1 Juan 1:1-10
1 Kkatsokgnaniman xlakata tiku limin tachuwin nema masta latamat. Xla lama lata makgasata, tiku kkgaxmatninitaw chuna la chuwinalh, tiku kakxilhnitaw chu liwana klakglakanitaw chu kimakankan klixamanitaw*
2 (chuna, kinkamasiyanikan latamat nema ni kgalhi xlisputni chu kakxilhnitaw chu klichuwinanaw chu wa uma tuku kkalitachuwinaman wixin. Uma latamat nema ni kgalhi xlisputni wa xaTlat* malakatsukicha chu kinkamasiyanikan),
3 tuku kakxilhnitaw chu tuku kkgaxmatnitaw kkalitachuwinaman wixin, xlakata wixin na makxtum nakilatatawilayaw. Chu akinin akxtum kkatawilaw xaTlat chu xKgawasa, Jesucristo.
4 Kkatsokgnaniman uma xlakata lu nakpaxuwayaw.
5 Wa uma tamakatsin nema kkgaxmatniw Jesús chu kkamakatsiniman: Dios xkgakganat chu xla ni kgalhi tuku xakapukswa.
6 Komo wanaw «Akxtum tawilaw» pero chuntiya lamaw niku kapukswa, akgsaninamaw chu ni lilamaw tuku xaxlikana.
7 Pero komo lamaw kxkgakganat, chuna la xla wi kxkgakganat, putum makxtum natawilayaw, chu xkgalhni Jesús, xKgawasa, kinkalimaskulunkiyan xliputum talakgalhin.
8 Komo wanaw «Ni kgalhiyaw talakgalhin», kiʼakstukan taʼakgskgawimaw chu xaxlikana ni anta wi kkinakujkan.
9 Dios ni makgxtakgnan chu xaʼakgstitum, wa xlakata, komo nawanaw kintalakgalhinkan, xla nakinkatapatiyan chu nakinkamaskulunkiyan xliputum tuku ni xaʼakgstitum.
10 Komo wanaw «Ni ktlawanitaw talakgalhin», akgsanina limaxtumaw chu xtachuwin ni anta wi kkinakujkan.
