1 Juan 2:1-29
2 Laktsu kinkamanan, kkatsokgnaniman umakgolh xlakata ni natlawayatit talakgalhin. Pero komo wi tiku lakgalhinan, kgalhiyaw chatum makgtayana* tiku akxtum tawi xaTlat: Jesucristo, tiku xaʼakgstitum.
2 Xla akgtum tamakamastan nema mastaka xlakata tlan natalalimparayaw Dios,* pero ni kajwatiya akinin, nachuna putum latamanin xalak kakilhtamaku.
3 Chu xlakata uma katsiyaw pi lakgapasnitaw: komo chuntiya nakgalhakgaxmataw xlimapakgsin.
4 Tiku wan «Akit klakgapasa», pero ni kgalhakgaxmata xlimapakgsin, uma lataman akgsaninama chu ni anta wi kxnaku tuku xaxlikana.
5 Pero komo wi tiku kgalhakgaxmata xtachuwin Cristo, liwana natasiya pi xlikana paxki Dios. Xlakata uma katsiyaw pi akxtum tawilaw.
6 Tiku wan pi chuntiya akxtum tawi, xlilat chuntiya nalatama chuna la Jesús latamalh.
7 Natalan tiku kkapaxkiyan, ni kkatsokgnaniman akgtum xasasti limapakgsin, wata akgtum xamakgan limapakgsin nema kgalhinitantit lata xapulana. Uma xamakgan limapakgsin wa tachuwin nema wixin kgaxpattit.
8 Pero kkatsokgnaniman akgtum xasasti limapakgsin, akgtum limapakgsin nema xla chu wixin makgantaxtinitantit, xlakata uku tuku xakapukswa lakgsputma chu xaxlikana makgskgot maxkgakgenamaja.
9 Tiku wan pi lama niku anan makgskgot pero ni akxilhputun xtala* chuntiya wi niku kxakapukswa.
10 Tiku paxki xtala chuntiya wi niku anan makgskgot, chu ni anan tuku namaʼakgchakgxni.
11 Pero tiku ni akxilhputun xtala wi niku kxakapukswa chu lapula niku kxakapukswa, chu ni katsi niku ama, xlakata xakapukswa tlawa pi nila nalakawanan.
12 Laktsu kinkamanan, kkatsokgnaniman xlakata Dios katapatinitan mintalakgalhinkan. Kaj xlakata xtukuwani* chuna tlawanit.
13 Natlatni, kkatsokgnaniman xlakata lakgapasnitantit tiku lama lata xapulana. Kamanan, kkatsokgnaniman xlakata makgatlajanitantit Akgskgawini.* Laktsu kamanan, kkatsokgnaniman xlakata lakgapasnitantit Dios, kinTlatkan.
14 Natlatni, kkatsokgnaniman xlakata lakgapasnitantit tiku lama lata xapulana. Kamanan, kkatsokgnaniman xlakata lakgtliwakga wixin chu xtachuwin Dios chuntiya wi kminakujkan chu makgatlajanitantit Akgskgawini.*
15 Ni kapaxkitit kakilhtamaku nipara tuku anan kkakilhtamaku. Komo wi tiku paxki kakilhtamaku, ni paxki xaTlat.*
16 Xlakata tuku anan kkakilhtamaku, tlawaputunkan tuku lu nitlan nema lu lakgati makni, tuku lakgati lakgastapu chu litlankajwanankan tuku kgalhikan, uma ni masta xaTlat, wata lakatsuku kkakilhtamaku.
17 Chu nachuna, kakilhtamaku nasputa, chu putum tuku latamanin lakgatikgo kkakilhtamaku na nasputa, pero tiku tlawa xtalakaskin Dios putum kilhtamaku nalatama.
18 Laktsu kinkamanan, nialh lhuwa kilhtamaku anan. Wixin katsiyatit pi anticristo* namin. Chu k’uma kilhtamaku anan lhuwa anticristos, wa xlakata likatsiyaw pi nialh lhuwa kilhtamaku anan.
19 Xlakan na anta unu xkinkatawilakgon, pero kinkamakgxtakgkgon xlakata ni xkinkatatapakgsikgoyan; komo xkintikatatapakgsikgon unu xkintikatatawilakgon. Pero taxtukgolh xlakata liwana xtasiyalh pi ni putum kinkatatapakgsikgoyan.
20 Chu wixin kamaxkikanitantit xlitliwakga Dios, chu putum wixin lakgapasatit tuku xaxlikana.
21 Ni kkatsokgnaniman xlakata ni lakgapasatit xaxlikana, wata kkatsokgnaniman xlakata lakgapasatit chu xlakata kxaxlikana ni lakatsuku taʼakgsanin.
22 ¿Tiku akgsanina? ¿Ni wa akgsanina tiku wan pi Jesús ni xaxlikana Cristo? Uma anticristo:* tiku lakgmakgan xaTlat chu xaKgawasa.
23 Putum tiku lakgmakgan xaKgawasa na nitlan talalin xaTlat. Pero tiku makgamakglhtinan xaKgawasa na tlan talalin xaTlat.
24 Chu wixin, chuntiya militlawatkan tuku kgaxpattit lata xapulana. Komo chuntiya tlawayatit tuku kgaxpattit lata xapulana, nachuna wixin chuntiya akxtum natatawilayatit xaKgawasa chu xaTlat.
25 Nachuna, wa uma tuku xla kinkamalaknunin: latamat nema ni kgalhi xlisputni.
26 Kkatsokgnaniyan uma xlakata ni nakaʼakgskgawikanatit.
27 Chu wixin, Dios kalilaksaknitan xlitliwakga, chu uma litliwakga chuntiya akxtum katawilan chu ni talakaskin pi wi tiku nakamasiyaniyan. Pero uma xlitliwakga xaxlikana chu ni taʼakgsanin, putum kamasiyaniman. Chuna la kamasiyaninitan, chuntiya akxtum katatawilatit.
28 Wa xlakata, laktsu kinkamanan, chuntiya akxtum katatawilatit, xlakata akxni nalimasiya xlitliwakga ni napekuanaw akxni nachuwinanaw chu akxni kinkatawilan nawan ni natatsekgaw xlakata kintamaxanatkan.
29 Komo wixin katsiyatit pi xla xaʼakgstitum, na katsiyatit pi putum tiku tlawa tuku xaʼakgstitum xkgawasa litaxtu.
Notas
^ O: «kgalhmakgtayana».
^ O: «tamakamastan xlakata nakinkatapatikanan kintalakgalhinkan».
^ Alakatanu wankan «xtakam».
^ Uma wamputun, Jesús.
^ Xagriego: «Tiku lixkajni likatsi».
^ Xagriego: «Tiku lixkajni likatsi».
^ Alakatanu wankan «xaTata o xaTiku».
^ Anticristo wa xtalamakgasitsin o tiku talalakatawaka Cristo.
^ Anticristo wa xtalamakgasitsin o tiku talalakatawaka Cristo.
