1 Juan 3:1-24
3 ¡Kaʼakxilhtit lu lanka tapaxkit nema kinkakgalhiniyan xaTlat* xlakata kinkalimapakuwikanan xkamanan Dios! Chu wa litaxtuyaw. Pero kakilhtamaku ni kinkalakgapasan, xlakata ni lakgapasnit Dios.
2 Natalan tiku kkapaxkiyan, maski xkamanan Dios litaxtuyaw, nina kinkamakatsinikanan tuku nalitaxtuyaw. Katsiyaw pi akxni xla nalimasiya xlitliwakga, nalitaxtuyaw chuna la xla, xlakata xlikana naʼakxilhaw.
3 Chu putum tiku kgalhini uma takgalhkgalhin, xʼakstu taskulunki, xlakata xla xaskulunku.
4 Putum tiku chuntiya lakgalhinan lakatsalama limapakgsin, chu talakgalhin wa lakatsalakan limapakgsin.
5 Wixin na katsiyatit pi Jesús milh xlakata namapanu kintalakgalhinkan, chu xla ni kgalhi talakgalhin.
6 Nipara chatum tiku akxtum tawi chuntiya tlawa talakgalhin; nipara chatum tiku chuntiya tlawa talakgalhin lakgapasa chu kanajlani.
7 Laktsu kinkamanan, niti kakaʼakgskgawin. Tiku chuntiya tlawa tuku xaʼakgstitum, akgstitum litaxtu, chuna la xla xaʼakgstitum.
8 Tiku chuntiya tlawa talakgalhin tapakgsini Akgskgawini, xlakata Akgskgawini chuntiya lakgalhinama lata xapulana.* Wa xlakata milh xKgawasa Dios: xlakata namalakgsputu* putum tuku tlawanit Akgskgawini.
9 Nipara chatum tiku xkgawasa Dios chuntiya tlawa talakgalhin, xlakata kgalhi xʼespíritu Dios,* chu nila chuntiya tlawa talakgalhin xlakata xkgawasa Dios litaxtu.
10 Wa uma tuku kalilakgapaskan xkamanan Dios chu xkamanan Akgskgawini: tiku ni tlawa tuku xaʼakgstitum, ni xkgawasa Dios. Chu tiku ni paxki xtala, na ni xkgawasa Dios.
11 Xlakata wa uma tamakatsin nema kgaxpatnitantit lata xapulana: pi kalapaxkiw chatunu chatunu.
12 Ni kalitaxtuw chuna la Caín, tiku xkgawasa Akgskgawini litaxtulh chu makgnilh xtala. ¿Chu tuku xlakata makgnilh? Xlakata xla lu lixkajni tuku xtlawa, pero xtala xtlawa tuku xaʼakgstitum.
13 Natalan, ni kaks kalilakawantit xlakata kakilhtamaku ni kaʼakxilhputunan.
14 Akinin katsiyaw pi xtachuna la xninitaw, pero uku kgalhiyaw latamat xlakata kapaxkiyaw natalan. Tiku ni paxkinan chuntiya ninit.
15 Putum tiku ni akxilhputun xtala makgnina litaxtu, chu wixin katsiyatit pi nipara chatum tiku kamakgni latamanin namakglhtinan latamat nema ni kgalhi xlisputni.
16 Wa uma xpalakata lakgapasnitaw tapaxkit: xlakata xla mastalh xlatamat kimpalakatakan, chu akinin na xlilat namastayaw kilatamatkan xpalakata kinatalankan.
17 Pero, komo wi tiku kgalhi tuku tlan nakalimakgtaya amakgapitsin chu akxilha pi xtala wi tuku maklakaskima chu ni limasiyaniputun talakgalhaman, ¿tlan nawanaw pi paxki Dios?
18 Laktsu kinkamanan, ni kalimasiyatit mintapaxkitkan kaj xlakata tuku wanatit, wata liwana kalimasiyatit xlakata tuku tlawayatit chu xliputum minakujkan kalimasiyatit.
19 Chuna nakatsiyaw pi tatayayaw xaxlikana, chu namakanajliyaw kinakujkan pi Dios kinkapaxkiyan,
20 komo kinakujkan pulaklhuwa tuku xlakata nakinkalimawakayan tuku nitlan; kalakapastakwi pi Dios tlakg lanka nixawa kinakujkan chu putum katsi.
21 Natalan tiku kkapaxkiyan, komo kinakujkan ni kinkalimawakayan tuku nitlan, tlan natachuwinanaw Dios chu ni nakilhpekuanaw.
22 Nachuna, xlakata kgalhakgaxmataw xlimapakgsin chu linaw kilatamatkan chuna la lakgati, nakinkamaxkiyan putum tuku skiniyaw.
23 Chu wa uma xlimapakgsin: pi kakanajlaniw xtukuwani xkgawasa, Jesucristo, chu kalapaxkiw chatunu chatunu, chuna la wan limapakgsin nema kinkamaxkin.
24 Nachuna, tiku kgalhakgaxmata xlimapakgsin Dios chuntiya akxtum tawi, chu Dios chuntiya akxtum tatawila uma lataman. Chu xlakata espíritu santo nema kinkamaxkin, katsiyaw pi xla chuntiya akxtum kinkatawilan.
Notas
^ Alakatanu wankan «xaTata o xaTiku».
^ O: «lata akxni tsukulh».
^ O: «nalaktlawa».
^ Xagriego: «xlakata kgalhi xtalhtsi Dios».
