakmalakgachokgoyaw xatlan tamakatsinin xpalakata Cristo.
13 ¿Ni katsiyatit pi lakchixkuwin tiku tlawakgo xasanto taskujut ktemplo wakgo tuku xalak templo, chu tiku skujkgo kpumakamastan makglhtinankgo aktsu tuku makamastakan kpumakamastan?
14 Xtachuna uma, Malana limapakgsinalh pi tiku lichuwinankgo xatlan tamakatsinin, kalitamakgtayakgolh xatlan tamakatsinin.
15 Pero nitu kkaskininitan uma tamakgtay. Nitu kkatsokgnaniman xlakata chuna nakimaxkiyatit, nikxni ktimastalh talakaskin pi wi tiku xkimakglhtilh uma tuku lanka kilimakgkatsikan, xlakata klichuwinan xatlan tamakatsinin chu ni kmatajinan.
16 Chu komo klichuwinan xatlan tamakatsinin uma ni tlawa pi lanka nakimakgkatsikan, xlakata uma chuna kilitlawat. Xlikana, ¡kgoxota akit komo ni naklichuwinan xatlan tamakatsinin!
17 Komo xatapaxuwan chuna naktlawa, nakkgalhi kintatlaja; chu maski nichuna ktlawaputun, chuntiya kilitlawat xlakata chuna kilakgayawakanit.
18 Wa xlakata, ¿tuku kintatlaja? Pi akxni naklichuwinan xatlan tamakatsinin ni nakmatajinan, xlakata ni nakmalakatsali nakskin tuku kilakgchan xlakata xatlan tamakatsinin.
19 Maski ni kskujni chatum lataman klitaxtuni, kskujni kkalitaxtuninit putum latamanin, xlakata chuna tlakg lhuwa nakkamakgtaya lata tlan nakmatlani.
20 Xpalakata judíos, judío klitaxtulh xlakata nakkamakgtaya judíos; xpalakata tiku makgantaxtikgo xLimapakgsin Moisés, na xmakgantaxtina Limapakgsin klitaxtulh maski ni wa xLimapakgsin Moisés kimpulalin, xlakata nakkamakgtaya tiku makgantaxtikgo xLimapakgsin Moisés.
21 Xpalakata tiku ni makgantaxtikgo xLimapakgsin Moisés, ni xmakgantaxtina Limapakgsin klitaxtulh, maski akit kmakgantaxti xlimapakgsin Dios chu xla Cristo, xlakata tlan nakkamakgtaya tiku ni makgantaxtikgo Limapakgsin.
22 Xpalakata tiku xaxlajwananin, na xaxlajwani klitaxtulh xlakata tlan nakkamakgtaya tiku xaxlajwananin. Xpalakatakan tanu tanu latamanin, tanu tanu tuku klitaxtunit, xlakata komo tlan nakkalakgmaxtu makgapitsi latamanin.
23 Pero putum chuna ktlawa xpalakata xatlan tamakatsinin, xlakata tlan nakkalitachuwinan amakgapitsin.
24 ¿Ni katsiyatit pi tiku kgosnankgo* niku latlajakan putum kgosnankgo, pero kaj chatum makglhtinan tatlaja? Kakgosnantit xlakata natlajananatit.
25 Chu putum tiku makgtanu niku latlajakan* mapakgsi* xmakni xliputum tuku tlawa. Xlikana, xlakan chuna tlawakgo xlakata namakglhtinankgo akgtum corona nema lakgsputa, pero akinin, akgtum corona nema ni lakgsputa.
26 Wa xlakata, kkgosnama xlakata kkatsi niku kama; chuna la pach pach kmakawan nichuna ktlawa xtachuna la kaj un kkgaxima;
27 wata kmapatini* kimakni chu kmapakgsi chuna la chatum skujni, xlakata akxni kkalitachuwinanita Dios amakgapitsin ni naʼanan tuku natlawa pi akit nitlan nakiʼakxilhkan.*
Notas
^ Alakatanu wankan «kimPuchinakan».
^ Xagriego: «Kkgalhiyaw limapakgsin».
^ Alakatanu wankan «xnatakamanan».
^ Na limapakuwikan Pedro.
^ Alakatanu wankan «chi».
^ O: «lakpajmima».
^ Xagriego: «kkgalhiyaw limapakgsin».
^ Alakatanu wankan «tatsalanan».
^ O: «putum tiku makgkgamanan».
^ Tachuwin xagriego nema maklakaskinka na tlan kilhchani machokgokan tuku tlawakan, la chuwinankan o tuku lakpuwankan.
^ O: «liwana kʼakgastakyawa».
^ O: «nakilakgmakgankan».
