1 Juan 4:1-21
4 Kinatalan tiku kkapaxkiyan, ni kakanajlatit putum tamakatsin,* maski uma tamakatsin tasiya pi Dios mastanit, wata kakaliʼakxilhtit putum tamakatsin* komo wa Dios mastakgonit, xlakata lhuwa ni xaxlikana palakachuwinanin tsukukgonit tasiyakgo kkakilhtamaku.
2 Chuna nakatsiyatit komo akgtum tamakatsin wa Dios mastanit: putum tamakatsin nema wan pi Jesucristo milh chuna la chatum lataman wa Dios mastanit.
3 Pero akgtum tamakatsin nema ni makgamakglhtinan Jesús ni wa Dios mastanit. Uma wa xtamakatsin anticristo,* tiku wixin kgaxpattit pi xʼama min chu wija kkakilhtamaku.
4 Laktsu kinkamanan, wixin tapakgsiniyatit Dios chu kamakgatlajanitantit ni xaxlikana palakachuwinanin, xlakata tiku akxtum katawilan tlakg lanka nixawa tiku akxtum tawi kakilhtamaku.
5 Xlakan tapakgsinikgo kakilhtamaku; wa xlakata lichuwinankgo tuku tapakgsini kakilhtamaku chu kakilhtamaku kakgaxmatnikgo.
6 Akinin tapakgsiniyaw Dios. Tiku lakgapasnit Dios kinkakgaxmatniyan; tiku ni tapakgsini Dios ni kinkakgaxmatniyan. Chuna katsiyaw tuku tamakatsin xaxlikana chu nema ni xaxlikana.
7 Kinatalan tiku kkapaxkiyan, chuntiya kalapaxkiw chatunu chatunu, xlakata tapaxkit tapakgsini Dios, chu putum tiku kapaxki xnatalan chatum xkam Dios litaxtu chu lakgapasa Dios.
8 Tiku ni paxkinan ni lakgapasa Dios, xlakata Dios tapaxkit.*
9 Chuna Dios kinkalimasiyanin xtapaxkit: Dios malakgachalh kkakilhtamaku kaj xachastum xKgawasa xlakata kaj xpalakata xlikgalhiw latamat.
10 Wa uma kilhchanima tapaxkit: ni wa pi akinin paxkiw Dios, wata xla kinkapaxkin chu malakgachalh xKgawasa chuna la tamakamastan xpalakata kintalakgalhinkan nema tlawa pi tlan natalalimparayaw Dios.*
11 Natalan tiku kkapaxkiyan, komo Dios chuna kinkapaxkin, akinin na xlilat nalapaxkiyaw.
12 Nikxni chatum lataman akxilhnit Dios. Komo chuntiya lapaxkiyaw chatunu chatunu, Dios chuntiya akxtum kinkatatawilayan chu xatakgatsin tapaxkit masiyayaw.
13 Xlakata uma katsiyaw pi chuntiya akxtum tawilaw chu xla chuntiya akxtum kinkatawilan: xlakata kinkamaxkinitan xʼespíritu.
14 Nachuna, akinin akxilhnitaw pi xaTlat* malakgachalh xKgawasa chuna la xLakgmaxtuna kakilhtamaku chu makatsininanaw uma.
15 Putum tiku wan xliputum xnaku «Jesús xKgawasa Dios», Dios chuntiya akxtum tatawila uma lataman chu xla chuntiya akxtum tatawila Dios.
16 Chu akinin katsinitaw pi Dios kinkapaxkiyan chu liwana kanajlayaw uma.
Dios tapaxkit, chu tiku ankgalhin paxkinan chuntiya akxtum tatawila Dios chu Dios chuntiya akxtum tatawila.
17 Chuna uma limasiyayaw xatakgatsin tapaxkit, xlakata kkilhtamaku akxni nalakputsanankan ni napekuanaw akxni nachuwinanaw, xlakata kʼuma kakilhtamaku akinin litaxtuyaw chuna la Cristo.
18 Tapekua pulaklhuwa chuna la kinkamalakgachokgoyan. Pero komo chatum lataman paxki Dios ni katipekualh, xlakata xatakgatsin tapaxkit malakgsputu* tapekua. Komo wi tiku pekuan, xtapaxkit ni xatakgatsin.
19 Akinin paxkinanaw xlakata xla pulana kinkapaxkin.
20 Komo wi tiku wan «Akit kpaxki Dios», pero ni akxilhputun xtala,* akgsanina litaxtu. Xlakata tiku ni paxki xtala, tiku akxilha, nila paxki Dios, tiku nila akxilha.
21 Xla kinkamaxkin uma limapakgsin: pi tiku paxki Dios na kapaxkilh xtala.
Notas
^ Xagriego: «espíritu».
^ Xagriego: «espíritus».
^ Anticristo wa xtalamakgasitsin o tiku talalakatawaka Cristo.
^ O: «Dios wa xmakilhtsukina tapaxkit».
^ O: «tamakamastan xlakata nakinkatapatikanan kintalakgalhinkan».
^ Alakatanu wankan «xaTata o xaTiku».
^ O: «tamakxtu».
^ Alakatanu wankan «xtakam».
